Xixón al día

Autor: xixonaldia

  • Kneecap, la banda irlandesa que canta en gaélicu, yá tien la so película en Filmin

    Kneecap, la banda irlandesa que canta en gaélicu, yá tien la so película en Filmin

    N’Irlanda hai 80.000 falantes d’irlandés, 6.000 viven nel norte y trés d’ellos van poner too pates arriba cuando formen un tríu de rap llamáu Kneecap. Anárquicos, xabaces y dispuestos a too pa salvar la so llingua materna. Asina ye Kneecap, la película basada na hestoria de la banda y que, dende güei, ta disponible na plataforma Filmin.

    La película irlandesa que consiguió asitiase na llista de 15 finalistes a dos Premios Óscar (Meyor Película Internacional y Meyor Cantar Orixinal). Trata de la hestoria real sobre cómo un tríu de raperos anárquicos de Belfast (Irlanda) foi quien a convertise nun fenómenu de mases y nel máximu referente del movimientu civil por salvar la llingua irlandesa. La película, un biopic cargáu d’humor, sexu y drogues, ta interpretada polos integrantes reales de la banda –Mo Chara, Móglaí Bap y DJ Próvaí–, acompañaos por Michael Fassbender (“Shame”) na piel d’un carismáticu padre convertíu en mártir políticu. Tuvo’l so premiere española nel Atlàntida Mallorca Filme Fest y el so estrenu en cines el pasáu mes de setiembre distribuyida por Filmin.

    Dirixida y escrita por Rich Peppiatt, d’ascendencia irlandesa, “Kneecap” narra en primer persona l’inesperáu saltu a la fama d’esta banda formada por dos amigos de la infancia y camellos de clase obrera (Naoise Ó Cairealláin y Liam Óg Ó Hannaidh) que faen equipu con un profesor de música (JJ Ó Dochartaigh) pa formar un grupu que rapea en gaélicu irlandés. El primer alcuentru ente estos trés figures tien llugar na sala d’interrogatorios de la cárcel tres l’arrestu por desobediencia a l’autoridá de Naoise, quien se niega a falar n’inglés y la policía tien de recurrir a JJ como intérprete, el so trabayu secundariu. Ye entós cuando JJ llee nel diariu personal de Naoise grandes rimes cargaes de discursu políticu y fragmentos de cantares ensin producir, y da empiezu la so irreverente y singular hestoria.

    Non solo de cuestiones polítiques falen les sos lletres, tamién de drogues y de violencia nun tonu que celebra’l conceptu “Thug Life”. Ye según el grupu rebelase énte’l poder establecíu y conservador del sistema y ufiertar representación a los mozos comprometíos col idioma irlandés que quieren reivindicar el so heriedu cultural nacional.

    La película tuvo’l so estrenu mundial nel Festival de Sundance onde, amás de ser la primer película en llingua irlandesa proyectada nel festival, llogró’l Premiu del Públicu. Ellí recoyó escelentes reseñes de la crítica especializada, como la de Screen Daily que diz asina: “Podría dicise que Kneecap ye la bomba y encaxaría a la perfección col tonu de la película. (…) Si los bad trips de ketamina, les chancies sobre terroristes y les nalgues pintaes con ‘Brits Out’ (Británicos Fuera) son lo tuyo, Kneecap ye la película perfecta pa ti”. Coles mesmes, los medios destacaron los sobresalientes actuaciones de los intérpretes y comparóse a la película con títulos como “8 Milles” o “Trainspotting”, predestinándola a convertise nuna película de cultu. A lo último, apocayá trunfó en Galway Filme Fleadh, el festival de cine de referencia n’Irlanda, consiguiendo los trés máximos galardones: a la Meyor Película, a la Meyor Película n’Irlandés y el Premiu del Públicu, un récord nunca antes llográu nos 36 años de percorríu del festival.

    A lo último, premióse a Kneecap con 7 premios nos BIFA, premios de referencia de cine pa los británicos, ente ellos el galardon a meyor película. Na entrega del troféu, los integrantes de la banda amosáronse arguyosos de que la meyor película británica nun fuera británica, sinón irlandesa.

  • Moriyón reconoz cobrar un sobresueldu de Foro

    Moriyón reconoz cobrar un sobresueldu de Foro

    El xuiciu contra Francisco Álvarez-Cascos entamáu poles acusaciones de los sos ex compañeros de partíu ta dexando al descubiertu datos que nun yeren conocíos hasta agora.

