Autor: xixonaldia

Les cinco primeres Escuelines abren el xueves viniente

El xueves viniente van inaugurase los cinco primeros centros de la rede pública y autonómica de Les Escuelines/As Escolías, en coincidencia col entamu del cursu escolar y la implantación de la matrícula gratuita pa tol alumnáu de 0 a 3 años. El presupuestu autonómicu destina esti exerciciu 31,15 millones pa poner en marcha esti proyectu educativu, pioneru n’España.

Les cinco escuelines/escolías que se van estrenar el xueves son Los Indianinos, de Colombres (Ribadeva); La Brañona, de Panes (Valle Baxu de Peñamellera); Los Esguinos, de Trevías (Valdés); As Paxarías, de Bual y Los Pequeníos, de Villayón. La escuelina rivadense dispón de dos unidaes y 31 places, ente que les otres cuatro consten d’una unidá y 18 places.

Por proximidá xeográfica, les escuelines de Panes y Colombres van compartir dirección, mesmo que les de Bual y Villayón. La de Trevías va tener la so propia directora. Eses trés places axudicáronse na primer convocatoria d’interinos, celebrada’l pasáu llunes.

Amás, la Dirección Xeneral d’Empléu Públicu contrató yá a doce técniques d’educación infantil (TEI) pa estos cinco centros. En Colombres van trabayar cuatro educadores, al disponer de dos unidaes, y nes otres cuatro escuelines/escolías, dos.

En cuanto al restu d’escuelines/escolías que componen la primer fase de la rede, van inaugurase mientres el cursu escolar 2024-2025, a midida que vaigan rematando les obres de construcción. Ello ye que la intención de la conseyería ye que mientres el mes d’ochobre puedan inaugurase otros trés: La Veiga, de Sotu (Sotu’l Barcu); La Cuevona d’Avín, de Benia (Onís), y Os Ferreiríos, de Santalla (Santalla d’Ozcos).

De los 31,15 millones reservaos pa Les Escuelines/As Escolías, 24,57 millones van destinase a sufragar la gratuidá total de la matrícula. D’esta forma cumple’l compromisu del presidente asturianu, Adrián Barbón, pa esti nuevu cursu escolar, ratificáu pola conseyera d’Educación, Lydia Espina. Los 6,68 millones restantes van emplegase en poner en marcha esta rede autonómica.

La gratuidá total remata un procesu de bonificación progresiva de les matrícules del primer ciclu d’Infantil en función de les rentes de les families. El presupuestu autonómicu de 2023 yá incluyía una partida de 21,3 millones pa eximir del pagu a families con rentes inferiores a los 42.000 euros, lo qu’estendió la gratuidá al 75% de los usuarios.

30/08/2024
Os Ozcos acueyen del 6 al 8 de setiembre los actos conmemorativos del Día d’Asturies
Los trés conceyos d’Os Ozcos (Vilanova, Santalla y Samartín d’Ozcos) van acoyer los díes 6, 7 y 8 de setiembre los actos qu’organiza’l Principáu pa celebrar el Día d’Asturies. La vicepresidenta Gimena Llamedo y el director xeneral de Retu Demográficu, Marcos Niño; acompañaos polos alcaldes anfitriones, presentaron esta mañana un programa completu d’actividaes gratuites que cada día se van facer nún de los conceyos, tituláu Reflejo de nuestra identidad/ Reflexu de la nuestra identidá/ Reflexo da nosa identidá.

Ye la primer vez que’l Día d’Asturies se celebra en trés conceyos, nesti casu los mesmos qu’en 2016 s’axuntaron pa llograr el premiu al Pueblu Exemplar d’Asturies. El xuráu destacó daquella’l so esfuerciu por combinar tradición y modernidá y por axuntar el caltenimientu de la naturaleza col desenvolvimientu económicu.

