El Gobiernu local arrenuncia a que Xixón tenga un albergue xuvenil. La conceyala de Foro, Montserrat López Moro, anunció un cambéu d’usu pal Palaciu San Andrés de Cornellana, un edificiu municipal que taba llistu pa la so reapertura como agospiamientu pa mozos y nun dio nenguna alternativa real.
“El Gobiernu nun paez que tea trabayando nun proyectu seriu que revierta esta falta porque nun se suple instalando a cencielles unes cames nun edificiu de múltiples servicios”, señala Natalia González Peláez.
La conceyala socialista recordó que yá s’acometieron los trabayos necesarios pa la reapertura d’estes instalaciones del barriu de Contrueces; tamién cunta yá col equipamientu afayadizu. “Agora tienen que volver facer nueves obres nesti edificiu históricu. Dende’l Grupu Municipal Socialista vamos pidir les oportunes esplicaciones na Comisión de Cultura de mañana. ¿Qué actuaciones van llevar a cabu pa esa presunta residencia artística si nestos momentos la mayor parte del espaciu atópase estremáu n’habitaciones? ¿Qué van faer coles lliteres, colchones, meses, electrodomésticos y menaxe que yá s’adquirió pa poner en marcha l’agospiamientu?”, pregunta González Peláez.
El PSOE xixonés señala qu’estos espacios nun pueden contemplase puramente como una ufierta de places hoteleres a precios baxos, sinón que son un revulsivo pa l’actividá económica, participativa, social y cultural del conceyu. Nel programa de Gobiernu socialista, yá se contemplaba l’apertura del albergue xuvenil nel Palaciu San Andrés de Cornellana esti mesmu añu, xenerando empleos pa los mozos y les moces del barriu.
Con too ello, la conceyala socialista conclúi que “el Gobiernu dilapida recursos públicos y el trabayu realizáu hasta agora, desoyendo les necesidaes de los mozos nel conceyu”.