    L’acaldesa de Xixón, Carmen Moriyón, que testificó güei contra Cascos nel procesu, reconoz que na actualidá, al igual que facía’l so predecesor, recibe una «asignación» del partíu, sobresueldu que suma a los sos sueldos como alcaldesa y doctora.

    Moriyón, ye con 64.945,02 euros brutos añales, la rexidoda que percibe’l sueldu más altu de los 78 conceyos asturianos. Con una lliberación del 90% caltién el so sueldu como ciruxana, polo que suma trés nómines mensuales.

     

     

  • Roqueñí pon a Bayer d’exemplu de compromisu col territoriu y cola descarbonización de la economía

    Roqueñí pon a Bayer d’exemplu de compromisu col territoriu y cola descarbonización de la economía

    La conseyera de Transición Ecolóxica, Industria y Desenvolvimientu Económicu, Nieves Roqueñí, punxo a Bayer como exemplu d’empresa comprometida col territoriu y col procesu de descarbonización de la economía.

    Roqueñí participó na tarde d’ayeri nel primer actu de conmemoración del 125 aniversariu de la presencia de la multinacional alemana n’España, nel que venció un cuadru del pintor Eduardo Úrculo a la pinacoteca municipal de Llangréu. Na so intervención, punxo en valor el compromisu de Bayer con Lada y con Asturies a lo llargo de más d’ochenta años y el so apueste firme pola meyora de la competividá de la factoría y la incorporación de procesos d’amenorgamientu de la buelga de carbonu.

    Tamién resaltó que la compañía llogró fai unes selmanes una certificación que valida la so metodoloxía pa la midida de la Buelga de Carbonu de Productu y la puesta en marcha, conxuntamente con Iberdrola, d’un proyectu de descarbonización de la fábrica de Lada nel que va invertir cerca de 18 millones y que recibió ayudes del Perte ERHA d’enerxíes anovables, hidróxenu y almacenamientu.

    «Soi consciente de que cualquier procesu de cambéu intensu como’l que tamos impulsando xenera duldes ya incertidumes. Delles empreses aplazaron dellos proyectos, pero otres siguen adelantre coles sos iniciatives de descarbonización y d’amenorgamientu d’emisiones contaminantes, un camín, a éstes inevitable. Y un claru exemplu tener en Bayer, que nos últimos años amenorgó un 55% les emisiones na so factoría de Lada», concluyó la conseyera.

  • El PSOE denuncia’l pelotazu urbanísticu del solar de Cerámica Xixonesa

    El PSOE denuncia’l pelotazu urbanísticu del solar de Cerámica Xixonesa

    El PSOE xixonés denuncia’l pelotazu urbanísticu que pretende llevase a cabu nel desenvolvimientu del ámbitu de la Carretera de Ciares, el recintu de l’antigua Cerámica Xixonesa. Los socialistes presentaron allegamientos al trámite d’evaluación ambiental dientro del cambéu puntual del Plan Xeneral d’Ordenación que se ta tramitando a instancies del Conceyu de Xixón. Apunten que’l cambéu respuende namás a intereses económicos particulares y non públicos y tien impactos negativos medioambientalmente. “Lo que quieren facer Foru, Moriyón y los sos socios ye, nin más nin menos, qu’un mini-Benidorm en Ciares a la entrada de la ciudá, con torres de 14 plantes que van tener un impactu visual enorme, qu’estrocen por completu la fachada de la carretera de Ciares y la uniformidá de la redolada.

    El cambéu de la dimensión de los edificios dobla los altores previstos nel Plan Xeneral”, esplicó’l conceyal Tino Vaqueru en rueda de prensa esti mediudía de la qu’añede que “nunu de los mayores parques urbanos qu’esisten na nuesa comunidá autónoma, ye más importante consiguir unos pocos m2 más de zones verdes (insignificantes porcentualmente nel conxuntu del parque) que’l brutal impactu visual y cambéu de modelu edificatoriu que va suponer la edificación de bloques de 14 plantes nuna amplia redolada abierta qu’apenes supera les 5 plantes. Fálennos de ‘modelu de ciudá compacta’ como xustificación d’esta intervención cuando tamos falando d’una zona dafechu consolidada y urbanizada de la contorna de la ciudá na qu’esti desenvolvimientu urbanísticu ye l’únicu que falta por executase y convertiríase nel únicu que se materializara so un modelu tan especulativu”.

