Xixón al día

Autor: xixonaldia

  • Ayudes dende 400€ y hasta 1500€ pa consiguir el carné de conducir

    Ayudes dende 400€ y hasta 1500€ pa consiguir el carné de conducir

    La Conseyería d’Ordenación de Territoriu, Urbanismu, Vivienda y Derechos Ciudadanos, al traviés de la Dirección Xeneral de Mocedá, publica güei nel Boletín Oficial del Principáu (BOPA) la convocatoria pa la concesión de sovenciones pal llogru de permisos de conducir. Estes ayudes tán destinaes a moces d’ente 18 y 30 años inscritos nel Sistema Nacional de Garantía Xuvenil.

    Pa la convocatoria d’anguaño, el Gobiernu d’Asturies aumentó l’importe de la partida presupuestaria. D’esta miente, aumenta la cuantía na sovención individual pal llogru de permisos de les clases B, C y D, según l’algame a los posibles destinatarios. En concretu, l’importe global máximu de la convocatoria xube a 149.100 euros.

    Les partíes individuales asignaes van sirvir pa que los beneficiarios o beneficiaries puedan abonar los gastos facturaos pola escuela de conducción, los costos de la emisión del informe d’aptitú psicofísica, según l’abonu de la tasa de tráficu. De siguío, detállase l’importe asignáu pa cada tipu de permisu:

    Clase B: coches y vehículos llixeros. Permisos: B, B+Y. 400 euros.

    Clase C: camiones. Permisos profesionales: C, C1, C+Y, C1+Y. 1.000 euros.

    Clase D: autobuses. Permisos profesionales: D, D1, D+Y, D1+Y. 1.500 euros.

    L’oxetivu ye ameyorar les posibilidaes d’empleabilidá de les persones moces empadronaes n’Asturies con una antigüedá mínima d’un añu, que nun s’atopen en procesos de formación, nin trabayando por cuenta propia o ayena; y qu’amás cumplan los requisitos establecíos na citada convocatoria.

    “Con esta iniciativa pretendemos sofitar a un sector vulnerable, como son les persones inscrites nel Sistema de Garantía Xuvenil. Queremos consiguir la so incorporación al mercáu llaboral pa poder crear cohesión social”, esplicó’l director xeneral de Mocedá, Francisco de Asís Fernández.

    El plazu pa la presentación de les solicitúes remata’l próximu 23 de xunetu.

  • Ésitu rotundu del VESU con Xoel López y Fillas de Cassandra

    Ésitu rotundu del VESU con Xoel López y Fillas de Cassandra

    Tres una intensa fin de selmana de conciertos y actividaes, el VESU pon puntu final a una edición esitosa cargada de música y diversión qu’animaron Uviéu y Güeñu. El festival arrancó cola actividá en collaboración con Puru Remangu, «Un VESU embaxo l’horru,» una visita guiada por Güeñu que remató con un conciertu de Leticia Baselgas, poniendo’l ramu a una xornada cultural enriquecedora.

    La nueche siguió en Güeñu coles actuaciones de La Milagrosa, Tatta & Denso, Derby Motoreta’s Burrito Kachimba, y Johnny Garso, quien cerraron el primer día de conciertos con una enerxía contaxosa que fixo baillar y cantar a tolos asistentes.

    El sábadu, la música del VESU empezó ceo con una animada sesión vermut n’Uviéu. Pela nueche, los conciertos tornaron a Güeño con conciertos como’l de Fillas de Cassandra, el grupu gallegu que sorprendió al públicu al dirixise n’asturianu en delles ocasiones. Unu de los conciertos más esperaos foi’l de Xoel López, quien, magar d’engarrase nuna inesperada batalla colos mosquitos, ufiertó una actuación memorable.

  • Alejandro Braña gana’l premiu Comité Español d’Hestoria del Arte por un trabayu sobre arquitectura nel franquismu

    Alejandro Braña gana’l premiu Comité Español d’Hestoria del Arte por un trabayu sobre arquitectura nel franquismu

    Un estudiu de la Universidá d’Uviéu sobre la influencia de los hermanos Somolinos na arquitectura asturiana, desenvueltu pol estudiante Alejandro Braña Barcia, alzóse col premiu del Comité Español d’Hestoria del Arte (CEHA) al meyor Trabayo Fin de Máster (TFM) del añu 2023. El galardón destaca’l rigor de la investigación y el maduror na redacción que presenta l’estudiu, tutorizáu pola caderalga n’Hestoria del Arte María del Pilar García Cuetos.

