La plataforma XixónTours de visites guiaes n’asturianu ta de vuelta dende’l mes de mayu, onde entamó a programar delles rutes peles cais de Xixón. Van ser dos tipos de visites: d’una banda, l’escritor y académicu Inaciu Galán va guiar a los interesaos pela hestoria del asturianu na ciudá de Xixón. Va entamar cola llegada del llatín a Asturies, arrancando nes termes romanes y va percorrer más de dos mil años al traviés de los espacios de la ciudá.
Un percorríu entreteníu dende los proyectos d’una Academia de la Llingua Asturiana de Gaspar Xovellanos y la obra de Xosefa Xovellanos, primer muyer escritora n’asturianu, hasta l’actualidá, pasando pelos espacios de la hestórica manifestación de Conceyu Bable pola entrada del asturianu nes escueles en 1976, ente otros munchos momentos clave pa entender la realidá del idioma y de la propia Asturies d’anguaño.
Per otru llau, la segunda de les propuestes ye una ruta guiada temática sobre les curiosidaes de la hestoria de Xixón. El percorríu va dir per distintos llugares y momentos hestóricos de la ciudá, conociendo personaxes y momentos curiosos de la villa de Xovellanos. Un percorríu divertíu y desenfadáu dende Cimavilla a Begoña, con paraes que van sorprender y que van convertir a los asistentes nuna persona esperta nel Xixón más célebre.
P’apuntase, namás has calcar nesti link y rellenar los datos solicitaos.