    Los socialistes afirmen que la presencia d’estes torres de cercade 40 metros va estrozar por completu cualesquier idea d’integración y transición de les edificaciones na redolada. Enfeen que lo que traten ye abaratar la construcción, facilitar un interés particular frente al interés públicu. “Amplíase’l númberu de viviendes significativamente, de forma absolutamente especulativa, ente otres coses porque s’amplíen les parceles del ámbitu y se recalifica dalguna finca particular que nun apurre nada al ámbitu tal que se plantega pero que multiplica casi por trés la so edificabilidá”, aportuna’l conceyal.

    Con too ello, el PSOE pide esplicaciones urxentes a l’alcaldesa sobre esti cambéu que va beneficiar, apunten, a dellos promotores privaos. “Esa ye la llinia que lleva l’alcaldesa, gobernar pa beneficiu d’unos pocos. Ye importante que nun nos dexemos engañar, que Moriyón nun venga agora faciendo trampes porque esto nun va suponer más viviendes a precios algamadizos, esto va suponer facilitar les coses a les constructores por qu’aumenten los sos beneficios a costa del interés xeneral de la ciudá, una nueva amuesa de pa quién gobierna Moriyón. L’espaciu públicu de Xixón tendría de ser xenerar una ciudá vivible y algamadiza pa toes y toos, non pal pelotazu urbanísticu de diseñu pa unos pocos”, sollerta Vaqueru.

    Pal conceyal socialista, la urbanización de la cortil de l’antigua Cerámica Xixonesa tien más solombres que lluces y l’alcaldesa tien d’esclariales de forma inmediata. Amás, con esta nueva construcción va aumentar el tráficu na zona en más de 800 vehículos de los nuevos residentes, amás de la circulación adicional que se va a xenerar, ensin prever viales de serviciu que nun colapsen la rotonda de Ciares y la del Llano, una cuestión que dexa ensin resolver. Coles mesmes, nel cambéu tampoco se garantiza la cesión de suelu yá urbanizáu pa la dotación d’aparcamientu en superficie qu’esixe la normativa urbanística.

    “Llamentamos que l’alcaldesa siga viendo na vivienda non la necesidá habitacional de los sos ciudadanos, sinón un elementu especulativu col que volver al urbanismu d’antaño que tantos problemes xeneró-y a la ciudá. La señora Moriyón convierte a Xixón nuna ciudá en venta pal meyor postor. Atristáyanos que s’actúe asina col interés de tolos ciudadanos y por eso y como ye la nuesa obligación y la nuesa responsabilidá pa colos vecinos y vecines d’esta ciudá, vamos oponenos a esti desastre urbanísticu que quier perpetase”, conclúi Tino Vaquero.

  • El reglamentu que va permitir suspender las autorizaciones de parques de baterías va aprobase esti mes

    El reglamentu que va permitir suspender las autorizaciones de parques de baterías va aprobase esti mes

    El director xeneral d’Ordenación del Territoriu, Ignacio Ruiz Latierro, anunció esta mañana que la so conseyería yá acabó’l cambéu del decretu 63/2022, de 21 d’ochobre, pol que s’aprueba’l reglamentu d’ordenación del territoriu y urbanismu d’Asturies, y ta a la espera de la so aprobación per parte del Conseyu de Gobiernu. Esti cambéu va dexar suspender “de forma inmediata” cualquier autorización pa instalar parques de bateríes en suelu non urbanizable.

    “El decretu ta peracabáu y pendiente de l’aprobación per parte del Conseyu de Gobiernu, que va ser presumiblemente nunos díes”, afirmó Ruiz Latierro, quien precisó que, a falta de conocer una fecha esacta, les previsiones son que’l trámite va llevase a cabu “esti mes en tou casu”. “De siguío, vamos dar pasu a un periodu d’esposición pública y dempués va dar en lo que ye la suspensión puramente y a la orde de redacción de les directrices pa la regulación d’esti tipu d’instalaciones”, indicó.

    El director esplicó qu’esti trámite consiste nel cambéu del artículu 51 del citáu decretu, “que va dexar que se realice una suspensión inmediata como trámite previu a cualquier aprobación inicial”, daqué qu’hasta agora nun yera posible.

    Ruiz Latierro manifestóse nestos términos dempués d’axuntase na see de la conseyería con representantes de la plataforma Stop Parques de Bateríes, a los que quixo aselar col treslláu d’esta información.

