Xixón al día

Autor: xixonaldia

  • El PSOE pide la reprobación del conceyal de movilidá, Pelayo Barcia

    El PSOE pide la reprobación del conceyal de movilidá, Pelayo Barcia

    El PSOE va llevar al próximu Plenu la reprobación de la xestión conceyal de Tráficu, Movilidá y Tresporte Públicu, Pelayo Barcia. Anunciólu esta mañana’l conceyal del Grupu Municipal Socialista nel Conceyu de Xixón Tino Vaquero, que tachó de “tremendamente perxudiciales pal conceyu” les decisiones y omisiones opuestes a una movilidá más sostenible y saludable. Precisamente güei ye’l primer día que se fai efectiva la xubida del preciu del billete del autobús pola perda de les ayudes al tresporte públicu dempués de que’l gobiernu local nun cumpliera con una parte del tratu pa poder recibir eses ayudes: la implantación d’una zona de baxes emisiones.

    “Les sos polítiques contraries a la llei pueden llevar a Xixón a tener que devolver 7 millones d’euros de fondos europeos consiguíos pa la implantación d’una zona de baxes emisiones y son el motivu pol que dende güei’l billete d’autobús cuesta casi’l doble”, señala Vaquero de la que define esta situación con exemplu d’un llabor absolutamente desdexosu y directamente perxudicial pal bolsu de la ciudadanía.

    Coles mesmes, acusó al conceyal Pelayo Barcia de mentir al afirmar qu’integró y canalizó les ayudes al tresporte al traviés del Consorciu de Tresporte d’Asturies. “Ye absolutamente falsu. El Principáu tuvo qu’asumir unilateralmente y a la so esclusiva costa, les ayudes que Xixón perdió”, esplica.

    El conceyal del PSOE xixonés recordó que lo qu’aprobaron ye un proyectu técnicu pa aprobar una ZBE que nun s’afai a la llegalidá y que nun cumple nin un solu criteriu de los previstos nel decretu de regular; tampoco les directrices y encamientos del Ministeriu pa la so implantación. “Crearon una ZBE que ye un auténticu fraude de llei, por eso, les usuaries y usuarios de EMTUSA tienen que pagar más dende güei pol usu del so tresporte públicu urbanu cola tarxeta ciudadana. Amás, desconocemos el testu de la supuesta ordenanza de baxes emisiones, en qué trámite s’atopa y si va a ser posible aprobala antes del 31 d’avientu d’esti mesmu añu, plazu máximu obligatoriu pa disponer d’una zona de baxes emisiones o, de lo contrario, van llevanos a la devolución de los fondos col consecuente perxuiciu pa les arques municipales”, añede.

    Por ello, apunten los socialistes, Xixón convirtióse nun esponente de ciudá negacionista en materia de movilidá y provocó que fuera una de les ciudaes investigaes pol Defensor del Pueblu al nun empecipiar entá la tramitación pa la implantación de les ZBE obligatoria. A esta situación súmase l’anulación de la Ordenanza de Movilidá Sostenible pa dar pasu a la vieya Ordenanza de Circulación y Tresporte de fai casi 25 años, la falta d’execución d’un solu parking disuasoriu conectáu adecudamente cola ciudá al traviés de tresporte públicu nin de nenguna actuación prevista nel Plan de Movilidá. Amás, Vaquero punxo sobre la mesa decisiones más que cuestionables del gobiernu local como la supresión de los bolardos instalaos frente a los colexos que garantizaben la seguridá de los escolares, la eliminación de los corredores piatonales de Ruiz Gómez y Caridá y de dellos ciclocarriles o, reabrir al tráficu la cai Cuadonga.

    “Dende que va dos años el conceyal Pelayo Barcia asumiera les competencies delegaes en materia de movilidá, les llinies estratéxiques y la falta de planificación traducióse en desregulación y caos. Foi tomando decisiones aisllaes ensin proyectu dalgunu pa la ciudá. Por too ello, llevamos al Plenu la so reprobación”, conclúi Tino Vaquero.

