El Conceyu de Xixón inauguró esta mañana la cubierta de la pista polideportiva de L’Atalaya, utilizada davezu pol colexu Honestu Batalón. Dase respuesta, d’esta miente, a una histórica reclamación vecinal. La pista escarecía de techu y namás podía ser aprovechada con bon tiempu. Amás, tantu’l pavimentu como’l zarramientu taben en mala traza poniendo en riesgu la seguridá de los usuarios.
L’alcaldesa de la ciudá, Ana González, señaló que la cubierta ye una bona metáfora del «procesu de cambéu» y meyora que vive la ciudá. El presupuestu d’axudicación ye de 900.332 euros IVA incluyíu. El proyectu de la cubierta, redactáu pol serviciu d’arquitectura del Conceyu, buscó la so integración na redolada xenerando’l mínimu impactu visual dende’l mar y dende tierra.
La superficie construyida algama los 1041,67 metros cuadraos y ta estazada en cuatro zones de cubierta inclinada a dos enagües para asemeyar les edificaciones tradicionales y disimular el volume. Amás, ta realizada con madera, consiguiendo una imaxe de conxuntu. Les obres para la so construcción empezaron en febreru y remataron a finales d’avientu.