El movimientu asociativu va tener, como entós, un papel relevante. Dellos colectivos del occidente van encargase d’organizar actividaes na zona. El programa d’actos ye esti:
- Vilanova d’Ozcos (6 de setiembre). A les 17:00 hores va abrise’l mercáu tradicional y depués van desenvolvese la muestra cultural Nova Novena, nel Monesteriu de Santa María, cola instalación llumínica de Rubén González; l’espectáculu A Lluz. Orión e a nova lluz; el conciertu d’Ún de Grao; la vídeo instalación Sal férrea, d’Eloy Couceiro; el slam de poesía y cuntacuentos col Espaciu Cultural Santa Eufemia, y les actuaciones de la Orquesta Sinfónica del Principáu d’Asturies, de Nacasa Trío y de Ferla Megía. Esa mesma tarde, tamién se van ufiertar visites guiaes al Ecomuséu del Pan y a la Ferrería Mayor, en Santa Eufemia.
- Santalla d’Ozcos (7 de setiembre). Va haber mercáu tradicional y demostraciones de forxa, cestería, manexu del telar artesanu, batéu d’oru y arte floral. Tamién exhibiciones de deporte adaptáu, a cargu de la Federación de Deportes pa les Persones con Discapacidá Física del Principáu (Fedema), y xuegos tradicionales.
Pela mañana, van ufiertase vuelos cautivos en globu aerostáticu y teatru sobre ruedes a cargu de La Petite Caravane, d’Adrián Conde. A lo llargo de tola xornada van facese visites guiaes al mazu d’El Mazonovo y a la Casa Natal del Marqués de Sargadelos, en Ferreirela de Baxo. La música, yá pela tarde, van ponela Sintético Fantástico, la Banda de Gaites Marino Tapiega, Llan de Cubel y un diyei.
- Samartín d’Ozcos (8 de setiembre). Amás del mercáu tradicional va haber demostración de teitáu d’horros amás d’exhibición de ganáu autóctono y de mastín asturianu de la mano de l’Asociación Española de Mastín Asturianu.
El públicu va poder disfrutar de teatru de cai con Dormiyosos, de Factoría Norte, en collaboración con El Encuentro Teatro, y de les actuaciones del cuartetu Celthair de la Orquesta Sinfónica del Principáu d’Asturies, de Fesoria a les Ortigues y del Grupo Assia. Tampoco van faltar les exhibiciones de xuegos tradicionales, de la Unidá Canina de Rescate y d’echar sidra, con clase maxistral incluida. Tamién va haber vuelos cautivos de globu aerostáticu a lo llargo de la mañana.

Les visites guiaes al Palaciu de Mon y al Centru d’Interpretación Casa del Marco Muséu de la Casa Campesina, en Vilarquille, también se van facer n’horariu de mañana y tarde.

Los percorríos guiaos a los distintos museos y equipamientos y los vuelos cautivos de globu aerostáticu tienen places limitaes, polo que ye menestar acutar primero de les 14:00 hores del 6 de setiembre nos teléfonos 985 185 860/902 306 600 o al traviés del corréu electrónicu promocioncultura@turismoycultura.asturias.es.
29/08/2024
El PSOE considera inalmitible la desdexación de funciones de Pumariega mientres FIDMA

La conceyala del grupu municipal socialista, Marina Pineda, presentó esta mañana una entruga que va llevar al próximu Plenu ordinariu del 11 de setiembre nel que va preguntar a l’alcaldesa si tien la intención de caltener la delegación de les competencies en materia de promoción económica, empléu y turismu, que, anguaño, recayen na conceyala del PP y vicealcaldesa Ángela Pumariega, énte la so ausencia mientres la primer selmana de la Feria Internacional de Muestres. “Consideramos qu’esto supón una desdexación de les sos funciones y responsabilidaes y paeznos inalmitible”, aseguró la conceyala que recordó que la popular participó mientres esa selmana como asesora de TVE na retresmisión de les pruebes de vela.

Dende’l Grupu Municipal Socialista, tamién demanden saber si la señora Pumariega percibió dalguna retribución pola so collaboración cola televisión pública, recordando que tien dedicación esclusiva nel so trabayu como conceyal del Conceyu de Xixón. “Nun pretendemos quitar importancia al so pasáu olímpicu, del que toos nos sentimos arguyosos, pero la vicealcaldesa tien de recordar que tien un compromisu col gobiernu del que decidió formar parte y tendría de da-yos prioridá a los intereses de la ciudá sobre los suyos propios”, aseguró Pineda que s’amosó esmolecida tamién pol fechu de que “si finalmente asume la presidencia del so partíu va tener tiempu pa tou o tamién lo fadrá a cuenta de la so dedicación al Gobiernu municipal”

La socialista recordó que FIDMA ye’l principal eventu económicu de Xixón y d’Asturies, un puntu d’alcuentru d’empreses ya instituciones, nel que se celebren xornaes, alcuentros, meses redondes, visites y contactos que son de vital importancia pal futuru de la comunidá y de la ciudá. “Asistimos ablucaos a les intervenciones de los sos compañeros de gobiernu y de partíu, que punxeron bien bona voluntá, pero nun escuchemos nin una sola palabra sobre los proyectos municipales en materia d’economía, empléu y turismu, sobre manera teniendo en cuenta qu’anguaño en FIDMA, el pabellón de Xixón taba dedicao a la Economía Azul y que tuvo llugar la primer edición del premiu trayectoria de Visita Xixón”, afirmó la conceyala p’añedir que “la conceyala de turismu pasóse tol branu faciendo turismu polo qu’agora-y toca dar esplicaciones”.