  • Asturies aprueba la gratuidá del primer cursu na Universidá

    Asturies aprueba la gratuidá del primer cursu na Universidá

    El Gobiernu asturianu alcordó güei dos midíes que doblen el so sofitu a la Universidá pública: aprobó la gratuidá de la matrícula del primer cursu y conxeló les demás tases per sestu añu consecutivu. Con estes midíes, “Asturies asítiase a la vanguardia de les polítiques universitaries d’España”, destacó Borja Sánchez, conseyeru de Ciencia.

    El Conseyu de Gobiernu formalizó unu de los compromisos qu’asumiera’l presidente, Adrián Barbón, pa favorecer l’accesu a los estudios cimeros de toles persones, seya cual seya’l so nivel de renta. La meta ye igualar la educación universitaria al restu de servicios básicos, como la sanidá, los derechos sociales o les demás etapes educatives.

    Darréu, resúmense delles iniciatives:

    • Matrícula gratuita. A partir del próximu cursu (2025-2026), quien apuerte per primer vegada a un grau universitariu nun tendrán d’abonar importe dalgunu polos creítos del primer añu académicu. El Gobiernu d’Asturies fadráse cargu del costu de les matrícules y va compensar a la Universidá pa que nun vea amenorgaos los sos ingresos.

    L’Executivu calcula que la midida va beneficiar a más de 4.000 estudiantes. Sicasí, la gratuidá nun se llimita al primer cursu. Si l’alumnáu cumple los requisitos académicos va poder caltener la matrícula gratuita tola carrera.

    Esta midida pionera tamién favorez l’atracción d’estudiantes, tanto d’otres comunidaes como del estranxeru.

    • Conxelación de tases. El restu de cursos universitarios va beneficiase de la conxelación de precios públicos per sestu añu consecutivu nos estudios de grau, máster y doctoráu. D’esta miente, les families con estudiantes que yá asistan a la Universidá d’Uviéu van pagar una media de 300 euros menos qu’en 2011.

    Caltiénense, amás, otres exenciones yá previstes, como les aplicables a persones con discapacidá, families numberoses, víctimes de violencia de xéneru o terrorismu, ente otres.

    • Beques salariu. El gobiernu va convocar nos próximos meses les primeres beques salariu pal cursu 2025-2026. Tán dirixíes a mozos en situación de vulnerabilidá y con espedientes escelentes, que tienen que trabayar p’ayudar al sustentu familiar. La beca va dexar al estudiante cursar una carrera y apurrir ingresos a la familia.
    • Contratu programa. Toes estes midíes súmense al contratu programa vixente dende 2023 que garantiza la estabilidá financiera de la Universidá d’Uviéu mientres un periodu máximu de diez años. L’alcuerdu, que sirvió de modelu a otres comunidaes, inclúi más de mil millones nos primeres seis años y un modelu de financiamientu por oxetivos.
  • Cultura va entregar esta seronda pela primer vez la marca Alfaya, que reconoz les empreses qu’integren l’asturianu na so actividá

    Cultura va entregar esta seronda pela primer vez la marca Alfaya, que reconoz les empreses qu’integren l’asturianu na so actividá

    La conseyera de Cultura, Política Llingüística y Deporte, Vanessa Gutiérrez, comunicó esta mañana que’l sellu Alfaya va ponese en marcha esti mesmu añu, na seronda. Gutiérrez realizó l’anunciu nuna xunta con representantes de l’Asociación d’Empreses y Profesionales pol Asturianu. El distintivu Alfaya ye una iniciativa de la conseyería destinada a reconocer y visibilizar el compromisu del texíu empresarial coles llingües propies del territoriu: l’asturianu y l’eonaviegu.

    La marca Alfaya, creada pol Decretu 21/2023, de 16 de marzu, de la Conseyería de Facienda, naz cola mira de fomentar l’usu social de les llingües propies nel ámbitu económicu y reconocer públicamente aquelles empreses qu’integren bones práctiques llingüístiques na so actividá diaria.

    Na xunta, tratáronse los planes pa la implementación de la marca, que va suponer establecer 3 niveles de reconocencia a les empreses:

    • Nivel inicial, d’accesu fácil, faciendo una solicitú d’adhesión.
    • Nivel intermediu, que reflexa un compromisu activu col usu de la llingua.
    • Nivel d’escelencia, acutáu p’aquelles entidaes que demuestren una implicación destacada y sostenida nel tiempu.

