Xixón al día

Autor: xixonaldia

  • Xixón cansa de los fedores nes cais

    Xixón cansa de los fedores nes cais

    Los vecinos de Xixón tán fartos de los malos golores qu’esisten na ciudá dende l’entamu del branu y asina lo faen saber al traviés de quexes nes principales redes sociales. «Pasiar pelos barrios de la ciudá ye insostenible colos fedores qu’hai pela cai, sobre manera na avenida Schultz, onde’l mal golor va dende la ilesia de la Milagrosa hasta’l cruce con Gaspar García Laviana».

    Nesi sen, el conceyal socialista, Ramón Tuero, esixó al presidente d’EMULSA, Rodrigo Pintueles, la planificación de la llimpieza de tolos contenedores qu’esisten nel conceyu, tanto per dientro como per fuera, de manera inmediata y ensin escuses énte los problemes de mal golor que tán xenerando. “Ta claro que les frecuencies de llimpieza de los contenedores nun son abondos, mesmo que la falta de lavacontenedores y de personal cualificáu, lo que se manifiesta na gran cantidá de quexes ya incidencies de los vecinos que se tán recibiendo diariamente”, aseguró Tuero.

    El mesmu problema alcuéntrase nel serviciu de llimpieza de los contenedores per fuera (con agua a presión pel esterior). Mientres qu’antes cuntábase con dos equipos diarios, agora amenorgóse a unu, teniendo en cuenta que se multiplicó’l númberu de contenedores pa la so llavadura, de dos (l’orgánicu y el restu) a cinco (añediendo los trés de reciclaxe: vidriu, papel y plásticu). “Esto, añedíu a la falta de personal, provocó que los contenedores lleven tiempu ensin llimpiar cola frecuencia que se debería”, denuncia Tuero, qu’añede qu’esti furgón ye l’encargáu de solucionar les posibles incidencies que provienen de la Policía Local o de la ciudadanía.

  • Destinen 194.000€ pa impulsar la producción del quesu Cabrales

    Destinen 194.000€ pa impulsar la producción del quesu Cabrales

    El Gobiernu d’Asturies destinó esti añu 194.840 euros pa impulsar la producción de quesu Cabrales. En concretu, aumentóse nun 15% la cuantía destinada al control y la certificación d’esti productu, qu’esti añu xube a 156.975 euros, frente a los 136.500 de 2023. Per otru llau, el Gobiernu d’Asturies destina 37.365 euros a la promoción d’esta denominación d’orixe protexida (DOP), la mesma cuantía del añu pasáu, cuando s’amontó nun 50%.

    La vicepresidenta d’Asturies, Gimena Llamedo, asistió a la inauguración de la LII edición del Certame del Quesu Cabrales, acompañada pola directora xeneral d’Agricultura, Agroindustria y Desenvolvimientu Rural, Begoña López. N’Arenas, Llamedo, que reivindicó’l papel que desempeñen los 21 ellaboradores, destacó que’l preciu mediu por quilu pasó de 12 a 13 euros ente 2022 y 2023, cuando se comercializaron 289.378 quilos amparaos pola DOP.

    El Cabrales ye un quesu cada vez más internacional. El pasáu exerciciu una cuarta parte de la producción vendióse fuera de les nueses fronteres. En concretu, 54.258 quilos comercializáronse en países de la Unión Europea, y 18.086 quilos distribuyéronse nel restu del planeta.

  • El PSOE esixe la constitución del Conseyu de Memoria Democrática de la ciudá

    El PSOE esixe la constitución del Conseyu de Memoria Democrática de la ciudá

    Los y les socialistes de Xixón al traviés de la so Comisión Executiva y los y les conceyales del Grupu Municipal Socialista nel Conceyu de Xixón manifestaron una vegada más la so fonda esmolición pola recurrente celebración nel conceyu de Xixón de concentraciones de persones convocaes pa facer esaltación de los valores franquistes.

    Énte la nueva concentración celebrada nel día d’ayeri na contorna del monumentu a “Los Héroes del Simancas” los socialistes xixoneses vuelven repitir al gobiernu municipal la necesidá de que se tome en serio l’adopción de les midíes y obligaciones derivaes de les lleis de memoria democrática mesmo que la constitución del Conseyu de Memoria Democrática de Xixón qu’ente les sos funciones tien «les d’espublizar los valores democráticos de tolerancia y respetu en contraposición a aquellos otros que xeneraron les páxines más escures de la nuesa hestoria recién protagonizaes pol réxime franquista y la brutal dictadura qu’enllantó».

