El Grupu Parlamentariu Confederal de Xuníes Podemos – En Comú Podem – Galicia en Común va rexistrar una enmienda a los Presupuestos Xenerales del Estáu (PXE) pa 2023 col envís d’aumentar la partida presupuestaria destinada a l’Academia de la Llingua Asturiana (ALLA). Asina lo anunció esti vienres la vocera axunta nel Congresu y coordinadora autonómica de Podemos Asturies, Sofía Castañón, depués d’aconceyar n’Uviéu col presidente de la ALLA, Xosé Antón González Riaño.
Castañón esplicó que la enmienda busca equiparar l’aportación económica cola que perciben les instituciones homólogues dedicaes a otres de les llingües del Estáu, “tanto pol llabor que fai l’ALLA como pola relevancia que tien el reconocimientu de les llingües d’Asturies”. Esto diba suponer aumentar la cuantía que’l Ministeriu de Ciencia y Innovación apurre a l’ALLA de los 50.000 euros hasta los 333.170.
La diputada recordó que la partida añal qu’actualmente se destina a l’ALLA yá foi un llogru de Xuníes Podemos na negociación de los Presupuestos del añu 2021, y espresó el so deséu de dar otru pasu alantre que tamién valga “p’algamar la normalidá nel tratamientu de les llingües d’Asturies y el reconocimientu de los derechos de les y los falantes”, ensin escaecer que l’oxetivu más importante nesti sentíu sigue siendo “la reforma del Estatutu d’Autonomía pal reconocimientu de la oficialidá”.