    La marca va poder solicitase tol añu, pero la so concesión va formalizase nun actu institucional anual. Amás, va habilitase un espaciu específicu na web del Principáu y va publicase un catálogu d’empreses reconocíes.

    Alfaya va entrar en funcionamientu esta seronda, en collaboración cola asociación mentada, que mostró un compromisu firme cola iniciativa. Con esta midida, el Gobiernu d’Asturies avanza nel so apueste pola normalización llingüística y por una comunidá que valora y promueve la so diversidá cultural tamién dende l’ámbitu empresarial.

  • La mina de La Camocha, declarada Lugar de Memoria Democrática

    La mina de La Camocha, declarada Lugar de Memoria Democrática

    La mina de La Camocha declaróse como llugar de Memoria democrática pol so destacáu papel mientres la llucha obrera. Asina lo anunciaron el conseyeru d’Ordenación del Territoriu, Ovidio Zapico, y el secretariu d’Estáu de Memoria Democrática, Fernando Martínez López, mientres una visita a esti enclave, consideráu’l mitu fundacional” de les Comisiones Obreres (CCOO) n’España y apuntaron que yá s’empecipió l’espediente pa esta declaración.

    Zapico recordó que va un añu, mientres una xunta col secretariu d’Estáu, propúnxo-y incluyir la mina nel marcu de la Llei Estatal de Memoria pol so enorme valor simbólicu y hestóricu. “Ye un espaciu bien significativu, clave na hestoria del movimientu obreru, na resistencia contra la dictadura y nes lluches polos derechos llaborales y sociales. Foi, amás, el xerme de lo que güei ye’l sindicatu Comisiones Obreres”, afirmó.

    El conseyeru estimó la receptividá de Martínez López y sorrayó’l compromisu del Gobiernu asturianu cola memoria democrática: “Frente a otros gobiernos que retayen derechos y deroguen lleis de memoria, nós defendemos que recordar nun ye mirar al pasáu, sinón construyir un futuru con esperanza y con memoria”.

    El Boletín Oficial del Estáu (BOE) yá recueye l’entamu del trámite, reconociendo a La Camocha como escenariu de “fechos de singular relevancia pola so significación histórica, simbólica o pola so repercusión na memoria colectiva”. Destácase la so vinculación cola llucha polos derechos y llibertaes, la memoria de les muyeres, y la represión sufierta mientres la dictadura, la guerra, l’esiliu y la resistencia al golpe d’Estáu de 1936.

    Fernando Martínez López esplicó que, al empecipiase l’espediente, La Camocha yá figura nel censu oficial de llugares de memoria. Sorrayó qu’esta reconocencia nun se llimita a la Guerra Civil, sinón que toma tamién les fuelgues, reivindicaciones y la creación d’una comisión obrera que rompió col sindicatu vertical franquista, axustando de forma autónoma’l resolvimientu de conflictos llaborales.

    “La reconocencia de la memoria ye esencial, especialmente nun contestu de retrocesu y negacionismu. Falar de memoria ye falar de democracia. Nun puede haber democracia ensin memoria”, concluyó’l secretariu d’Estáu.

  • Educación confirma que la mayoría de los directores que presentaren la so dimisión van siguir nos sos cargos

    Educación confirma que la mayoría de los directores que presentaren la so dimisión van siguir nos sos cargos

    La conseyera d’Educación del Principáu, Eva Ledo, informó güei a les direcciones de los centros educativos que la gran mayoría de los y les directores que presentaron la so dimisión el pasáu 6 de xunu decidieron siguir nos sos puestos. En total, 86 de los 91 firmantes comunicaron la so decisión de siguir, tres el pidimientu espresu de la conseyera nuna carta unviada la selmana pasada. Los cinco restantes cesen por motivos diversos, como’l fin del so mandatu, el relevu del equipu directivu o’l treslláu a otru centru. Ledo agradeció públicamente esta decisión y l’enfotu depositáu na so xestión.

