El Conseyu de Gobiernu autorizó güei un gastu de 18.190.701 euros pa la construcción del Colexu públicu Nuevu Roces, de Xixón. mLa Conseyería d’Educación va contratar los trabayos por aciu procedimientu abiertu y tramitación ordinaria. L’actuación cunta con financiamientu tresañal y la siguiente distribución: 696.724 euros p’anguaño, 10.886.850 pa 2024 y 6.607.126 pa 2025.
El Colexu públicu Nuevu Roces, que’l so proyectu se presentó a finales de xineru a una representación de les families y el vecinderu, afacer a los criterios establecíos pol gobiernu pa la construcción de nuevos equipamientos educativos: sostenibilidá y eficiencia enerxética, flexibilidá d’espacios, aplicación de metodoloxíes d’enseñanza innovadores y apertura a la comunidá.
El centru va cuntar con más de 10.000 metros cuadraos de superficie construyida distribuyíos en trés plantes sobre rasante y un suétanu, amás d’una pista deportiva semienterrada y cubierta con un planu verde y xuna grada. El centru va tener, amás, 9 aules d’Educación Infantil y 18 de Primaria, árees para nueves tecnoloxíes, música y desdobles, según ximnasiu, vestuariu, comedor, biblioteca, salón d’actos con aforu pa 229 persones, sales de visita y despachos pa l’asociación de padres y madres y pa l’alumnáu.
Les redolaes educatives van ser flexibles, col fin de fomentar la convivencia y facilitar la versatilidad d’usos. Pa llograr estos oxetivos, van instalase superficies acristalaes y va haber tabiques móviles insonorizaos que van dexar arrexuntar delles aules y crear superaules, tal como-y se denomina na xíriga.
El colexu va ser dafechu accesible y va incluyir ramples con un enclín inferior al 6%, yá que na ellaboración del proyectu incluyéronse aportaciones específiques de colectivos como’l Comité Español de Representantes de Persones con Discapacidá (Cermi).
Amás, el consumu enerxéticu del inmueble, qu’incorpora aerotermia y paneles fotovoltaicos, va ser mínimu: van reutilizase agües pa riegu, van usase materiales de construcción ecosostenibles y van asitiase cubiertes vexetales qu’aisllen del calor.
El futuru colexu va dar respuesta a les necesidaes d’unu de los barrios con mayor crecedera de Xixón, qu’alluga una de les poblaciones más nueves d’Asturies, de la que va atender les demandes de los colectivos vecinales d’esti distritu.
