La rede pública, autonómica y gratuita de Les Escuelines cuenta yá col compromisu d’adhesión de 58 conceyos. Esta mañana confirmaron la integración Quirós, Proaza, Teberga, Grau, Candamo y Salas. Toos estos conceyos tienen en funcionamientu escuelines susceptibles de ser integraes, sacantes Quirós onde se va construyir una autonómica dientro d’esta primer fase del añu 2024.
La conseyería entró yá na recta final de la ronda de xuntes territoriales que lleva entamando dende finales de febreru, pa esplicar los detalles de la futura llei, responder consultes y recoyer información sobre’l funcionamientu y la estructura de les sos escueles municipales. Hasta’l momentu, nun recibió nenguna negativa de les autoridaes municipales.
En concretu, el llistáu de conceyos que manifestaron el so interés en formar parte de la rede son: Morcín, Navia, Valle Ba.hu de Peñamellera, Ribedeva, Caravia, Cabrales, Onís, Parres, Villaviciosa, Colunga, Cabranes, Nava, Bimenes, Sariegu, Llaviana, Samartín del Rei Aurelio, Sobrescobiu, Casu, Uviéu, Cuideiru, Pravia, Valdés, Bual, Villayón, Corvera, Gozón, Carreño, Noreña, A Veiga, Castropol, Tapia de Casariego, El Franco, Cuaña, Llanes, Ribeseya, Cangues d’Onís, Ponga, Piloña, Avilés, Cangas del Narcea, Tinéu, Degaña, Balmonte, Somiedu, Illas, Muros de Nalón, Sotu’l Barcu, Les Regueres, Castrillón, Siero, Xixón, Llanera, Quirós, Proaza, Teberga, Grau, Candamo y Salas.
En paralelu, ta realizándose tola tramitación alministrativa y llegal pa poner en marcha una rede que va ser pionera n’España. El Conseyu de Gobiernu dio lluz verde al proyectu de llei Les Escuelines el 17 de mayu. Per otru llau, ta modificándose el decretu que regula’l funcionamientu y organización de los centros de 0 a 3 años p’amoldarlo a la nueva situación. Les principales novedaes qu’inclúi son la dotación de dos educadores en cada aula, la posibilidá d’ocupar más d’una planta nos edificios destinaos a estes enseñances y la regulación de los horarios.
La primer fase, a desenvolver en 2024, va suponer l’apertura de 31 escuelines. Del total, 16 son obres que tán executando los conceyos. Dalgunes, como les de Panes, Santalla d’Ozcos o Villayón, yá tán terminaes. Pela so parte, el Serviciu d’Infraestructures ta peracabando los proyectos d’adaptación d’espacios en colexos públicos que van dexar abrir les 15 que tien planiaes la mesma conseyería.
Amás, a partir de setiembre, va entrar a valir la gratuidá total de la etapa de 0 a 3 años, pa lo qu’hai xuna partida acutada nel presupuestu de 2024.