    Eva Ledo aprovechó estes xuntes pa presentase formalmente primero que remate’l cursu escolar. Sorrayó que’l profesoráu va ser una prioridá nel so mandatu y garantizó un acompañamientu constante per parte de la Conseyería. Amás, animó a los equipos directivos a comunicar cualquier incidencia o propuesta de meyora nel día a día, más allá de los compromisos yá recoyíos nel recién alcuerdu colos sindicatos, que contempla una inversión de 45 millones d’euros hasta’l final de la llexislatura.

    Per otru llau, la conseyera confirmó que los comedores escolares xestionaos pol gobiernu van estendese tamién a los meses de setiembre y xunu, tal como yá anunciara al comité de direcciones d’Infantil y Primaria. Anguaño, ta buscándose la meyor forma de coordinar tolos servicios implicaos, y esta selmana unvióse un corréu a los centros afectaos pa que faciliten los sos horarios.

    Na vez d’entrugues, Ledo tomó nota de diverses demandes plantegaes poles direcciones, ente elles: l’atención a la diversidá, la implantación del programa contra l’acosu escolar «Tutoría Ente Iguales» (TEI), y cuestiones alministratives.

  • El Premiu Alfonso Iglesias de cómic reconoz la obra Mil Venecies, d’Agustín Cernuda del Río y Alejandro Castrillo Cernuda

    El Premiu Alfonso Iglesias de cómic reconoz la obra Mil Venecies, d’Agustín Cernuda del Río y Alejandro Castrillo Cernuda

    La decimoséptima edición del Premiu Alfonso Iglesias de cómic n’asturianu reconoció’l trabayu a dúu d’Agustín Cernuda del Río (Mieres, 1970) y Alejandro Castrillo Cernuda (Mieres, 1987), autores de la novela gráfica Mil Venecies, que narra la historia vital emocionante d’una muyer asturiana y, al tiempu, dexa retratar una parte importante de los fenómenos sociales que marcaron el sieglu xx na nuestra comunidá.

    El xuráu d’esta edición tuvo presidíu pol director xeneral d’Acción Cultural y Normalización Llingüística, Antón García, y integráu pol filólogu Marcos Martínez, la ilustradora Mónica García y l’escritor Daniel Castaño, ganador na última convocatoria del premiu. Ente los valores de la obra premiada, los miembros del xuráu destacaron nel acta «la naturalidá y riqueza del llinguaxe, la fluidez de los diálogos, l’interés de les metáfores visuales de les que se val y el tratamientu gráficu de lo onírico y lo reflexivo».

    El Premiu Alfonso Iglesias, convocáu pola Conseyería de Cultura, Política Llingüística y Deporte, ta dotáu con 6.000 euros y la publicación de la obra ganadora. Podíen presentase obres inédites y non premiaes n’otros concursos, d’estilu, tratamientu y tema llibre, pudiendo adoptar el desenvolvimientu d’una historia única o un conxuntu d’histories, con una estensión mínima de cincuenta páxines.

    Agustín Cernuda del Río, Guti del Río, ye doctor inxenieru n’informática y trabaya anguaño como xefe de sección d’Informática na Xunta Xeneral del Principáu d’Asturies. Músicu de jazz y ganador de dalgún premiu de narraciones curties, Mil Venecies ye’l so primer cómic llargu.

    Alejandro Castrillo Cernuda ye llicenciáu n’Historia del Arte pola Universidá d’Uviéu y espertu en Visualización y Illuminación 3D. Director de producción na empresa de marketing Neozink, y director creativu d’empreses dedicaes a la producción de conteníos museográficos, exerció tamién como ilustrador d’esposiciones y catálogos espositivos vinculaos al patrimoniu asturianu.

  • Valnalón distingue una propuesta de güertu ecolóxicu col premiu al Meyor Proyectu Empresarial

    Valnalón distingue una propuesta de güertu ecolóxicu col premiu al Meyor Proyectu Empresarial

    Un proyectu pa desenvolver un güertu ecolóxicu foi’l galardonáu col Premiu a la Meyor Propuesta Empresarial del semilleru de proyectos de Valnalón. El conseyeru de Ciencia, Industria y Empléu, Borja Sánchez, apurrió les distinciones d’esta XXIII edición, na que destacó’l papel crucial del emprendimientu nel crecimientu del texíu económicu.

