4 persones zarráronse dientro de la Conseyería d’Educación esta mañana. La causa ye que 111 neñes y neños de la cuenca minera vieron cómo’l so serviciu de comedor xubía un 60% d’un día pal otru. Les sos families enfrentáronse énte’l gobiernu asturianu polo que consideren una inmensa inxusticia.
Eva Ledo, Directora Xeneral de Centros, Rede 0-3 años y Enseñances Profesionales, aconceyó colos cuatro zarraos esta mañana y escuso la situación en que nun había un marcu llegal pa iguar esta situación, siendo’l propiu gobiernu’l que tien la competencia, magar de que trespase la responsabilidá d’esti asuntu al conceyu de Llangréu. Un conceyu qu’amosó a les families la total disposición a sofitar económicamente esti problema, pero que nun pue por mor de les competencies.
El problema entamó a finales de febreru, cuando los centros recibieron el comunicáu sobre’l cambéu del serviciu de comedor a la empresa Os Ventos, tres quebrar l’anterior axudicataria del serviciu, el grupu lleonés De Celis. El resultáu d’esti procesu ye que los colexos José Bernardo de Sama (Llangréu) y la Vega de Guceo de Turón (Mieres) pasen de pagar 5 euros al día a 8,25 euros.
