Foi una iniciativa de la ciudadanía y del movimientu social del conceyu y mañana, vienres 28 de xunu, va facese oficial. El Parque Aníbal Vázquez va ser una realidá nun día nel que se va celebrar un plenu estraordinariu, a les 10 hores, p’aprobar esti nomamientu, y nun actu cenciellu y emotivu que se va celebrar dos hores dempués, a les 12 hores, na cai Hermanos González Peña. Una cita na que va intervenir representación del movimientu social que propunxo esti nomamientu, la familia de Aníbal Vázquez, el coordinador xeneral d’IX, Antonio Maíllo, la ministra de Mocedá ya Infancia, Sira Rego, l’alcalde, Manuel Ángel Álvarez, y el presidente d’Asturies, Adrián Barbón.
Un actu que se va convertir nun merecíu homenaxe y alcordanza al alcalde Aníbal Vázquez, unu de los alcaldes más queríos y una figura que trespasó fronteres ideolóxiques y territoriales pa convertise nun referente de compromisu, arrogancia, trabayu y llucha pol so conceyu y los sos vecinos y vecines. La so despidida’l pasáu mes de payares foi multitudinaria y dende entós les amueses de ciñu y alcordanza al alcalde nun cesaron. Dende mañana, esti gran corazón verde del cascu urbanu va llevar el so nome.
