Adrián Barbón reclamó esti domingu la máxima rapidez nel repartu de los tests de detección rápida del coronavirus COVID-19. El presidente del Gobiernu asturianu plantegó que se dea una “prioridá absoluta” a les residencies de mayores. El xefe del Executivu sofitó l’allongamientu del estáu d’alarma. «Inclusive defendo que s’estremen los controles pa garantizar el so cumplimientu. Los Cuerpos y Fuerces de Seguridá tienen de ser tayantes nel control de los movimientos», afirmó.
Barbón participó na videoconferencia celebrada ente’l presidente del Gobiernu d’España, Pedro Sánchez, y el xefes de los Executivos autonómicos. Nesi alcuentru, Sánchez anunció que va proponer la prórroga del estáu d’alarma mientres otres dos selmanes, midida que precisa l’autorización del Congresu. Pal presidente asturianu “ye una decisión acertada”. “Hai que caltener la firmeza na llucha contra’l virus el tiempu que sía necesariu. Ye una prueba de coraxe, una demostración de que sabemos reaccionar como sociedá énte una amenaza tan grave como esta”.
“Nun podemos pensar en ganar esta batalla sanitaria ensin medios abondos”
La sanidá ye la primer llínea d’esta batalla. “Nun podemos pensar en ganala ensin medios abondos”, afirmó Barbón. Por ello, reclamó material sanitario y n’especial tests de detección masiva. “Cuntar con ellos va permitinos frenar les andaes. Les residencies de mayores tienen de ser nuesa prioridá en tou momentu. Si podemos faer pruebes masives vamos consiguir evitar munchos males mayores. Asturies ye una comunidá bien avieyada, colo qu’esi planteamientu tien na nuesa rexón más sentíu qu’en cualesquier otra”, esplicó. La conseyera de Servicios Sociales, Melania Álvarez, yá defendió esti planteamientu va díes énte’l vicepresidente del Gobiernu d’España, Pablo Iglesias.
El Gobiernu asturianu valora la iniciativa de la sociedá. Investigadores, entamadores y empreses tán collaborando n’Asturies na fabricación de respiradores por aciu impresión 3D o en proyectos como’l reciclaje de mázcaros. “La so collaboración ye exemplar. Quien tán poniendo la so iniciativa y el so talentu al serviciu de les necesidaes médiques son un arguyu p’Asturies. Ye un honor ser paisanos”. Nesi sentía, reconoció «el bon trabayu de la Conseyería de Ciencia, sofitando estes iniciatives y poniéndoles al serviciu de la salú colectiva”.
La victoria sobro’l virus rique “unidá y collaboración”, aportunó’l presidente asturianu. Por eso, defendió que se sigan celebrando conferencies de los presidentes autonómicos col Gobiernu d’España. “Ye’l tiempu de la unión. Más que nunca, tenemos de tar xuntos”.
