La cuarta edición del ciclu XixónTours de visites temátiques n’asturianu torna a la ciudá

Tres l’ésitu de les ediciones anteriores, la plataforma de turismu, ociu y hestoria VerAsturies.com y Cuatro Gotes Producciones, cola collaboración de Xixonaldia.com, retomen les visites guiaes del ciclu XixónTours, visites guiaes temátiques n’asturianu que van ufrise al públicu a lo llargo de los meses vinientes.

XixónTours ye una iniciativa pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu.

Les rutes de XixónTours tán diseñaes pa buscar un averamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar, pa que puedan ver aspectos estremaos o desconocíos pa ellos.

Esta cuarta edición lleva delles selmanes en marcha y tien agora cites nueves previstes. Amás, de la esitosa ruta “Xixón mete mieu”, esti añu estrénense rutes nueves: El Xixón de Xosefa y Gaspar de Xovellanos, con Pablo Vázquez, espertu xovellanista, y Xixón golfu y Xixón y les traxedies de la mar, cola hestoriadora Arantxa Margolles.

Feches y horarios de les visites guiaes pal mes de xunetu

Xixón golfu – Vienres 16 de xunetu — 21:30 a 23:00 hores.

Xixón y les traxedies de la mar – Domingu 18 de xunetu — 20:30 a 22:00 hores.

Xixón mete mieu – Vienres 23 de xunetu — 20:00 a 21:30 hores y de 21:30 a 23:00 hores.

El Xixón de Xosefa y Gaspar de Xovellanos – Sábadu 24 de xunetu — 20:00 a 21:30 hores.

Les visites tienen un preciu de 10 euros pal públicu xeneral y 8 euros pa menores de 18 años. Los menores de 12 años nun han pagar entrada. Ye obligatorio inscribise na páxina web xixontours.verasturies.com. El pagu faise al entamu de la visita n’efectivu. Pa más información o duldes pueden ponese en contacto nel corréu xixontours@verasturies.com

El proyectu xestiónalu VerAsturies.com, al traviés de Cuatro Gotes Producciones y cunta col sofitu de la Oficina de Normalización Llingüística de Xixón y la collaboración de Xixonaldia.com.