    Nel certame participaron 152 proyectos, de los que nueve llegaron a la final. Los escoyíos centráronse en sectores como agricultura, moda y complementos, turismu alternativu, arte, repostería y eventos audiovisuales.

    El premiu al Meyor Proyectu Empresarial recayó en Manuel López, por Ecohuerta Vital, una iniciativa destacada pol xuráu pola so viabilidá económica, el so raigañu col ámbitu rural y el compromisu col territoriu. El galardón al Afitamientu Empresarial, qu’estrema a les empreses nel crecimientu de los sos proyectos, foi pa Yolanda Basante, por Novalreeves, una iniciativa de diseñu de moda destacáu pola so creatividá y capacidá pa reorientar la so actividá nuevos nichos de mercáu.

    La reconocencia a la Empresa Comprometida con Valnalón foi pa Bango Racing Cars, mientres que’l de la Meyor Presentación de Proyectu Empresarial concedióse a The Paper Conservation Lab, un taller de restauración y caltenimientu d’obres d’arte en papel desenvueltu por Alicia García.

  • Les compañíes É Vero Teatro, Covenant Producciones, Nun Tris y Higiénico Papel, finalistes del IX Premiu Nel Amaro de Teatru Profesional en llingua asturiana

    Les compañíes É Vero Teatro, Covenant Producciones, Nun Tris y Higiénico Papel, finalistes del IX Premiu Nel Amaro de Teatru Profesional en llingua asturiana

    La novena edición del Premiu Nel Amaro de Teatru Profesional n’asturianu convocáu pola Conseyería de Cultura, Política Llingüística y Deporte yá tien finalistes. Les obres presentaes poles compañíes É Vero Teatro, Covenant Producciones, Nun Tris y Higiénico Papel son les cuatro que pasaron a la final d’esti gallardón y, polo tanto, les que se van exhibir los cuatro primeros vienres d’ochobre nel Teatru Filarmónica d’Uviéu, con entrada llibre y gratuita hasta enllenar aforu.

    Esti gallardón, con una dotación económica de 6.000 euros, tien como oxetivu ayudar a la profesionalización de la industria cultural asturiana, sobre manera del sector de les artes escéniques, premiando la meyor obra en llingua asturiana o eonaviegu d’alcuerdu con criterios de calidá escénica, lliteraria y llingüística.

    El xuráu encargáu de valorar los montaxes presentaos y facer la selección de los cuatro finalistes d’esta edición tuvo presidíu pol director xeneral d’Acción Cultural y Normalización Llingüística, Antón García. Como vocales, participaron l’actriz y filóloga María Cotiello, la profesora y autora teatral Azucena Álvarez, l’escritor y profesor Xuan Santori, l’escritor y director Sergio Buelga, y l’actriz y crítica teatral Eva Vallines.

    Les propuestes de les compañíes asturianes finalistes nesta edición del Premio Nel Amaro son estes:

    • Al rodiu l’horru, d’É Vero Teatro.
    • Tía Miseria, de Covenant Producciones.
    • Vuelu d’andarines / Viaxe d’andolías, de Producciones Nun Tris.
    • 1001. Una odisea nel desiertu, d’Higiénico Papel Teatro.

    Depués d’esta primer fase, va facese’l IX Festival Nel Amaro de Teatru Profesional en Llingua Asturiana, que se va celebrar nel Teatru Filarmónica d’Uviéu tolos vienres del mes d’ochobre. Amás de les cuatro pieces teatrales finalistes, súmase a esti festival la obra ganadora na edición del 2024, Perendi, de La Compañía del Alba.

    Nel festival mentáu va decidise la obra teatral vencedora que, amás de la dotación económica del premiu, va integrase nel circuitu Autores nel Camín del programa Asturies, Cultura en Rede.

    El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n’asturianu. Nel Amaro foi amás l’autor al que se dedicó la edición de la Selmana de les Lletres Asturianes nel 2021.

