El Principáu aprobó’l vienres el decretu pol que s’establecen los niveles de competencia nel usu del asturianu y regula los esámenes oficiales afechos al Marcu Común Européu de Referencia de les Llingües. En concretu, habrá certificaos de nivel básicu (A1 y A2), mediu (B1 y B2) y avanzáu (C1).
Con esta normativa nueva la ciudadanía va poder demostrar el so nivel competencial de llingua asturiana con un certificáu que lo acreíte. Pa sacar el certificáu de los niveles de la llingua asturiana va ser menester superar una prueba de certificación. Estes pruebes van ser iguales en tola comunidá. Van tar compuestes de cinco exámenes: comprensión de testos orales, comprensión de testos escritos, producción y coproducción de testos orales, producción y coproducción de testos escritos y mediación.
La superación de los cinco exámenes y el llogru d’una puntuación media de 6 sobre 10
La superación de los cinco exámenes y el llogru d’una puntuación media de 6 sobre 10 nel conxuntu de los mesmos va dar derechu al certificáu d’esi nivel. Los certificaos de superación de nivel regulaos nesti decretu van poder valorase nos procesos de reconocencia de méritos que se xestionen nel Principáu d’Asturies.
Van poder participar quien tengan a lo menos dieciséis años. Les pruebes van diseñase pa evaluar específica y puramente les competencies propies de cada nivel. Les convocatories de les pruebes de certificación van entamase polo menos una vez al añu pa un mínimu d’ún de los niveles. Nel calendariu d’aplicación establecíu prevése una primer convocatoria de pruebes de certificación dientro del añu 2019.
Ta prevista la ellaboración del proyectu normativu que regule los niveles de competencia nel usu del gallego-asturianu
La ellaboración de les pruebes de certificación va llevales a cabu profesoráu funcionario del Principáu d’Asturies que s’atope inscrito nel Rexistru Xeneral de Capacitación n’asturianu. L’alministración, evaluación y calificación de la prueba de certificación de los distintos niveles de la llingua asturiana van llevase alantre por comisiones evaluadores. Caúna d’elles va tar compuesta por un mínimu de trés y un máximu de seis funcionarios.
Ta prevista la ellaboración del proyectu normativu que regule los niveles de competencia nel usu del gallego-asturianu y la prueba de certificación de los mesmos qu’acreíte la conocencia d’esa llingua.