    Amás, aseguró que’l procesu posterior pa la redacción de les directrices que van establecer los criterios xenerales pa la implantación ordenada d’estos proyectos va tener previsiblemente un plazu muncho más dilatáu. “Primero va haber una fase d’información inicial, dempués una esposición pública y finalmente un trámite d’aprobación definitiva, lo que puede llevanos fácilmente ente 18 y 24 meses”.

    Según Ruiz Latierro, una vegada que’l cambéu del reglamentu reciba nos próximos díes el vistu bonu del Conseyu de Gobiernu y remate el periodu d’esposición pública, el siguiente pasu va ser alcordar, tamién per parte del Conseyu de Gobiernu, la suspensión de les autorizaciones y ordenar la redacción de les directrices.

    El cambéu del artículu 51 respuende al gran númberu de proyectos presentaos n’Asturies pa instalar puntos de conexón d’almacenamientu d’enerxía eléctrica. La norma pretende suspender les autorizaciones d’esti tipu d’instalaciones nel suelu non urbanizable p’asegurar la preservación del paisaxe, el patrimoniu natural y el modelu poblacional de los núcleos tremaos pola nuesa comunidá.

    El director xeneral tamién afirmó que, nestos momentos, “nun hai nenguna autorización de parques de bateríes definitiva”. Ruiz Latierro calcula que’l cambéu va afectar a un mediu centenar de les más de 170 autorizaciones solicitaes. “Namás a aquelles que tán en suelu non urbanizable y, poro, en suelu non industrial”, precisó.

  • El centru de salú nuevu de Sotrondio va rematase pa esti branu

    El centru de salú nuevu de Sotrondio va rematase pa esti branu

    La obra del nuevu centru de salú de Sotrondio (Samartín del Rei Aurelio) va rematar esti branu y, de siguío, el Gobiernu d’Asturies va dar en fornilo. El viceconseyeru de Política Sanitaria, Pablo García, visitó güei los trabayos de construcción del futuru equipamientu, que va recuperar la fachada del antiguu Teatru Virginia.

    Nestos momentos, l’inmueble tien gran parte de les sos parés esteriores acabaes, polo que yá se ta trabayando na distribución de los espacios interiores y l’acometida de les instalaciones eléctriques.

    El nuevu centru de salú ta presupuestáu en más de cuatro millones y allúgase n’una parcela cercana a la plaza del Conceyu. Va Disponer de 2.378 metros cuadraos de superficie útil que se van distribuyir en trés llantes: baxu y dos pisos. Amás, va dexar ampliar servicios asistenciales con nueves unidaes d’atención a la muyer, salú bucodental, fisioterapia y urxencies.

  • El Gobiernu d’Asturies aspira a superar los 300.000 usuarios de tarxeta CONECTA cola integración de la gratuidá nos trenes

    El Gobiernu d’Asturies aspira a superar los 300.000 usuarios de tarxeta CONECTA cola integración de la gratuidá nos trenes

    El Gobiernu d’Asturies aspira a superar la barrera de los 300.000 usuarios de CONECTA en 2025, una vegada que la tarxeta integre nes sos prestaciones la gratuidá nes cercaníes ferroviaries, qu’Asturies tien reconocida hasta 2026 en virtú de los Alcuerdos de Castellana. El Consorciu de Tresportes d’Asturies y Renfe trabayen pa peracabar una solución tecnolóxica que dexe que’l títulu asturianu de tresporte reconoza esa gratuidá al lleela nos tornos de les estaciones y operadores ferroviarios.

    Prevese que la integración de les cercaníes suponga una medría de viaxeros del serviciu de curtia distancia que vienen sacando cada cuatrimestre l’abonu gratuitu de Renfe. Los últimos datos del operador ferroviariu recueyen la emisión de más de 55.000 abonos n’Asturies pal últimu cuatrimestre de 2024.

    La integración de la gratuidá de les cercaníes va convertir a la tarxeta CONECTA, qu’usen hasta’l momentu más de 260.000 persones, nun billete únicu pa tolos medios de tresporte públicu de la comunidá, lo que va reforzar la intermodalidá y va facilitar la movilidá pa más ciudadanos.

    El Gobiernu d’Asturies destina más de 78 millones nel presupuestu de 2025 pa impulsar una movilidá más sostenible y favorecer la meyor conectividad de la hestoria d’Asturies, tantu col esterior como dientro del territoriu. Asina, l’Executivu refuerza’l so enfotu n’ufiertar un tresporte públicu accesible y calidable.