  • El PSOE denuncia la degradación na calidá de vida en Cimavilla pol turismu

    El PSOE denuncia la degradación na calidá de vida en Cimavilla pol turismu

    El futuru conceyal del Grupu Municipal Socialista nel Conceyu de Xixón, Rodrigo Sánchez Fernández, que va tomar posesión nel próximu Plenu tres la salida de Floro como conceyala, presentó esta mañana en rueda de prensa una iniciativa al traviés de la cual va pidir que se garantice la convivencia nel barriu con midíes concretes. De primeres, anunció que, nel testu que va presentar na próxima sesión plenaria, va esixir al gobiernu que dea marcha tras na decisión d’instalar el «Paséu Gastro» na cai Claudio Alvargonzález mientres la Selmana Grande. “El modelu turísticu y d’ociu d’esti gobiernu nun puede siguir degradando la calidá de vida de quien vivimos en Cimavilla. Dende que la derecha llegó al poder, priorizó la privatización del espaciu públicu y el negociu sobre los intereses vecinales. Dende la mesma Asociación de Vecinos de Cimavilla, yá amosaron, en numberoses ocasiones, el refugu pola sobresaturación del barriu, turistificación, xentrificación, problemes de convivencia ciudadana por cuenta d’un ociu intensivu ensin control, y too esto amontáu entá ye más pel branu; ye más, l’asociación vecinal Gigia empecipió una campaña pa frenar la instalación del Paséu Gastro. Somos un barriu que soporta gran llegada de turismu y lo que consiguen agora sumando más ufiertes na zona ye atayar el descansu, enzancar la circulación y l’accesu y salida del barriu, y aumentar los problemes de seguridá y salobridá”, asegura Sánchez Fernández.

    Sánchez Fernández, que tuvo acompañáu de la vocera del Grupu Municipal Socialista, Carmen Eva Pérez Ordieres na rueda de prensa, anunció qu’amás que va pidir l’ampliación de los servicios de seguridá ciudadana mientres les nueches de les fines de selmana y festivos o díes nos que se prevea una medría de la presencia de persones nel barriu. “Nin Foru, nin PP, nin el tránsfuga de Vox que ta al mandu de festexos, tienen presentes les necesidaes d’un barriu nel que munches vegaes sentimos que ta enchíu. Les quexes vecinales son constantes asina que ye’l momentu d’actuar ya inclusive d’estudiar, al pie de los representantes vecinales, la posibilidá de tomar otres midíes que puedan contribuyir al cumplimientu de la ordenanza de convivencia y a la meyora de les condiciones de habitabilidad del barriu. Lo que menos precisamos ye tizar de los conflictos yá esistentes”, añede.

    Según el futuru edil, “ye necesariu diálogu y collaboración cola asociación vecinal frente a la improvisación y la falta de planificación y de consensu que solo nos xenera caos. Non pueden siguise tomando decisiones en Cimavilla ensin Cimavilla, tamos equí pa conocer y solucionar los problemes de los nuesos vecinos y vecines, non pa crealos”.

  • Rematen les obres del la entrada a Xixón pel túnel d’El Llano

    Rematen les obres del la entrada a Xixón pel túnel d’El Llano

    El Gobiernu d’Asturies concluyó los trabayos de renovación y meyora de la seguridá vial del túnel del Llanu en Xixón. Les obres de sustitución de los revestimientos del pasu supunxeron una inversión de 198.245 euros ya incluyeron amás la meyora y refuerzu de los elementos de seguridá vial na redoma del túnel.

    L’actuación supunxo l’arreglu de los paneles de revestimientu estropiaos nel falsu túnel procediendo primeramente al desmontaxe de tolos paneles y perfiles de suxeción estropiaos, pa reponelos por elementos nuevos. Tamién se desmontaron toos aquellos paneles que s’atopaben en bon estáu, pero que foi necesariu retirar pa la reposición de los perfiles de suxeción que taben deformaos. A lo último, fíxose una llimpieza de la totalidá del revestimientu d’aceru vitrificáu de dicha estructura.

    Amás, encaróse l’allugamientu de diversa señalización vertical y paneles indicadores y añediéronse elementos d’abalizamientu col fin d’ameyorar la seguridá vial del tramu. Tamién s’instalaron bandes tresversales d’alerta col fin de consiguir que los vehículos amenorguen la velocidá enantes de llegar a la curva esistente nel pasu inferior. Finalmente anovóse la señalización horizontal, tanto na redolada del pasu inferior como nel vial d’accesu dende l’AS-I.