La entrega del gallardón, tres l’actuación de los cuatro finalistes, va celebrase el 27 de payares nel Centru Niemeyer de Avilés.
Avilés va acoyer el sábadu 27 de payares la decimotercer edición del Premiu Camaretá al Meyor Cantar. El Centro Niemeyer va ser l’escenariu onde los cuatro finalistas actúen pa que’l xuráu, formáu por especialistes en música y llingua asturiana, decida’l cantar ganador. Na gala, tamién va ufiertar un conciertu Rodrigo Cuevas, ganador de la edición anterior d’esti premiu col tema «Rambalín».
Tres una primer deliberación el xuráu, reuníu’l xueves 22 de xunetu, realizó la selección de los cuatro candidatos pa la final. Los cuatro finalistes son: Carla Armes y Rubén García, L-R post-folk asturianu, ¿Aú?, y la Banda de Gaites Camín de Fierro, toos ellos con trabayos discográficos editaos nel añu 2020.
El Premiu Camaretá al Meyor Cantar, dotáu con 6.000 euros, convocáu pol Gobiernu del Principáu d’Asturies coles mires de consolidar, prestixar y arriquecer la creación musical tanto n’asturianu como en gallego-asturianu.
Los cuatro cantares finalistes son:
- Carla Armas y Rubén García, con El que conoz a tierra (lletra de Rubén García Martín y música de Carla Armas Junco y Rubén García Martín).
Carla Armas Junco y Rubén García Martín coincidieron per primer vezgada nel Conservatoriu Superior de Música de Salamanca, onde estudiaron Composición, área na que dambos son docentes anguaño; Rubén nel Conservatoriu Superior de Música d’Uviéu y Carla na Universidad Internacional de la Rioxa. Dende 2009 Carla y Rubén participaron en varios proyectos a comuña, consiguiendo también reconocimientos conxuntos pola composición de bandes sonoras pa documentales, cantares pop y proyectos asemeyaos.
- L-R post-folk asturianu, con Veis volver (lletra de Leticia González y música de Leticia González y Rubén Bada)
L-R ye un dúu formáu por Leticia González (voz y percusión) y Rubén Bada (guitarres eléctriques) que reinterpreta la música tradicional asturiana cola fusión d’nstrumentos estremaos como la pandereta y la guitarra eléctrica. El post-folk-asturianu ye un conceptu creáu pol grupu nel añu 2016, añu de la edición del so primer discu L-R. La idea naz al xunir dos esferes con orixe común: el folk y la música tradicional asturiana. Too ello col envís de revisar los términos dende los que se pensaba la rellación ente tradición y modernidá na música d’Asturies. Veis volver ta incluyíu nel trabayu discográficu N.O.S.
- ¿Aú?, con Tomasín (lletra de Ruma Barbero y música de ¿Aú?)
El grupu fórmase nel añu 2016 y ta compuestu por cuatro persones veteranes de la música folk asturiana: Ruben Bada (buzuki, guitarra y voz), Ruma Barberu (bodhrán), Marga Lorences (acordión) y Dolfu R. Fernández (violín y voz). Parten de pieces tradicionales y composiciones propies basaes polo xeneral en ritmos asturianos. Pa ello válense de preseos presentes na tradición d’Asturies como l’acordión, el violín y la voz xunto con otros abondo habituales dende va delles décades nos grupos folk como’l buzuki, la guitarra y el bodhrán. Tomasín ye un romance compuestu a la manera tradicional que cunta unos fechos asocedíos nel conceyu de Tinéu nel añu 2011.
- La Banda de Gaitas Camín de Fierro con Flacos y ensin peinar (lletra y música: Toli Morilla. Arreglos: Sam Rodríguez y Arsenio Ruiz)
Esta banda naz nel añu 2002 impulsada pola Asociación Cultural La Nublina; los sos componentes formáronse na Escuela Municipal de Música de Los Valles del Oso. Nel añu 2012 pubícase el so primer trabayu discográficu 10 años nel Camín col que consiguieron el premiu AMAS na categoría de gaita y el premiu de la crítica RPA a la meyor canción folk. El cantar Flacos y ensin peinar, pertenece a Rock & Fierro.