    Los datos reflexen que la crecedera interañal del usu del tresporte públicu supera’l 12% y triplica la media nacional. Amás, realizáronse más de 40 millones de viaxes con CONECTA en pocu más de dos años. Un ésitu que se debe tamién a iniciatives como les danzaderes veraniegues a espacios naturales protexíos, que tresportaron a más de 108.000 persones en trés meses, o los servicios pa conectar les ales d’Asturies cola alta velocidá, con más de 13.000 usuarios.

    CTA tamién trabaya viviegamente por que Xixón adopte CONECTA como títulu únicu de tresporte y integrar cola Tarxeta Ciudadana, tal como yá asocede n’Uviéu y Avilés. Esto va dexar a los usuarios esfrutar de les ventayes combinaes de dambes tarxetes y fomentar una mayor conectividad nel ámbitu urbanu.

    L’apueste pola movilidá sostenible ye tresversal nes polítiques del Gobiernu d’Asturies y tamién afecta a les infraestructures. El Principáu movilizó yá’l 87% de los casi 20,5 millones de fondos europeos procedentes del Plan de Tresformamientu, Recuperación y Resiliencia pa fomentar meyores de la movilidá nes redolaes metropolitanes. Les actuaciones desenvueltes n’Uviéu (8,2 millones), Xixón (4,9 millones), Avilés (3,2 millones) y Siero (1,8 millones) suponen un total de 17,8 millones destinaos a ameyorar el serviciu de tresporte públicu pa los usuarios, xenerando espacios más cómodos y accesibles.

  • Asturies pieslla 2024 con 4.192 persones menos en paru y 7.009 más con trabayu

    Asturies pieslla 2024 con 4.192 persones menos en paru y 7.009 más con trabayu

    Asturies cerró 2024 con 4.192 paraos menos y 7.009 persones más trabayando en comparanza l’añu anterior. Estos resultaos asitien a Asturies como la quinta comunidá con mayor descensu del paru.

    A finales d’avientu, el Serviciu Públicu d’Empléu asturianu tenía rexistraos a 53.180 demandantes d’un trabayu, un 7,31% menos que na mesma fecha del añu anterior. Esta cantidá ye la más baxa pa un mes d’avientu dende 2007 y la tercera inferior de los postreros 20 años.

    Nel conxuntu d’España, el paru menguó un 5,4%, dos puntos menos que n’Asturies. Solo Estremadura, Andalucía, Cantabria y Galicia rexistraron menores númberos qu’Asturies.

    Esta dinámica positiva del mercáu llaboral empezó n’abril de 2021, en superando les consecuencies de la pandemia. De magar, Asturies atropa 45 meses consecutivos de descensos interañales del paru y aumentos nes afiliaciones a la Seguridá Social.

    En 2024, la cayida del paru foi xeneralizada ente dambos sexos, con una intensidá similar ente homes y muyeres, en tolos grupos d’edá, especialmente ente los 25 y 44 años, y en tolos sectores d’actividá. Destaquen los amenorgamientos nel sector primariu (-13,86%) y la construcción (-9,73%). Sicasí, n’avientu, foi’l sector servicios el que lideró l’amenorgamientu del desempléu (-7,48%) gracies a la campaña navidiega nel comerciu y la hostelería, que tamién encabezaron la creación d’empléu.

    En cuanto al empléu, los númberos tamién son positivos. Asturies remató avientu con una media de 387.082 afiliaos a la Seguridá Social, un 1,8% más que va un añu y la cifra más alta pa un avientu dende 2008.

    La directora xerente del Serviciu Públicu d’Empléu, Begoña López, destacó’l sosteníu enclín positivu del empléu empecipiada fai casi cuatro años. «El nuesu mercáu de trabayu nun ye ayenu a la estacionalidad de delles actividaes económiques, pero pa entender la nuesa situación ye más interesante mirar los datos con perspectiva. Dende l’empiezu d’esta dinámica d’amenorgamientu del paru en 2021, tenemos 30.000 persones desemplegaes menos», declaró.

    Amás, López indicó que la evolución del mercáu llaboral nun puede esplicase namá por motivos demográficos. «El repique de la tasa d’actividá indica qu’hai una mayor proporción de persones interesaes n’incorporase al mercáu llaboral. Tamos viendo crecer les cifres d’afiliación a la Seguridá Social, con barganal de 400.000 persones n’alta n’Asturies. Estos factores dexen concluyir que la cayida del paru nun s’esplica solo pol efectu demográficu», esplicó.

