Xixón al día

Autor: xixonaldia

  • Cogersa empecipia los trámites pa reparar la planta de tratamientu de la fracción resto que quemó n’abril

    Cogersa empecipia los trámites pa reparar la planta de tratamientu de la fracción resto que quemó n’abril

    La comisión delegada del Consorciu pa la Xestión de Borrafes Sólides d’Asturies (Cogersa), dio’l vistu bonu a los trámites de contratación que van dexar reparar y volver poner en marcha la planta de tratamientu de la fracción resto que quemó n’abril.

    El proyectu de reconstrucción inclúi la rehabilitación integral de les estructures arquitectóniques y de los equipos industriales estropiaos pol fueu, mesmo que’l refuerzu de les midíes de protección contra quemes yá esistentes, con base nos encamientos realizaos pol Serviciu de Política Industrial del Principáu.

    Asina, de los 14,7 millones de presupuestu global, cerca de 1,5 van destinase a llabores d’inxeniería y trabayos previos, mientres qu’otros 6,8 correspuéndense cola obra civil y edificación (reposición d’estructura, cubiertes y zarramientos). Amás, 767.839 euros van dedicase a la recuperación de la instalación fotovoltaica y otros 5,5 millones a equipos ya instalaciones.

    Ente los principales equipos sobre los qu’hai qu’actuar figuren 21 cintes (dalgunes repararánse y otres sustituyiránse), trómeles y balísticos de les dos llinies paraleles coles que cunta la planta (van reparase in situ), dos trituradores abrebolses (van sustituyise dambos equipos) y les pontes grúa (van ser reparaos n’obra pol fabricante).

    Tocantes a la instalación contra quemes, amás de la reposición de los equipos estropiaos inclúyense delles meyores: un nuevu muria de formigón pa sectorización de la sablera de descarga de borrafes avolumaes y elevación de muries, l’aumentu de la sectorización y la instalación de compuertes, l’allugamientu de cámares termográfiques, la instalación de nuevos rociadores en sablera de descarga y fosos, el cambéu de material de les tuberíes de desodorización, un nuevu sistema d’estinción sobre trituradoras de CSR y el crecimientu de la capacidá d’almacenamientu d’agua.

  • LLABoral Centru d’Arte duplica los sos visitantes nel primer semestre de 2024

    LLABoral Centru d’Arte duplica los sos visitantes nel primer semestre de 2024

    El númberu de visitantes a les esposiciones y conteníos de Llaboral Centru d’Arte y Creación Industrial aumentó exponencialmente mientres los primeros seis meses del añu 2024. El Centru y les sos actividaes recibieron un total de 47.827 persones mientres el 1 de xineru y el 30 de xunu, cifres bien altes a les recoyíes nel mesmu periodu del añu anterior, cuando Llaboral acoyó a un total de 21.155 visitantes. Esto supón un aumentu históricu del 226%.

    A lo llargo del primer semestre inauguráronse 4 nueves esposiciones y tuvieron abiertes
    al públicu un total de 8 amueses. Ente estes destacaron l’acoyida multitudinaria de Rodrigo Cuevas. La gracia de la agitación folklórica, y l’apertura en xunu de Millennials, el arte multimedia de la Generación Y. Dambes esposiciones supunxeron un finxu pal Centru no que cinca  a atracción de nuevos públicos.

    La ufierta continua d’actividaes a lo llargo del semestre tamién foi un motivu de crecimientu de visitantes. Ente elles destaquen les visites de centros escolares o la celebración de la edición de primavera del popular LABshop, el mercáu d’arte y diseñu de Llaboral amenizáu con talleres y conciertos qu’atraxo a 4 mil persones. Tanto les esposiciones como les obres producíes nes residencies artístiques de Llaboral realicen itinerancies por otros equipamientos culturales del territoriu nacional. Ye’l casu d’El
    mundu ye viesca, de Rotor Studio, que pudo visitase nel Centru d’Arte y Tecnoloxía de Zaragoza Etopia; La imaxe do trapeciu del artista Pablo Casanueva, na Casa de Cultura Palacio de Omaña de Cangas del Narcea; o L’essence du lieux del estudiu Petit Muller, na Central de Diseñu de Matadero Madrid mientres la Bienal Mayrit.

