La promoción de les rutes refuérzase p’aprovechar la estensión del añu xubilar a 2022
El Principáu reactivó’l programa de viaxes d’operadores especializaos nel Camín de Santiagu pa la inclusión de los itinerarios asturianos nos sos catálogos. Un representante del operador especializáu na ruta xacobea Spain is more fai esta selmana un viaxe de reconocimientu pelos recursos esistentes nel Camín Primitivu y nel tramu occidental del Camín Costeru, centrándose en pequenos hoteles con encantu y cases rurales.
Esti viaxe ye’l primeru d’una ventena que va traer a Asturies a axencies y operadores a lo llargo d’esti añu. Munchos d’estos itinerarios tán planiaos dientro del programa del I Alcuentru comercial de los itinerarios del norte del Camín de Santiagu, que’l Principáu entama esta seronda. Sol formatu de market place, esti eventu va axuntar a los principales operadores turísticos especializaos.
Les acciones de promoción de los itinerarios asturianos del Camín de Santiagu en medios de comunicación refuércense para aprovechar la estensión del añu xubilar a 2022. Nesti sentíu, tán desenvolviéndose acciones que van algamar una inversión d’un millón d’euros a finales del exerciciu y que tomen tantu’l mercáu nacional como l’internacional, especialmente países como Alemaña, Italia, Francia y Portugal.