  • Abiertu’l plazu de matrícula de la Prueba de Conocencia

    Abiertu’l plazu de matrícula de la Prueba de Conocencia

    L’Academia de la Llingua Asturiana, sabiendo’l fondu interés de munches persones en llograr que se reconoza la so conocencia de la llingua, vien faciendo dos convocatories añales onde evaluala. Con ella, les persones qu’algamen un resultáu de «aptu/a» van poder certificar, según el sistema formativu de la institución, el nivel llingüísticu elemental d’asturianu.

    La primer convocatoriava ser el sábadu, 25 de xineru de 2024. Va facese un llamamientu a les 9.50 h y l’empiezu de la prueba va ser a les 10 h. Ta prevista una duración total de, aproximao, 2 hores.

     La matrícula ta abierta hasta’l 22 del mesmu mes al traviés d’esti enllaz: https://forms.office.com/e/VRq3Mqneyy

    • Van poder matriculase na prueba les persones que tengan como mínimo dieciséis años o vayan facelos nel añu 2025.
    • A les persones declaraes aptes, l’Academia dará-yos un documentu onde s’afite la conocencia nel nivel 1 o básicu según los calces siguíos por esta Institución.
    • Les persones que nun superen les pruebes del nivel 1 podrán presentase a nueves convocatories toles vegaes que quieran.
  • Asturies cubre toles solicitúes d’ayuda pa víctimes de violencia de xéneru

    Asturies cubre toles solicitúes d’ayuda pa víctimes de violencia de xéneru

    La Conseyería de Presidencia, Retu Demográficu, Igualdá y Turismu resolvió la convocatoria d’ayudes empobinaes a muyeres víctimes de violencia de xéneru , que va beneficiar a 593 muyeres y cuatro fíos y fíes. Asturies va cubrir per primer vegada toles solicitúes que cumplen los requisitos, daqué que nun fuera posible hasta agora por llimitaciones presupuestaries y pol modelu de concurrencia competitiva de la convocatoria.

    La clave d’esta meyora anicia na decisión d’establecer un creitu ampliable pa les ayudes, lo que dexó algamar anguaño un presupuestu récord de casi 1,8 millones, frente a los 1,03 de 2023. D’esta miente, les persones beneficiaries pasen de les 242 del exerciciu pasáu a les 597 d’anguaño.

    El derechu a estes ayudes, que consisten nun únicu pagu añal de 3.000 euros, tien una duración de trés años y supón un respaldu por que les víctimes en situación de vulnerabilidá económica puedan reconstruyir les sos vides.

    “El crecimientu progresivu del presupuestu dende 2019 reflexa’l compromisu sosteníu d’Asturies cola protección y el sofitu integral a les muyeres qu’enfrenten situaciones de violencia de xéneru, promoviendo la so independencia económica y bientar emocional: de los 300.000 euros iniciales algamóse la cifra de casi 1,8 millones en 2024. La partida multiplicóse por seis en cinco años porque la protección de les víctimes ye prioritaria pa esti gobiernu”, destacó la vicepresidenta del Principáu, Gimena Llamedo.

    Esta llinia llanzóse per primer vegada en 2019, con una dotación de 300.000 euros, y benefició a 135 víctimes.

    La convocatoria ta estremada en dos llinies:

    Llinia 1. Fíes y fíos de víctimes mortales por violencia de xéneru. Empobinada a menores de 18 años, güérfanos d’una muyer asturiana o empadronada n’Asturies nel momentu del asesinatu, mesmo que mozos d’hasta 26 años que s’atopen cursando estudios reglaos y cumplan colos requisitos establecíos. Dotada con 30.000 euros, cada persona beneficiaria va recibir 3.000.

    Llinia 2. Víctimes de violencia machista. Empobinada a muyeres víctimes de violencia de xéneru, mayores d’edá o legalmente desafiaes, que viven n’Asturies y atópense en situación de vulnerabilidá económica. P’aportar a l’ayuda, les solicitantes tienen de cuntar con un informe favorable d’un centru asesor de la muyer que respuenda por la necesidá de l’ayuda nel so procesu de recuperación y acreditar que nun conviven col agresor. Cada perceptora va recibir una ayuda añal de 3.000 euros.

    Nel presupuestu de 2025 dóblase l’ayuda a güérfanos y güérfanes, que pasa a ser de 6.000 euros añales, ya inclúyese per primer vegada a les víctimes de violencia vicaria.