    El trabayu, tituláu Somolinos arquitectos: les obres pa Valle, Ballina y Fernández, céntrase na parte más desconocida d’un estudiu que caltuvo la so actividá ente los años 1934 y 1975 y al que s’atribúin grandes proyectos como Perlora, la Casa Sindical d’Uviéu o l’edificiu del cine Aramo. Con él, Braña remató’l Máster Universitariu n’Estudios Avanzaos n’Hestoria del Arte: Investigación y Xestión.

    Gracies a esta reconocencia, el TFM d’Alejandro Braña Barcia va ser publicáu na páxina web
    del CEHA. Amás, va recibir un premiu económicu, un diploma acreditativu y la inscripción al Comité Español d’Hestoria del Arte mientres dellos años. La Xunta Directiva del CEHA decidió por unanimidá premiar el trabayu del estudiante de la Universidá d’Uviéu, que destacó sobre’l restu de les candidatures.

    El galardón va ser apurríu nel marcu del XXV Congresu del Comité Español d’Hestoria del Arte, que se va celebrar en Murcia ente’l 30 de setiembre y el 3 d’ochobre de 2025, dáu’l so calter biañal.

    “Ye un prestu enorme, un premiu que reconoz l’esfuerzu y la dificultá d’encarar un tema pocu tratáu primeramente”, celebra l’estudiante de la Universidá d’Uviéu. Alejandro Braña Barcia pon en valor, amás, que la so investigación xira alredor d’Asturies y a una parte de la so hestoria qu’anguaño sigue desenvolviendo nel programa oficial de Doctoráu n’Hestoria del Arte y Musicoloxía. La so tesis va siguir centrándose nel llabor de los hermanos Somolinos. “Quédanos entá muncho camín y elementos interesantes por afayar y poner en valor”, apuesta.

  • Telecable Hockey Club y gobiernu d’Asturies firmen un alcuerdu de patrociniu

    Telecable Hockey Club y gobiernu d’Asturies firmen un alcuerdu de patrociniu

    El gobiernu d’Asturies va apurrir 40.000 euros al Telecable Hockey Club, por aciu un contratu de patrociniu col que l’equipu va promocionar la imaxe d’Asturies nel esterior. L’Executivu autonómicu anueva asina’l so sofitu al equipu, al que yá sofitó nel so desplazamientu a Arxentina pa disputar la Copa Intercontinental el pasáu febreru.

    L’alcuerdu cerróse tres la xunta celebrada güei ente la vicepresidenta Gimena Llamedo y el director xeneral de la entidá, Fernando Sierra. Nel alcuentru tamién participaron Marta Piquero y Sara Lolo, dos de los xugadores que tán convocaes pola selección nacional de hockey patinos pa los World Skate Games 2024, que se van disputar en Novara (Italia) del 16 al 22 de setiembre. Nesta cita internacional tamién va participar Sara Roces.

    “Somos conscientes de la importancia d’esti equipu, non yá a nivel deportivu, sinón tamién pa la proyección de la imaxe d’Asturies ellí onde va a lo llargo de la temporada. Amás, estes deportistes son tou un exemplu porque caminen con pasos de xigante pa qu’otres neñes puedan correr. Son referentes dientro y fuera del deporte”, señaló Gimena Llamedo.

    Les xugadores del Telecable van ocupar un llugar destacáu, amás, nel documental sobre la hestoria del deporte femenino na comunidá qu’impulsa l’Institutu Asturianu de la Muyer en collaboración cola Radiotelevisión del Principáu d’Asturies (RTPA). El proyectu audiovisual tien como oxetivu promover la igualdá y prevenir la violencia de xéneru, mesmo que fomentar estos valores na sociedá.

    La película documental, xunto con de conteníos audiovisuales pa redes sociales, va sirvir como ferramienta educativa y de sensibilización pa inspirar a les neñes na práctica deportiva.