    “Los y les socialistes de Xixón pidimos a Carmen Moriyón que reflexone al rodiu de cuálos pueden ser les causes que provoquen qu’un conceyu tradicionalmente abiertu, tolerante ya inclusivu como’l nuesu tea convirtiéndose nos últimos meses pol so connivencia coles ideoloxíes d’estrema derecha nun llugar de cultu pa persones con ideoloxíes fascistes señardoses de tiempos pasaos a los que la nuesa sociedá nun quier volver. ¿Qué caldu de cultivu complaciente y permisivu ta xenerando l’alcaldesa y el so gobiernu por qu’abonden estos alcuentros de señardosos del franquismu?»

    «Cumplir les lleis de Memoria Democrática nun ye una opción sinón una obligación pal Gobiernu municipal, y faelo non solo implica torgar estos actos sinón tamién convertise en garante y difusor de los valores democráticos y de convivencia qu’esixe la nuesa sociedá y el nuesu tiempu», rematen.

  • Barbón diz tar trabayando muncho pa la declaración de la cultura sidrera como patrimoniu mundial inmaterial

    Barbón diz tar trabayando muncho pa la declaración de la cultura sidrera como patrimoniu mundial inmaterial

    El presidente d’Asturies, Adrián Barbón, espresó güei’l so enfotu na declaración de la cultura sidrera como patrimoniu mundial inmaterial, una decisión que la Unesco podría tomar a principios d’avientu en Paraguay, mientres la xunta del comité intergubernamental de la organización. “Tamos trabayando muncho por que esa declaración se produza”, aseguró.

    Barbón participó nel Muséu de la Sidra, en Nava, na presentación del llibru La sidra: el ADN asturiano diferente al resto de la península, del escanciador guineanu afincáu n’Asturies Salvador Ondó. Ellí repasó tolos elementos singulares venceyaos a la bébora tradicional por escelencia, como’l vocabulariu asociáu, l’escanciáu y la particular tipoloxía de les botelles.

    “La sidra bébese compartiendo y eso ye daqué que la diferencia del restu de bébores, porque se busca compartir y socializar, y eso espresa tamién la forma de ser d’asturianos y asturianes”, sorrayó’l xefe del Executivu.

  • Asturies va acoyer en 2025 el Campeonatu Mundial de Batéu

    Asturies va acoyer en 2025 el Campeonatu Mundial de Batéu

    La viceconseyera de Turismu recibió güei na República Checa’l testigu del Campeonatu Mundial de Batéu d’Oru, que se celebra estos díes en Zlate Hory. La llocalidá de Navelgas, en Tinéu va ser la see d’esta competición del 3 al 9 d’agostu de 2025. Ta previsto que la prueba lleve al conceyu vaqueiru a más de 800 persones.

    La viceconseyera presentó esta tarde énte más de 400 participantes de 20 países les condiciones y recursos d’Asturies como “paraísu natural” qu’apuesta pola sostenibilidá, con más del 40% del so territoriu protexíu, y una especial riqueza cultural y etnográfica.

    La presentación na República Checa incluyó tamién una espicha tradicional con productos típicos asturianos y un puntu d’información turística nel que se proyectó un vídeu promocional sobre los atractivos de la comunidá.

    Mediu centenar de representantes de l’Asociación de Bateadores d’Oru Barciaecus, de Navelgas, representen a España nel mundial, que va rematar el sábadu. Amás de competir, promocionen el próximu campeonatu, nel que van actuar como delegación anfitriona col sofitu del Gobiernu d’Asturies y el Conceyu de Tinéu.

    La hestoria del occidente asturianu ta amestada al oru dende la dómina castreña, una vinculación que queda documentada y caltiense viva nel Muséu del Oru de Navelgas, nel que s’entamen demostraciones y talleres de batea pa turistes.

    Tinéu yá entamó en 2005 el campeonatu européu y darréu, en 2008 y 2015, dos tales competiciones mundiales.

  • Mieres conquistó’l Festival Intercélticu de Lorient cola Banda Sinfónica del Atenéu Musical

    Mieres conquistó’l Festival Intercélticu de Lorient cola Banda Sinfónica del Atenéu Musical

    Mieres, de la mano de la Banda Sinfónica del Atenéu Musical, rellumó con lluz propia nesta edición del Festival Intercélticu de Lorient, la gran cita cultural y musical de raigaños celtes cola que’l conceyu siempres tuvo gran relación, con representantes que siempres trunfaron nesti gran escaparate internacional. Nesta edición, foi la Banda Sinfónica del Atenéu Musical la que llevó la bandera de Mieres a tierres bretones. Asina, los sos 13 Reis –puesta n’escena xunto a la Banda de Gaites La Llaguna del Torollu y estrenada na pasada Folixa na Primavera—foi una de les actuaciones más aplaudíes en Lorient, onde amás pudieron esfrutar de pasucais, desfiles y de la música d’esta agrupación, que presumió de Mieres mientres tola cita, na que tuvieron acompañaos pola conceyala d’Educación, Belén Alonso.

