Nueva normalidá tres la pandemia de la Covid-19

Asturies recupera pasu ente pasu la normalidá. La comunidá entró’l llunes na fase 3 de la desescalada, la cabera nesti procesu. Si nun hai biltos importantes nos vinientes díes, el Principáu pasará a lo que se vien a llamar ‘nueva normalidá’ el 22 de xunu. Sicasí, la vida va siguir condicionada pola pandemia de la Covid-19. El Conseyu de Ministros aprobó esti martes un Real Decretu-llei coles midíes que van regular el día a día tres l’estáu d’alarma. Nuna rueda de prensa celebrada nel palaciu de La Moncloa, la ministra de Facienda y vocera del Gobiernu aseguró que «nun hai que baxar la guardia» porque «el virus sigue siendo una amenaza mientres nun tengamos un tratamientu eficaz o vacuna».

El ministru de Salú, Salvador Illa, esplicó que dalgunes de les midíes recoyíes del Decretu-llei nun son nueves, sinón que se trata d’ampliar delles que yá se taben aplicando hasta agora. Caltiénse’l refuerzu na hixienización y llimpieza d’espacios públicos y privaos, asina como’l llaváu frecuentes de manes y el caltenimientu de la distancia interpersonal de 1,5 metros. Tamién prorroga l’usu obligatoriu de mázcares nel tresporte públicu y na cai cuando nun se pueda caltener la distancia mínima de seguranza.

El documentu aprobáu tamién obliga a les comunidaes autónomes a informar al Ministeriu sobre la evolución de l’andanciu nos sos territorios. Los profesionales sanitarios van siguir xugando un papel fundamental. El Decretu-llei establez un protocolu de detección rápida ente nuevos biltos, especialmente nes residencies d’ancianos. Les midíes aprobaes van tar en vigor hasta que’l Gobiernu declare’l final de la crisis sanitaria.

Pablo Iglesias, María Jesus Montero y Salvador Illa na rueda de prensa tres el Conceyu de Ministros
Pablo Iglesias, María Jesus Montero y Salvador Illa na rueda de prensa tres el Conceyu de Ministros.