La conseyera de Facienda, Ana Cárcaba, plantegó esti martes en Bruxeles que se tengan en cuenta les particularidaes de la comunidá a la d’encarar el marcu financieru nuevu de la Xunión Europea (XE). «Vamos defender siempre los intereses d’Asturies y pa eso tenemos de tener pesu na negociación del marcu nuevu», aseguró la conseyera.
Cárcaba incidió na necesidá de que se tomen en considerancia delles característiques singulares d’Asturies; por exemplu, el fechu de que la comunidá yá tea somorguiada nel procesu de transición enerxética, pa lo que precisa sofitu económicu de les instituciones europees. Al so paecer, nesti contestu van ser fundamentales les aliances con otres rexones que s’atopen n’idéntica situación, tanto n’España como nel restu de la UE. «Hai que se facer fuertes y buscar la collaboración con territorios qu’encaren dificultaes similares a la nuestres», aseguró.
La titular de Facienda asistió na capital belga al Comité de les Rexones, que se celebra güei y mañana, y tamién va participar xunto col director xeneral d’Asuntos Europeos, Javier Vila, nuna serie d’actos paralelos. El departamentu de Facienda asumió nesta llexislatura les competencies europees y el viaxe a Bruxeles sirvió pa que tanto la conseyera como’l director xeneral conozan de primera mano’l trabayu que desenvuelven los técnicos del Principáu nes instituciones comunitaries.