Pineda tamién se refirió a la presencia cada vez más habitual del conceyal de Relaciones Instituciones, el forista Jorge González Palacios, n’eventos rellacionaos cola área de promoción económica. La conceyala refirió que’l señor Palacios foi asumiendo protagonismu en xuntes con empreses; robló convenios de collaboración, unu d’ellos en FIDMA; encabezó la espedición a China, ensin nengún resultáu positivu y, tamién, designóse-y vicepresidente de la Rede de Ciudaes Atlántiques como representante de la ciudá pa “avanzar nos retos comunes como la economía azul o’l turismu sostenible”, según les sos propies palabres.

La socialista esplicó qu’estos fechos son los que lleven a formular esta entruga nel Plenu pa saber “si l’alcaldesa tien previsto retirar les competencies a la señora Pumariega, si considera qu’eso supunxo una desdexación de les sos funciones y responsabilidaes y si ye de la so conocencia que percibiera dalguna retribución pola so participación como collaboradora de TVE nos XX.OO.”

29/08/2024
Desconvócase la fuelga d’educación y vuelve a escena la negociación de meyores na enseñanza pública

El Gobiernu d’Asturies y les organizaciones sindicales alcordaron güei desconvocar la fuelga del profesoráu de los centros educativos públicos prevista pal 10 de setiembre. A cambéu, va volver a entamar la negociación del Alcuerdu pa la meyora de la enseñanza pública, cola inclusión d’una clausa pa estudiar l’amenorgamientu de la xornada del profesoráu mayor de 55 años a partir de la próxima llexislatura. La desconvocatoria decidióse mientres la segunda xunta del comité de fuelga, de casi cinco hores de duración.

Dambes partes roblaron esta tarde un documentu nel que se comprometen a retomar les conversaciones sobre’l mentáu alcuerdu y a sometelu a votación nel senu de la Mesa Xeneral de Negociación de l’Alministración del Principáu d’Asturies. La cita va ser el próximu miércoles y la convocatoria va unviase güei mesmu, n’apenes 24 hores, cumpliendo col compromisu qu’adquiriera la conseyera colos sindicatos.

Esk alcuerdu –qu’empezó a axustase’l pasáu 17 de xunetu- inclúi una propuesta p’amenorgar la carga lectiva del cuerpu de maestros a 23 hores selmanales. Esta midida supón la contratación de 486 nuevos docentes, a partir del cursu 2026/2027, y una dotación añal de 23,5 millones.

Tamién contempla dos grupos de trabayu pa modificar el resolvimientu de 6 d’agostu de 2001 -que va dexar ameyorar la organización interna de los centros- y pa simplificar la xera alministrativa del profesoráu. A lo último, figura’l compromisu de camudar l’aplicación informática de xestión SAUCE, con un costu de 3 millones.

Amás d’eses midíes, el gobiernu aceptó güei incluyir una nueva cláusula nel citáu alcuerdu. En concretu, consiste en “la creación d’un grupu de trabayu p’analizar conxuntamente coles organizaciones sindicales integrantes de la Xunta de Personal Docente non Universitariu la implantación, nel cursu 2027-2028, del amenorgamientu d’hores lectives pa los mayores de 55 años qu’empresten los sos servicios nos centros docentes públicos non universitarios dependientes de la Conseyería d’Educación”. A cambéu, los sindicatos roblaron la desconvocatoria de la fuelga.

Otres iniciatives yá alcordaes

Dende l’entamu de la presente llexislatura, l’Executivu aprobó yá la concesión de cuatro díes d’asuntos propios pal profesoráu, rebaxa progresiva de les ratios d’alumnáu per aula dende esti cursu, el plan d’amenorgamientu de medies xornaes o la introducción del asturianu y l’eonaviegu n’Infantil, a partir del cursu 2025/2026. Esta última midida trai la contratación d’un centenar de docentes con una inversión añal de 5 millones.

De salir alantre la nueva propuesta de la conseyería, el gobiernu dispondría otros 26,5 millones adicionales, lo que supondría la mayor inversión educativa de la hestoria aprobada nun solu alcuerdu.

