Llaboral Centru d’Arte acueye l’actu de celebración del Día Européu de les Llingües
La Conseyería de Cultura, Política Llingüística y Deporte va celebrar el próximu martes, 22 de setiembre, el Día Européu de les Llingües con un alcuentru abiertu al públicu que va axuntar distintes esperiencies sobre la diversidá llingüística na Llaboral Centru d’Arte y Creación Industrial de Xixón. La cita va empezar a les 19:00 hores y va ufiertar una programación que combina diálogu, lliteratura y música.
La conseyera de Cultura, Política Llingüística y Deporte, Vanessa Gutiérrez, va abrir l’eventu. L’alcuentru propón mirar la realidá plurilingüe d’Europa dende Asturies y asitiar l’asturianu y l’eonaviegu nesi contestu, les llingües propies coles que la comunidá forma parte d’un patrimoniu européu marcáu precisamente pola so bayura y diversidá.
L’actu inclúi una mesa redonda sobre la convivencia ente llingües, el plurillingüismu y la multiculturalidá, tanto dende l’ámbitu social como dende la creación cultural, na que van participar el subdirector de Política Llingüística, Nicolás Bartolomé; la directora del centru anfitrión, Semíramis González, y el periodista, escritor y especialista en llingua asturiana Inaciu Galán.
La celebración asturiana adelántase cuatro díes a la fecha oficial del Día Européu de les Llingües, que se conmemora cada 26 de setiembre. La iniciativa nació nel 2001, mientres l’Añu Européu de les Llingües promovíu a comuña pol Conseyu d’Europa y la Xunión Europea, y dende entós convirtióse nuna cita añal pa poner en valor la diversidá llingüística y cultural, favorecer el deprendimientu d’idiomes y l’entendimientu ente cultures y recordar la importancia de protexer el patrimoniu llingüísticu européu.
Europa cunta con más de 225 llingües autóctones, a les que se sumen les munches que formen parte de la sociedá europea como resultáu de los movimientos migratorios. Dientro d’esi mosaicu, l’asturianu y l’eonaviegu tán venceyaos dende va sieglos al territoriu, la cultura y la vida de xeneraciones d’asturianos y asturianes y formen parte d’un patrimoniu que se caltién vivu al traviés del so deprendimientu, el so usu y la so tresmisión. Dambes llingües tán, amás, incluyíes nel marcu de protección de la Carta Europea de les Llingües Rexonales o Minoritaries.
Poesía y música pa zarrar la celebración
La última parte del alcuentru va treslladar esa diversidá al tarrén de la creación. La escritora Sofía Castañón va facer delles intervenciones poétiques, que se van alternar coles pieces musicales interpretaes por un cuartetu de cuerda de la Orquesta Sinfónica del Principáu d’Asturies (OSPA), nun piesllu concebíu como un diálogu ente pallabra y música.
El programa va rematar cola interpretación de la Oda a l’Allegría, l’himnu européu. La celebración va zarrar asina un percorríu que parte de la reflexón sobre la convivencia ente llingües y desagua na creación y reivindica la diversidá llingüística como un patrimoniu vivu y compartíu, amás de recordar que cada xeneración que deprende, remana y tresmite una llingua contribúi tamién a caltenela.
