Xixón pieslla pol coronavirus: piscines y biblioteques zarraes, parques precintaos

0
707

Xixón amplía les midíes preventives pa evitar l’andanciu de coronavirus. L’equipu de gobiernu del Conceyu alcordó esta mañana el pieslle les instalaciones deportives municipales, la rede de museos y biblioteques municipales y los centros municipales integraos. Van permanecer zarraos al públicu mientres les vinientes dos selmanes. Sí se van caltener abiertos los servicios de rexistru y atención al públicu, anque con cambeos.

El Conceyu va priorizar l’atención telefónica y telemática y la presencia va desenvolvese al traviés de cita previa. El personal municipal dedicáu a l’atención al públicu va trabayar por turnos. Siguiendo’l zarru de colexos decretáu pol Gobiernu asturianu, les escueles infantiles de 0 a 3 años van permanecer tamién zarraes. Estos centros sí abrieron esti vienres p’atender a «aquelles families que nun tuvieren tiempu de buscar una solución», señala’l Conceyu nuna nota. Los trabayadores nun van dir a les escueles.

El Xardín Botánicu Atlánticu de Xixón va zarrar tamién les sos puertes ente l’andanciu de coronavirus. Amás, van precintase les zones de xuegos infantiles y de práctica deportiva de persones mayores nos parques. Queden suspendíos tamién los talleres d’empléu, les escueles taller y la escuela de segunda oportunidá. Tantu’l rastru como’l mercáu ecolóxicu y artesanu que se diben a celebrar esta fin de selmana quedaron suspendíos. La Casa Conceyu va siguir celebrando bodes mientres les vivientes selmanes. Sicasí, va llindase l’accesu a un máximu de diez persones.

El Conceyu va aprovechar estos díes p’acometer llimpieces intensives nes escueles, instalaciones deportives municipales y centros sociales. Coles mesmes va reforzase la llimpieza na Cocina Económica, l’Albergue Cuadonga y los centros de día. Respectu al personal municipal, va potenciase’l teletrabayu y va establecese una mayor separación ente los puestos de trabayu.