    L’alcalde, Manuel Ángel Álvarez, recibió a una representación de la Banda Sinfónica del Atenéu Musical de Mieres pa da-yos les gracies pol trabayu realizáu y pol so compromisu cola cultura y la música. Pela so parte los miembros d’esta agrupación compartieron cola
    primer edil anécdotes, hestories y esperiencies d’un viaxe a un festival únicu nel que Mieres
    foi tamién protagonista, dando la oportunidá d’amosar la potencia cultural del conceyu y l’enorme talentu qu’hai nél.

  • La telecabina del Valgrande-Payares va ser de baldre el 1 de setiembre por mor de la etapa de La Vuelta

    La telecabina del Valgrande-Payares va ser de baldre el 1 de setiembre por mor de la etapa de La Vuelta

    La telecabina de la estación de Valgrande-Payares va ser de baldre’l próximu 1 de setiembre, coincidiendo cola llegada de La Vuelta a España al techu del complexu deportivu, el Cuitu Nigru.

    El final d’etapa de la ronda ciclista coincide col setenta aniversariu de Valgrande-Payares. Va ser el primeru de los dos finales n’altu que la ronda ciclista va tener n’Asturies, onde’l día 3 va xubir a los Llagos de Cuadonga, y la segunda xornada na que va pasar pela comunidá, en percorriendo 81 kilómetros nos conceyos de Degaña y Cangas na previa, el sábadu 31 d’agostu. La etapa que remata en Payares va salir de L’Infiestu poco primero de los dos de la tarde y va llegar, según l’horariu previstu pola organización, a les 17:20 hores.

  • La ilesia de Samartín de Güerces sufre’l saquéu de los lladrones

    La ilesia de Samartín de Güerces sufre’l saquéu de los lladrones

    La ilesia de Samartín de Güerces alboreció güei saquiada. El cura de la parroquia alcontró esta situación al aportar al edificiu pa realizar el so trabayu cotidianu y tres ver que la puerta taba forzada y enteabierta. Nel so interior, una escena ablucante. De tolos materiales de valor, namás que quedaben unos pocos. Los lladrones marcharon del llugar col cáliz, la custodia -que yera lo único que quedaba d’enantes de la guerra- faroles, cruces y hasta llámpares.

    Una imaxe insólita, pero que se vien repitiendo nos postreros meses na zona rural del conceyu de Xixón. Los postreros afectaos nestos robos fueron los vecinos de Caldones, onde anguaño la Guardia Civil siguía la pista a dos individuos encapuchaos captaos con una cámara de seguridá nuna de les cases asaltaes.

    Depués de cientos de robos nesta zona y «la incapacidá pa poner unes cámares, habría que valorar la posibilidá de pedir la dimisión de la conceyala de seguridá ciudadana» denuncien los vecinos, cansaos de vivir nun ambiente de tensión continuu.

  • Transición Ecolóxica precisa que los permisos pa identificar recursos mineros tienen como oxetivu esclusivu la investigación

    Transición Ecolóxica precisa que los permisos pa identificar recursos mineros tienen como oxetivu esclusivu la investigación

    La Conseyería de Transición Ecolóxica, Industria y Desenvolvimientu Económicu precisa que la concesión de permisos pa la localización de recursos mineros son puramente llabores d’investigación, un procedimientu alministrativu regláu que la so autorización nun implica necesariamente l’apertura d’una esplotación.

    Como riegla xeneral, los programes d’investigación que se presenten describen una serie d’actuaciones pa realizar nun periodu de trés años. La posibilidá de tomar amueses por mediu de calicates, trincheres, pocinos o actividaes análogues, mesmo que sondeos o perforaciones, contémplase namás a partir del segundu o tercer añu de vixencia, en función de los datos que se van llogrando. Eses amueses analícense col fin de determinar la viabilidá técnica y económica d’una posible esplotación y poder disponer de la información oportuna pa un estudiu de mercáu.

