Asturies llíbrase de la nueva resintonización de la TDT

El Principáu nun se va ver afectáu pol apagón del segundu dividendu dixital por completar el procesu en 2015

0
162

Asturies nun va sufrir l’apagón de la TDT (Televisión Dixital Terrestre). El segundu dividendu dixital obliga a camudar de frecuencia les canales de televisión. El Principáu foi la primer comunidá autónoma en completar esti procesu yá en marzu de 2015. La lliberación de la banda televisiva faise pensando nel futuru despliegue de la rede 5G. La Conseyería d’Innovación recuerda que la distribución de frecuencies nun esperimenta nengún cambéu y nun ye mester adaptar antenes.

La migración de frecuencies produzse énte la necesidá d’estenar la banda de 700 MHz del espectru radioeléctricu, güei parcialmente ocupada pola TDT, pa permitir ende l’esplegue de futures redes de telecomunicaciones 5G. Los llares españoles disponen hasta’l 3 de marzu pa camudar antenes y resintonizar les canales.

Asturies yá llevó tolos conteníos a frecuencies inferiores a los 700 MHz. El Principáu siguió les esperiencies de Francia y el Reinu Xuníu pa llograr la conformidá del Gobiernu d’España. D’esta manera, convirtióse na única autonomía n’adelantrase a l’actual migración de frecuencies. El director xeneral d’Innovación, Investigación y Tresformación Dixital, Iván Aitor Lucas, destacó’l trabayu realizáu pol serviciu técnicu. Amás, recordó a comunidaes de vecinos y particulares que nun acepten ufiertes de servicios técnicos pa camudar antenes o resintonizar cola escusa de la entrada a valir del segundu dividendu dixital.