Indignación de los vecinos y vecines y de los miembros de la Comisión de Fiestes de Vega poles dificultaes y torgues que la entidá organizadora ta atopando per parte del ayuntamientu pa la celebración de les fiestes n’honor a San Bartolomé de Vega que se celebraríen del 22 al 24 d’agostu na parroquia xixoniega.
La Comisión de Fiestes, col sofitu de la AVV San Emiliano de Vega, manifestó’l so malestar polos entueyos que ta imponiendo la municipalidá de cara a la romería. Dambes entidaes señalaron al traviés d’un escritu qu’estes fiestes parroquiales son yá una tradición centenaria, con datos relativos a la so celebración nel sieglu XIX, realizándose a lo llargo d’esti tiempu, na carbayera amiesta a la ilesia de San Emiliano de Vega. El serviciu de Parques y Xardinos municipal quería refugar el permisu pa les fiestes d’esti añu alegando protección pa les especies arbórees; cuando esi espaciu ye propiedá privada -del Arzobispáu d’Uviéu- asumiendo la parroquia colos sos fondos de la siega y caltenimientu de dichu espaciu, cuntando en determinaos momentos cola ayuda de la Comisión de Fiestes y de l’Asociación de Vecinos polos altos costos d’estes intervenciones. Énte l’altu preciu de les intervenciones, solicitóse collaboración de la municipalidá, llogrando namás el non por respuesta amás de recibir un tratu bien desagradable per parte del serviciu de Parques y Xardinos amenaciando con denuncies y criticando a l’autoridá eclesial.
Otru problema bien grave que se produció apocayá son les llimitaciones nel horariu de zarru de los díes de les fiestes. A menos d’un mes del entamu de les mesmes, cuando’l programa yá ta zarráu treslládense estos cambeos provocando un perxuiciu enorme a la comisión organizadora y al trabáu desenvueltu por toles persones que collaboren na so celebración.
Dende la Comisión de Fiestes de Vega recuerda que la fiesta de Vega ye una romería tradicional en que collabora tol pueblu, dende los pequeños hasta los vieyos, y pide al Ayuntamientu que compruebe in situ esta realidá. Amás, la Fiesta de la lluz con bengales y fueos artificiales que zarra los festexos ye una tradición que se lleva faciendo 29 años.
Los colectivos solicitaron una xunta urxente col conceyal de Festexos, Oliver Suárez, pa tratar de llograr una solución a la nueva considerancia de los horarios y reclamaron ‘sentíu común’ a l’alministración local.
