El presidente d’Asturies anunció que güei mesmo va convocar a los grupos parlamentarios a una xunta que se va celebrar na segunda quincena d’esti mes pa negociar la reforma del artículu 4 del Estatutu d’Autonomía ya impulsar la oficialidá de les llingües propies de la comunidá: l’asturianu y el eonaviego. Adrián Barbón esplicó que l’Executivu autonómicu va llevar una propuesta de cambéu a esa xunta, al que va convidar tamién a representantes de l’Academia de la Llingua Asturiana, col fin de buscar un consensu qu’hasta agora nun foi posible.
Barbón comprometióse a “llegar hasta’l final” nesti procesu, lo qu’implica la presentación d’una proposición de llei na Xunta Xeneral p’afrontar el cambéu del artículu 4. Si esa propuesta se toma en consideración, empecipiaríase l’alderique na comisión parlamentaria correspondiente y zarraríase un testu que tendría de votase depués nel plenu. “Hai que pasar del dichu al fechu y demostrar que somos asturianistes, non con pallabres, sinón con fechos concretos, y eso faise con una votación. Al pueblu asturianu yá nun-y sirven les medies tintes”, indicó.
Nesti sentíu, recordó que l’aprobación d’un cambéu na norma institucional básica del Principáu esixiría una mayoría reforzada, esto ye, 27 votos a favor nel Parlamentu, polo que reclamó a los grupos de la Xunta Xeneral que contribuyan al consensu “pa que la oficialidá seya una realidá”.
En concretu, emplazó a los diputaos del PP a que “reflexonen y seyan audaces” y a que tomen exemplu de la postura del so partíu en Galicia respecto al tema identitariu y llingüísticu. “Énte una votación definitiva del cambéu del artículu 4 tienen de votar a favor, porque en casu contrariu nun va haber oficialidá, nun va valir con que s’abelluguen na astención”, alvirtió.