    Nesti sentíu, el desenvolvimientu de les actividaes d’investigación que tengan incidencia nel mediu ambiente ta supeditáu a la previa tramitación de los proyectos técnicos independientes qu’estableza la normativa y a les preceptives autorizaciones y llicencies municipales.

    Énte les informaciones publicaes en relación con un permisu d’investigación concedíu a Asturmet Recursos S.L.O., la conseyería señala que la solicitú presentada pola empresa someter a información pública a mediaos de 2021 per aciu la so publicación nel Boletín Oficial del Principáu (Bopa) y nel Boletín Oficial del Estáu (BOE), mesmo que nos tablones d’edictos de los conceyos de Bimenes, Llaviana, Nava y Piloña, ensin qu’entós se presentaren allegamientos. Tamién salió a información pública nel Bopa y nel BOE l’autorización del permisu, en xunu de 2024, y abrióse un plazu de 30 díes pa recibir allegamientos, n’ares del cumplimientu de la llei y de la tresparencia del procesu.

    Amás, la Dirección Xeneral d’Enerxía y Minería caltuvo contactu colos conceyos y con dellos grupos municipal que lu han solicitáu, a los qu’informó sobro los detalles del permisu, les implicaciones del mesmu y los llabores que va desenvolver la empresa.

    Esti permisu d’investigación concretu conceder por un periodu de trés años pa evaluar la posible esistencia de cobaltu, cobre, níquel, oru y plata, coles siguientes actuaciones previstes:

    Mientres el primer añu va realizase una cartografía xeolóxica de tola superficie y analís de mapes y bibliografía, centrada nos llabores mineros abandonaes y nos nicios de mineralizaciones.

    Nel segundu añu se focalizarán los oxetivos pa les fases posteriores per aciu la continuación de los estudios de cartografía. Amás, pretende alcontrase y definir zones potencialmente mineralizades al travies de técniques de teledetección non invasives.
    Nel tercer añu, siempres que los resultaos de fases anteriores seyan satisfactorios, va llevar a cabu la evaluación de tolos datos, planiando campañes de sondeos si fuera precisu naquelles zones nes que s’identifiquen mayores potenciales de mineralizaciones.

  • 16 vacantes menos d’asturianu na convocatoria d’aniciu del cursu 2024-25

    16 vacantes menos d’asturianu na convocatoria d’aniciu del cursu 2024-25

    L’Asociación de Docentes d’Asturianu y Eonaviego/Gallego-asturiano (ADAE) fizo un llamáu
    urxente a la Conseyera d’Educación al traviés d’un documentu unviáu per rexistru a principios de xunetu pa qu’adoptare midíes inmediates énte l’ausencia escandalosa de 40 vacantes de dambes asignatures alvertida na rellación de necesidaes provisionales de docentes pal cursu 2024/2025.La corrección de les previsiones siguió dexando a mediaos de xunetu una falta de 30 places, lo que tamién s’alvirtió a Conseyería y a tolos sindicatos. Tres estos avisos, la convocatoria de places d’iniciu de cursu sal con una deficiencia de 16 vacantes en comparación coles convocaes a entamos del cursu 23/24.

    En Llingua Asturiana de Primaria desapaecen 13 vacantes y 7 pasen a media xornada. En
    Secundaria, desapaecen 3 puestos de trabayu que correspuenden a los Centros d’Educación de Persones Adultes (CEPA) que lleven años con docente de l’asignatura. Amás, siguen ensin convocase vacantes nos otros 5 CEPA. En Gallego-asturiano de Primaria la única xornada completa qu’había divídese en dos medies.

    Rexístrense dalgunos avances, como dos vacantes a xornada completa n’asturianu en Primaria que nun se conseñaben nes necesidaes provisionales y seis vacantes más a xornada completa n’asturianu en Secundaria. En gallego-asturiano en Secundaria convóquense dos medies xornaes nueves en centros nos que nun se daba l’asignatura y aumenta una media xornada a xornada completa. Estos avances son insuficientes, yá que depués de dos comunicaciones al traviés del rexistru a la Conseyería d’Educación
    siguen desapaeciendo 16 puestos de trabayu.

    El profesoráu que forma ADAE considera qu’esta situación ye inaceptable y camienta que se
    trata d’una estratexa d’aforru que tien tovía un coste mayor: l’incumplimientu de la normativa que permite al alumnáu d’Asturies que lo desee cursar l’asignatura d’ún d’estos dos idiomes, lo que suprime los sos drechos. ADAE insta a la Conseyería a que rectifique les previsiones y se convoquen les vacantes necesaries pa cumplir cola llexislación y la xurisprudencia vixente.