29/08/2024
Izquierda Xunida esixe al conceyal de Tráficu acabar col “aparcaderu illegal nel que se convirtió la contorna del Muséu del Ferrocarril”

El voceru municipal d’Izquierda Xunida, Javier Suárez Llana, esixó güei al conceyal de Tráficu que ponga fin “de manera inmediata al aparcaderu illegal nel que se convirtió la contorna del Muséu del Ferrocarril”, una situación qu’amás, alvierte, “afecta a la seguridá vial de peatones y ciclistes”.

Suárez Llana critica que “la permisividad del Conceyu na avenida José Manuel Palacio convirtió zones verdes n’aparcaderu y carriles bici en carreteres p’aportar a ellos. Un auténticu caos en plenu centru de la ciudá que compromete la seguridá nuna zona mui
transitada por peatones y ciclistes, especialmente les más cercanes a los pasos a la estación de tren de Sanz Crespo y el parque de Teodoro Cuesta”.

“Les imaxes que nos dexa esti branu son fiel reflexu de la máxima del gobiernu, una movilidá que nun moleste al coche, pero llevada al estremu”, incide’l voceru d’IX, qu’apunta que “l’aparcamientu illegal de Poniente déxase amás nuna zona na qu’esisten dellos aparcamientos tanto gratuitos como de pagu, en superficie y soterraños”.

Pal conceyal d’IX, “el caos vivíu esti branu na ciudá respuende a una absoluta falta de planificación en materia de movilidá. Tuvimos a un conceyal de Tráficu ausente”. Suárez Llana considera “urxente” que se convoque’l Conseyu Sectorial de Movilidá Sostenible, tal que solicitó la Federación d’Asociaciones Vecinales, y apuesta por impulsar midíes que “potencien el tresporte públicu y llinden l’accesu de vehículos al centru urbanu. Aparcaderos disuasorios y un serviciu d’autobús rápidu d’accesu al centru son clave pa nun volver vivir un branu como esti”.

28/08/2024
La remodelación de la escombrera del Pozu Espinos, en Mieres, va rematar en xunu de 2025

Les obres de remodelación de la escombrera del Pozu Espinos, en Mieres, van rematar, previsiblemente, en xunu de 2025. Asina lo anunció ayeri la directora xeneral d’Enerxía y Minería, Belarmina Díaz, que visitó estos trabayos, mui demandaos polos vecinos y el conceyu.

L’actuación, que cunta con financiamientu européu al traviés del Mecanismu de Recuperación y Resiliencia (MRR), va evitar que se produzan nueves aveníes d’agua y material, qu’afectaben, especialmente mientres los meses d’iviernu, a les carreteres de la zona. La inversión, que engloba la ellaboración del proyectu técnicu y la execución de la obra, xube a 999.000 euros.

Dende que’l pasáu mes d’abril empezara la remodelación de la escombrera yá s’executaron, aprosimao, una tercer parte de los trabayos, ente los que destaca l’actualización topográfica de la fastera, na que se tendieron nueves baxantes en tramos de 10 metros de llargor y cinco d’altor. Ye una obra de gran complexidá técnica, na que ta previsto mover más de 6.000 metros cúbicos d’escombru y executar más de 3.500 metros cúbicos d’escollera, polo qu’amás de siete trabayadores, cuntar con un equipu de sofitu técnicu.

Una vegada remataos los trabayos, la escombrera va quedar integrada nel paisaxe y la zona va cuntar con estabilidá y seguridá minera, amás d’iguase los problemes que se xeneraben coles agües.

28/08/2024
Muerren dos persones en San Tiso d’Abres tres cayer col coche al ríu Eo

Dos persones, dos varones, finaron nun accidente de tráficu, tres salise’l vehículu nel que circulaben de la vía y cayer al ríu Eo, na carretera ST-1 en San Tiso d’Abres.

El Centru de Coordinación d’Emerxencies recibió l’avisu a les 23:42 hores d’ayeri. Na llamada esplicóse qu’escucharen un golpe y creíen que podía ser un accidente. Tres comprobalo indicóse qu’un vehículu cayera pela ponte y cayera al ríu, taba somorguiáu y creíen qu’a lo menos había una persona nel so interior.

Nel momentu movilizóse a siete efectivos de Bomberos del Serviciu d’Emerxencies del Principáu d’Asturies (SEPA) con base nos parques de Barres y Valdés, amás d’al Xefe de Zona Suroccidental.

Cuando llegaron al llugar, comprobaron que s’intentara sacar l’automóvil del llugar con ayuda d’un tractor, ensin ésitu. Los bomberos empecipiaron les xeres de rescate y llograron sacar el vehículu del agua a la 1:11 hores. Les puertes del mesmu taben abiertes, pero nun había nenguna persona nel so interior, polo qu’empezaron a rastrexar el ríu. A la 1:49 hores alcontraron el cuerpu ensin vida d’una persona y a les 2:14 hores atoparon a una segunda persona tamién finada.