  • Muerre un mozu de Llamuñu na sablera de la Concha d’Artéu

    Muerre un mozu de Llamuñu na sablera de la Concha d’Artéu

    Un mozu de Llamuñu d’ente 18 y 20 años perdió la vida na sablera de la Concha d’Artéu en Cuideiru. Efectivos del Grupu de Rescate de Bomberos d’Asturies, a bordu del helicópteru medicalizáu del Serviciu d’Emerxencies d’Asturies (SEPA) rescataron del agua al afectáu y la médica-rescatadora efectuó maniobres de reanimación cardiopulmonar (RCP), pero finalmente nada pudo facese pa salvar la so vida.

    El Centru de Coordinación d’Emerxencies recibió l’avisu a les 16:08 hores del Serviciu de Salvamentu (SAPLA) del arenal. Na llamada inicial falábase d’un neñu somorguiáu nel ríu de la sablera, l’Uncín. Darréu esclarióse que se trataba d’una persona adulta a la que vieren como se somorguiaba nel agua, pero nun lu vieren salir. Nel momentu movilizóse al equipu de rescate, a bordu de l’aeronave medicalizada.

    Una vegada nel llugar, los bomberos-rescatadores yá vieron al afectáu nel agua y rápido entraron a por él, xunto cola médica-rescatadora, y sacáronlu y empecipiaron les maniobres de RCP, ensin ésitu. Va ser cola pertinente autorización cuando se proceda al llevantamientu del cadabre.

  • El Festival Aéreu de Xixón vuelve con polémica poles prohibiciones de bañu

    El Festival Aéreu de Xixón vuelve con polémica poles prohibiciones de bañu

    El Festival Aéreu de Xixón llega a la so XVIII edición y, como siempre, con polémica. Les redes sociales enllenáronse mientres estos últimos díes de publicaciones faciendo crítica de lo que supón esti eventu pa los xixoniegos, mesmo que pa los visitantes braniegos de la ciudá.

    Y ye que, al atronador ruíu de los aviones que rescampla pelos barrios de Xixón, han sumase les prohibiciones que trai consigo. Ente elles, les de la prohibición del bañu na sablera de San Llorienzo, onde la xente nun pudo bañase mientres el día de güei y lo mesmo va pasar mientres l’eventu, esti domingu ente les 12 y les 15:30 hores.

    Asina lo reflexaben dellos usuarios nes redes sociales:

  • Salú activa’l máximu nivel d’alerta por altes temperatures n’Asturies

    Salú activa’l máximu nivel d’alerta por altes temperatures n’Asturies

    La Conseyería de Salú activó’l nivel d’alerta 3 (riesgu máximo) del Plan Nacional d’Actuaciones Preventives de los Efectos de los Escesos de Temperatura sobre la Salú 2024, énte les previsiones de l’Axencia Estatal de Meteoroloxía (Aemet), qu’establecen pa mañana temperatures máximes que van superar los 25 graos na contorna del Suroccidente y nos Picos d’Europa.

    La previsión de l’Aemet ye que les altes temperatures sigan hasta rematar el mes, algamando máximes de más de 29 graos nel suroccidente mientres el domingu, y temperatures per enrimb de los 34 graos el llunes.

    Les autoridaes sanitaries aconseyen a tola población que se protexa de les radiaciones solares, s’hidrate y evite’l consumu de bébores alcohóliques. Amás, aportunen na protección a la población más vulnerable al calor, esto ye, a quien sufren enfermedaes cróniques o trabayen al campu y a los neños y neñes.

    Tamién encamienten que se caltengan fríos los alimentos, yá que col calor aumenta’l riesgu d’infecciones alimentaries.

    La Dirección Xeneral de Salú Pública yá unvió a los centros sanitarios, a la Conseyería de Derechos Sociales y Bienestar y a la Federación Asturiana de Conceyos (FACC) la documentación, qu’inclúi los siguientes encamientos sanitarios énte esta situación d’altes temperatures:

    • Beba agua y líquidos con frecuencia, anque nun sienta sei y con independencia de l’actividá física que realice.
    • Evite les bébores con cafeína, alcohol o bien azucaradas, yá que pueden favorecer la deshidratación.
    • Anque cualquier persona puede sufrir un problema rellacionáu col calor, empreste especial atención a bebés y menores, lactantes y muyeres xestantes, mesmo qu’a persones mayores o con enfermedaes que puedan agravase col calor (como les enfermedaes cardiaques, renales, diabetes, hipertensión, obesidá, cáncer, patoloxíes qu’amenorguen la movilidá, demencia y otres enfermedaes mentales, asina como l’abusu de drogues o alcohol).
    • Permaneza’l mayor tiempu posible en llugares frescos, a la solombra o climatizaos, y enfrésquese cada vegada que lo precise.
    • Procure amenorgar l’actividá física y evite realizar deportes al aire llibre nes hores centrales del día.
    • Use ropa llixero y que dexe trespirar.
    • Nunca dexe a nenguna persona nun vehículu aparcáu y zarráu (especialmente a persones menores d’edá, mayores o con enfermedaes cróniques).
    • Consulte al so profesional sanitariu énte síntomes que s’enllarguen más d’una hora y que puedan tar rellacionaos coles altes temperatures.
    • Caltenga les sos medicines nun llugar frescu; el calor puede alteriar la so composición y los sos efectos.
    • Faiga comíes llixeres qu’ayuden a reponer los sales perdíos pol sudu (ensalaes, frutes, verdures, zusmios, etc.)
  • Rescaten a un montañeru na ruta del Retriñón, n’Ayer

    Rescaten a un montañeru na ruta del Retriñón, n’Ayer

    A primer hora d’esta mañana alcontróse, en perfectu estáu, a un montañeru de 53 años que se desorientó cuando realizaba la ruta del Retriñón, n’Ayer. El montañeru foi alcontráu tres contactar, a les 07.44 hores, col 112 y por mediu d’esta llamada pudo asitiase’l so allugamientu coles coordenaes facilitaes pol so propiu teléfonu móvil al traviés del AML.

    Dende esta madrugada efectivos de Bomberos del Serviciu d’Emerxencies (SEPA), 4 bomberos-rescatadores del Grupu de Rescate, 4 efectivos de la Unidá Canina, Unidá de Drones y un bomberu de Llamorgal y personal del GREIM movilizáu pola Guardia Civil buscaben al montañeru dende que se denunció la so desapaición a les 00.40 hores al Centru de Coordinación d’Emerxencies del 112 Asturies.

    Nel avisu esplicaben que nun sabíen nada d’él dende ayeri xueves, a les 17.36 hores cuando falaren con él. Dende esi momentu nun contestaba a les sos llamaes. Esplicaron que yera un montañeru esperimentáu ensin problemes de salú.

    La Sala 112 del SEPA movilizó al Grupu de Rescate, a la Unidá Canina y la Unidá de Drones y comunicó lo asocedío a la Guardia Civil que les 02.05 informa que movilicen al GREIM.

    Una vegada na zona los equipos de Bomberos del SEPA establecieron dos equipos formaos por dos bomberos-rescatadores y dos efectivos de la Unidá Canina en caún d’ellos y estremáronse en dos rutes. Unos xubieron pela collada de Valencia pa facer rastrexu colos drones pela falda del Retriñón y l’otru xubió a pie pela collada de La Mozqueta.

    A les 07.44 hores el mesmu afectáu llamó al 112 y n’alcontrando’l so allugamientu AML facilitóse les coordenaes a la Guardia Civil que diba incorporar al rastrexu’l so helicópteru pa turnarse darréu col de Bomberos del SEPA.

    Según comunicó a les 08.46 hores la Guardia Civil, la borrina na zona taba faciendo abegosu l’accesu aéreu polo que’l personal va dirixir hasta’l montañeru a pie p’acompañalu a un llugar dende onde pudiera recoyelu darréu l’helicópteru.

  • Gijón Fútbol Femenino y UC Ceares denuncien los ataques del Patronatu Deportivu Municipal de Xixón

    Gijón Fútbol Femenino y UC Ceares denuncien los ataques del Patronatu Deportivu Municipal de Xixón

    Gijón Fútbol Femenino y UC Ceares tan acabantes d’espublizar un comunicáu na so web y redes sociales, nel que denuncien los ataques del Patronatu Deportivu Municipal de Xixón a los dos clubes y que dificulten enforma el llabor que desenvuelven na ciudá. D’esta manera, enumeren y desgranen una serie de socesos no que cinca a los clubes:

    • La retirada del conveniu que dende fai más de 15 años tenía l’UC Ceares y pol cual llevaba Xixón na so camiseta. Esti conveniu algamaba una cifra pequeña pero importante del presupuestu del club (6000€, alredor del 5%). Esta cantidá caltúvose mientres la temporada na que l’equipu tuvo na 2ª RFEF, ya que, siendo impropia de la categoría (otros conceyos sofitaron a los sos clubes con 10 o 20 veces más), los clubes entendieron nesi momentu que nel casu de Xixón un aumentu podría comprometer el presupuestu municipal y perxudicar a otres entidaes deportives de la ciudá. Agora, retírase dende’l PDM por un cámbeu de criteriu, según el Patronatu, ensin tener en cuenta esti fechu, ni la llabor social, ni la llaboral (contando’l club con mozos con ficha profesional dada d’alta en seguridá social) que se realiza y nun reconociendo l’estatus nacional de la 3ªRFEF. Amás, el retiru d’esi sofitu foi d’improvisu, ensin plazu pa poder optar a otres ayudes.
    • La retirada del conveniu de la sección de fútbol del Gijón Fútbol Femenino. Esta acción vien motivada teóricamente pol so descensu pero realizada enantes de que se confirme’l mesmu por posibles renuncies d’otros clubes, y ensin tener en cuenta que tal decisión sin preavisu puede provocar un pasu atrás en tola estructura organizativa y dificultar que l’equipu pueda recuperar la categoría cuanto enantes, amás de xenerar incertidume institucional y comprometer el so futuru. Pa más agraviu, en descensos d’otres entidaes en temporaes anteriores, siempres se-yos caltuvo los convenios mientres un tiempu, actuando como “fondos paracayíes”.
    • La cantidá del conveniu del Xixón Fútbol Femenín de Fútbol Sala. L’equipu xubió a 2ª División, segunda categoría del fútbol sala nacional, queda mui per debaxo de les ayudes que reciben otros equipos de la ciudá nuna categoría similar (recibirá menos del 50%).
    • La esclusión de les categoríes territoriales femenines de la llinia de sovenciones de Fomentu del Fútbol Base pa la presente convocatoria, categoríes nes que compiten los equipos B y C, xuveniles y cadetes respectivamente, al nun esistir categorías cadete nin xuvenil exclusivamente femenines. Esti cámbeu de criteriu xenera una inxusticia no que cinca al fútbol masculín y rompe un consensu que databa de fai más de una década.
  • Ardé Bogotá vuelve per tercer vez a Asturies esti 2024

    Ardé Bogotá vuelve per tercer vez a Asturies esti 2024

    El próximu 22 de setiembre, Arde Bogotá, ensin dulda la banda española de 2023 y 2024, va actuar nel recintu de La Ería n’Uviéu dientro de la programación de les fiestes de San Mateo. Los murcianos, los “Cowboys de l’A3” van venir presentando’l so últimu discu, col que nun dexen de recoyer la reconocencia de crítica y públicu. L’únicu grupu qu’escosó les entraes pa dos Wizink Center de Madrid en menos de cinco minutos, “Premio Ondas al Fenómenu Musical del Añu” o siendo condecoraos con seis premios de l’Academia de la Música. Son, ensin dulda, el mayor fenómenu musical n’España nos postreros quince años.

    La banda va visitar Asturies por tercer vez no que va d’añu. Primero, esfrutó del públicu asturianu nel VibraMahou Fest de Xixón y repitió nel Tsunami Fest, xubiendo al escenariu VibraMahou na segunda xornada del festival. Agora, la tercer cita va ser n’Uviéu y les entraes salen esti xueves 25 de xunetu.

  • Investigadores de la Universidá d’Uviéu presenten descubrimientos na conferencia más importante de Física de Partícules

    Investigadores de la Universidá d’Uviéu presenten descubrimientos na conferencia más importante de Física de Partícules

