El Conseyu de Gobiernu aprobó güei, n’una xunta telemática estraordinaria, el proyectu de llei que va dexar dar cumplimientu a les obligaciones del Principáu nel procedimientu de lliquidación ordenada y estinción de la Fundación para la Formación, la Cualificación y l’Empléu nel Sector Metal d’Asturies (Fundación Metal). Al traviés d’esta norma, autorizar a la Conseyería d’Industria, Empléu y Promoción Económica a conceder una subvención directa con un importe máximu de 3.200.000 euros a la entidá, que xunto coles aportaciones del restu de los patronos va dexar atender les deldes pindies cola plantiya y el provisores, munchos d’ellos profesionales autónomos.
El proyectu de llei, que cunta con un preámbulu, dos artículos y una disposición final, va unviar a la Xunta Xeneral y va solicitase la so tramitación en llectura única col fin d’entainar l’aprobación definitiva de la norma.
L’aportación por llei a la fundación ye’l mecanismu presupuestariu que s’articuló para faer frente a los compromisos del Executivu.
El patronatu de la Fundación Metal alcordó’l 27 de xunu la lliquidación de la entidá énte la imposibilidá de caltener los sos fines fundacionales pola falta de lliquidez, el riesgu na so solvencia y les deldes acumulaes. Nesti contestu, los patronos tienen d’apurrir les cuantíes necesaries pa cumplir coles obligaciones derivaes del procedimientu d’estinción. Estes obligaciones tán supervisaes pol Protectoráu de Fundaciones. En casu de que quedaren fondos sobrantes d’esa subvención, la fundación reintegrará l’escesu al Principáu, acordies con lo dispuesto na normativa vixente.
El proyectu de llei aprobáu tamién establez que, con calter escepcional, la llei va entrar a valir a otru día de la so publicación “pola perdifícil situación que tán travesando el trabayadores y trabayadores de la fundación”.
