El programa del festival de poesía organizáu pol Conceyu de Xixón, el POEX, que siempres incorporaba dellos espacios pa la poesía asturiana y la música espresada nesti idioma, nun tien esti añu nengún actu que-y dea protagonismu a la lliteratura fecha n’asturianu, invisibilizando l’asturianu dafechamente.
Iniciativa pol Asturianu denuncia esta censura al asturianu nun espaciu nel que yera hasta agora más que natural la so presencia, yá non solo por ser un actu cultural que se celebra en Xixón, sinón porque la poesía fecha n’asturianu tien gran puxu non namás n’Asturies, sinón tamién fuera de les nueses llendes, onde n’eventos lliterarios ye habitual la presencia d’autores n’asturianu. Pa Iniciativa ye inesplicable que se tea sacando al asturianu d’actos culturales como esti y entrúgase si esto nun tien que ver coles polítiques anunciaes por miembros del gobiernu de Xixón d’evitar actuaciones artístiques en llingua asturiana.
Pela so parte, Izquierda Xunida nun entiende «que se marxine a la creación cultural n’asturianu nun festival nel que siempre convivieron les distintes llingües, amosando la diversidá y la riqueza cultural de la nuesa sociedá” señala Ordieres, qu’añede que la intención del so grupu políticu ye caltener una xunta col sector cultural afectáu por esta decisión y rexistrar una entruga al equipu de Gobiernu na Comisión de Cultura.
La conceyala de la coalición tamién alvierte que “ye esmolecedor qu’un partíu como Foro
Asturies, que se considera asturianista y supuestamente partidariu de la oficialidá del asturianu, dende que llegó de nuevu al gobiernu de la ciudá de Xixón nun fixo más que despreciar al idioma y al sector cultural asturianu. Esto nun ye más qu’una nueva inxerencia de la estrema derecha no referente a la cultura asturiana. Nesti mandatu destaca l’ausencia de polítiques culturales en Xixón que caltengan la convivencia de la cultura asturiana col restu d’idiomes, salvo pa crear discutinios innecesarios y romper consensos de ciudá”.
Ye importante recordar que la Ordenanza Municipal del Usu de la Llingua Asturiana nel ámbitu del Conceyu de Xixón, vixente y aprobada por unanimidá nel añu 2008, diz nel so artículu 8 que l’Ayuntamientu «va fomentar y promocionar l’usu del asturianu en tolos ámbitos de la vida social y nes diverses actividaes culturales, deportives, mercantiles y cualesquier otres», colo que la programación del POEX 2024 contravién de forma clara’l propiu ordenamientu xurídicu del Conceyu de Xixón. Esiximos un cambiu nesta programación que-y dea espaciu a la lliteratura asturiana col altor que merez.