28/08/2024
Mediu Rural destina 200.000 euros a sofitar al sector anguleru

El Boletín Oficial del Principáu d’Asturies (Bopa) publica güei una convocatoria d’ayudes, dotada con 200.000 euros, dirixida al sector anguleru afectáu pola aplicación de los planes de xestión y zones de pesca de l’angula. Estos recursos tienen como finalidá compensar la perda d’ingresos provocada pol cese temporal de la pesca pola aplicación de la lexislación europea.

Esta normativa, establecida nel Reglamentu de la Unión Europea sobre la Política Pesquera Común, regula los planes tresañales pal caltenimientu y esplotación sostenible de los recursos biolóxicos marinos, y obliga a paralizar temporalmente l’actividá pesquera pa fomentar la pesca sostenible y la recuperación y caltenimientu de los recursos biolóxicos acuáticos.

Los beneficiarios d’estes ayudes son los armadores de buques pesqueros y los pescadores d’embarcación de la modalidá d’artes menores o palangre de fondu y pescadores a a pie del la caladeru cantábricu noroeste, con llicencia pa la pesca de l’angula mientres la campaña 2023/2024, incluyíos nos planes de xestión y zones de pesca de l’angula d’Asturies.

27/08/2024
El Conceyu d’Uviéu incumple la toponimia oficial na señalética de la rotonda nueva de Santuyano, denuncia Iniciativa pol Asturianu

La señalética de la rotonda nueva de Santuyano incumple la toponimia oficial asturiana. La cartelería instalada pol Conceyu d’Uviéu na infraestructura que xune los barrios de Ventanielles y Teatinos inora la forma tradicional y oficial Xixón. Unu de los lletreros recueye namás la forma de ‘Gijón’ en contraposición col Decretu 105/2006, de 20 de setiembre, pol que se determinen los topónimos oficiales del Conceyu de Xixón, qu’afita claramente que’l nome oficial de la ciudá ye Gijón/Xixón.

Nesi sen, Iniciativa pol Asturianu ta acabante de rexistrar una reclamación al Conceyu afalando al equipu de gobiernu de la capital a faer usu de la toponimia oficial na cartelería y tamién de la llingua asturiana. La organización de reivindicación llingüística considera que la presencia del asturianu, de la toponimia oficial y l’usu bilingüe (centru ciudá, por exemplu) nos paneles nun tendría costu pal conceyu, siendo esti un mou de visibilizar y normalizar la llingua asturiana.

Na reclamación presentada al Conceyu d’Uviéu, la entidá invita tamién al gobiernu municipal a caltener un compromisu con la normalización y de cumplimientu de la Llei d’Usu y Promoción del asturianu tal como defiende’l Partíu Popular d’Asturies.

26/08/2024
El Telecable H.C. sigue aumentando’l so númberu d’equipos y deportistes

El conxuntu asturianu consolídase como’l club de h.oquei patinos con más equipos y deportistes de la Comunidá Autónoma, gracies a que na temporada 2024/2025 va tener en competición un total de 20 equipos, incluyíos los dos que compiten en categoría nacional (OK Lliga y OK Bronce), integraos por más de 200 deportistes.

Anque esti crecimientu ye positivu pa la entidá xixonesa, dase la circunstancia de que, salvando les plantiyes de OK Lliga y OK Bronce, los equipos entrenen y xueguen na pista de l’Algodonera, una pista que s’atopa anguaño desbordada pol continuu crecimientu del númberu d’usuarios, cola dificultá que trai pa cuadrar horarios de forma eficiente, lo cual fai patente la urxente necesidá de disponer de más pistes afayadices pa practicar l’h.oquei sobre patinos na ciudá.

El desglose d’equipos del Telecable H.C. ye’l siguiente:

1 equipu OK Lliga femenín

1 equipu OK Lliga masculín

1 equipu junior

2 equipos xuveniles

3 equipos infantiles

2 equipos alevinos

3 equipos benxaminos

3 equipos prebenxaminos

1 equipu senior femenín (categoría autonómica)

1 equipu sub-17 femenín

1 equipu sub-13 femenín

1 equipu categoría veteranos

Amás de les anteriores categoríes d’equipos federaos, el Telecable H.C. tamién cunta con un numberosu grupu de deportistes de categoría Mini y una escuela de iniciación de diverses edaes qu’entrena los sábados peles mañanes.

26/08/2024