La conseyera de Cultura presenta les campañes promocionales de les marques de calidá destinaes a hostelería y restauración .
La conseyera de Cultura, Política Llingüística y Turismu, Berta Piñán, abrió güei na feria Madrid Fusión l’Espaciu Gastronómicu Asturies Paraísu Natural y Alimentos del Paraísu, cola presencia de los restauradores con estrella Michelin. Esta ye la primer vez que’l Gobiernu del Principáu participa con estand propiu a la gran cita internacional de la gastronomía que se celebra en Madrid y en que la so inauguración participó tamién la viceconseyera de Turismu, Graciela Blanco.
La conseyera valoró la presencia de la comunidá como “la meyor manera de proyectar la fuercia y el potencial de la gastronomía asturiana, nun eventu que se presenta como’l primer congresu global del sector nel mundu”. Piñán insistió na voluntá del Principáu de que la gastronomía sía unu de les exes principales d’Asturies como destín y destacó, ente les acciones próximes d’impulsu turísticu, la celebración na comunidá del congresu internacional Mujeres, Gastronomía y Medio Rural, previstu pa setiembre.
Mientres la so intervención, previa al actu central de la xornada, la titular de Cultura glosó la relevancia de les dos marques de calidá del Principáu pa hostelería y restauración: Meses d’Asturies y Sidreríes d’Asturies. Dambes arrexunten un bon númberu d’establecimientos con estándares elevaos confirmaos por esixentes auditoríes de serviciu y instalaciones. Amás, la conseyera presentó los audiovisuales realizaos pa la so promoción, trabayos que se sumen a los divulgaos va unes selmanes pa los sellos de calidá d’agospiamientos: Casones Asturianes y Aldea–Asturies Calidá Rural.
La primer xornada del espaciu asturianu en Madrid Fusión tuvo como principal atractivu la presencia nes cocines de profesionales de la restauración rexonal con estrella Michelin. Los cocineros Nacho y Esther Manzano, de Casa Marcial, y Ricardo Sotres, d’El Retiro, xuntu con Toño Argüelles, d’Argüelles Chocolatier, ellaboraron un menú singular pa los visitantes qu’enllenaron el comedor. El recintu, de 160 metros cuadraos, tien un aforu de 40 persones. L’espaciu d’Asturies tien cubiertes dende va unos díes les reserves pa toles sos actividaes.
Degustación d’alimentos ecolóxicos
Antes de la xinta de les estrelles Michelin, el pabellón ufiertó una degustación d’alimentos ecolóxicos d’Asturies. La xornada va concluyir con una cata-degustación de los quesos de les denominaciones d’orixe protexíes (DOP) Afuega’l Pitu, Gamonéu, Casín y Cabrales.
Mañana, el programa va empecipiar con una cata de sidres naturales esplumoses acoyíes a la DOP Sidra d’Asturies y va rematar con una cata-armonizaxe de la Indicación Xeográfica Protexía (IGP) Choscu de Tinéu con vinos DOP Cangas. Ente dambes actividaes, la xinta va tar dedicada a les guisanderas asturianes y el menú va ser ellaboráu por Yvonne Corral, de Casa Telva; Ramona Menéndez, de Casa Belarmino, y Julio Blanco, de la pastelería Pomme Sucre.
El miércoles, día de la clausura, van ellaborar el menú de la xinta, dedicáu a los talentos nuevos, Xune Andrade, del Restorán Monte, y Javier Álvarez Farpón, de Casa Farpón, con Jonathan González, de la pastelería Cabo Busto, que va encargase de los postres.