    Estos díes ta celebrándose en Praga la conferencia más importante en Física de Partícules qu’axunta cada dos años a los mayores espertos mundiales nesta materia. El Grupu de Física Esperimental d’Altes Enerxíes, integráu nel ICTEA y que los sos investigadores son miembros del Departamentu de Física de la Universidá d’Uviéu, fueron escoyíos pa presentar dalgunos de los resultaos más importantes llograos pol esperimentu CMS, unu de los detectores de partícules del Gran Colisionador d’Hadrones nel CERN, en Suiza. En particular, destaca la presentación de la primer midida del procesu de producción simultánea d’un bosón W y un bosón Z (procesu WZ) a la máxima enerxía enxamás rexistrada (13.6 TeV) nun acelerador de partícules. Estos dos bosones son mui masivos polo que la probabilidá de producilos simultáneamente ye pequeña, de lo que se deriva en parte la dificultá pa reparalu. Son los mediadores de la fuerza débil, una de les úniques cuatro fuerces qu’esisten nel universu. L’afayu, lideráu polos estudiantes de doctoráu Carlos Vico y Miguel Grueso, dirixíos por Bárbara Álvarez, Santiago Folgueras, Enrique Palencia y Pietro Vischia, foi escoyíu ente los principales resultaos de CMS nesta conferencia internacional. Anque l’esperimentu CMS lleva yá dos años tomando datos a una enerxía de choque de 13.6 TeV, el gran volume de los datos recoyíos, la so complexidá y la precisión que se busca, esplica que, hasta esti momentu, namás pudieron lliberase cinco resultaos. El Grupu de Física Esperimental d’Altes Enerxíes participa en trés d’ellos.

  • Cangas del Narcea prepárase pal Prestoso Fest

    Cangas del Narcea prepárase pal Prestoso Fest

    Cangas del Narcea volverá acoyer esti branu Prestoso Fest, unu de los festivales más especiales del país y que se caracteriza por combinar música y cultura nuna contorna natural inigualable.

    La séptima edición del festival va tener llugar los díes 1, 2 y 3 d’agostu y nella van participar casi una ventena de bandes y artistes nacionales ya internacionales que prometen convertir esta cita n’inolvidable.

    Asina, la primer fin de selmana de agostu de 2024, el públicu volverá cimblar con trés díes completos de muncha música y otres actividaes complementaries siempres con un gran valor cultural y pensaes con muncho mimu, pa enllenar a tolos asistentes de los valores esenciales colos que nació’l festival: contorna privilexada, compromisu cola naturaleza, impulsu de la economía local y diversidá ya inclusión, que se convirtieron nun leitmotiv y fixeron d’esta cita un acontecimientu totalmente distintu ente la gran ufierta esistente na temporada braniega.

    El prau de Las Barzaniellas, el Parador de Courias y el Patiu del Conceyu son los trés allugamientos nes que va sonar la música, siendo la primera d’elles onde s’asitie l’escenariu principal. Asitiáu a namás 2,5 quilómetros del centru de Cangas del Narcea, a la vera del ríu, ente montes y xunto a una de les viñes más impresionantes de la zona, hasta equí llégase a pie al traviés de la Ruta del vinu, un preciosu senderu que trescurre paralelu al calce del ríu Naviego.

    El cartel d’esta nueva edición va tar protagonizáu por Nacho Vegas, Pony Bravo, Kokoshca, Pingüino, Tania Pereira, Los Míticos del Chimborazo, Los Bitchos, Triángulo de Amor Bizarro, Viva Belgrado, Belako, AK/ DK, Pablopablo, Repion, Los Manises, Pablo und Destruktion y La tribu del Trueno, Perarnau IV y feat Drama AV Set.

    Las Barzaniellas contará también con el Escenario Mini Autosa, pel que van pasar los DJ´s Anto Vicente, Betumen CanelaParty, Maribel & Sebastian, ⁠Manu Delia, ⁠Mondo Insonoro djs, ⁠Javi Ferrara, Sandra Dee, Lucía Dilema, Copitropical, Jan the dj, Ayuken dj, Centolo weekender djs y Lenttach dj.

    Como n’ediciones anteriores, l’Escenariu Momentos Alhambra, asitiáu nel Patiu del Conceyu, volverá ufiertar conciertos gratuitos pa dexar a los residentes y visitantes averase al festival y esfrutar de la música en directu.

    Coles mesmes, Prestoso Fest volverá cuntar con un completu programa d’actividaes complementaries rellacionaes cola gastronomía, la naturaleza, les costumes, el turismu, la cultura y l’enoloxía de la zona, amuesa una vegada más del compromisu del festival col territoriu.

    Les entraes de día y los abonos d’esti festival, que vuelve tener el sofitu de Cerveces
    Alhambra, nel marcu del so apueste por crear esperiencies musicales úniques pensaes pa esfrutar posao y colos cinco sentíos, tán a la vienta en www.prestosofest.com y con descuentos de 20€ pa quien tean en posesión del Carné Nuevu Européu (unidaes llendaes).