  • El PSOE pide a Carmen Moriyón qu’acredite’l reintegru de los fondos públicos qu’esvió de manera indebida

    El PSOE pide a Carmen Moriyón qu’acredite’l reintegru de los fondos públicos qu’esvió de manera indebida

    El PSOE pide a Carmen Moriyón qu’acredite’l reintegru de los fondos públicos qu’esvió de forma indebida, como indica la sentencia del Tribunal de Cuentes. La conceyala y vocera axunta del Grupu Municipal Socialista nel Conceyu de Xixón, Carmen Eva Pérez, afirma que nun hai constancia d’esi pagu y pide qu’enseñe’l documentu que lu xustifique si ye que realmente lo fixeron. “Siguimos ensin tener constancia de que se realizara la devolución de la cantidá oxetu de la condena a les arques municipales, 31.314’29 € más intereses. Solo pidimos que faiga lo que fadría cualquier persona nesta ciudá: que lo demuestre. Ye tan cenciello como eso y asina esta parte del alderique quedaría atayada”, apunta.

    Pa los socialistes, l’alcaldesa Carmen Moriyón tien d’actuar cola máxima exemplaridá atendiendo al cargu que representa: la máxima autoridá d’esti conceyu. Poro, tien de probar la devolución del dineru públicu, aseguren, de la que señalen que nunca se meteríen na vida privada de la ciudadana Carmen Moriyón, si trabaya o non na empresa privada, cuántos trabayos tien o cuánto cobra en caún y si percibe o non dietes, pero tamos falando de l’alcaldesa d’esti conceyu y toes eses cuestiones pasen a ser d’interés xeneral.

    Nesi sentíu, Pérez Ordieres respondió a les pallabres d’Adrián Pumares, secretariu xeneral del partíu de l’alcaldesa, Foro Asturies, y diputáu nel Parlamentu asturianu, quien acusó a los socialistes d’actuar con odiu. “El llabor de la oposición ye la del control del gobiernu y eso ye lo que tamos faciendo dende’l Grupu Municipal Socialista: exercer con rigor el cometíu pol que tamos equí. Ye curioso qu’Adrián Pumares nun lo sepa porque lleva tola so vida política na oposición. ¿A qué se dedica entós? ¿Qué ye lo que fai? ¿Cuálos son les sos entrugues? Nós preguntamos por esto, poles cuestiones públiques del Conceyu».

  • Les sableres de La Griega (Colunga), Bañugues (Gozón), Cueva (Valdés) y Po (Llanes) alcanzan por primer vez la escelencia sanitaria

    Les sableres de La Griega (Colunga), Bañugues (Gozón), Cueva (Valdés) y Po (Llanes) alcanzan por primer vez la escelencia sanitaria

    Les agües de nueve de cada diez sableres asturianes son escelentes pal bañu, la máxima calificación sanitaria que se concede na Unión Europea, según los analises selmanales realizaos de xunu a setiembre nes últimes cuatro últimes temporaes (2020-2023).

    Los resultaos llograos pol Llaboratoriu de Salú Pública ratifiquen que’l 91,78% de les zones de bañu presenten esta calificación, que foi algamada per primer vegada polos arenales de La Griega (Colunga), Bañugues (Gozón), Po (Llanes) y Cueva (Valdés).

    Esti llaboratoriu encárgase de recoyer amueses d’agua en 73 puntos, distribuyíos en 63 sableres de 19 conceyos. Mientres la temporada braniega analícense semanalmente los datos y el conxuntu de midíes determina la calificación añal que s’otorga a cada zona. El llaboratoriu cunta cola máxima acreditación p’analizar tol procesu, dende la recoyida pal muestréu hasta’l so estudiu posterior.

  • Ciencia va poner en marcha un llaboratoriu abiertu sobre ciberseguridá l’añu viniente

    Ciencia va poner en marcha un llaboratoriu abiertu sobre ciberseguridá l’añu viniente

    El gobiernu d’Asturies trabaya na puesta en marcha d’un llaboratoriu abiertu en ciberseguridá a lo llargo del próximu añu. El conseyeru de Ciencia, Empreses, Formación y Empléu, Borja Sánchez, indicó que ta previsto licitar el proyectu a finales d’esti exerciciu pa que pueda tar operativu en 2025, al igual que les convocatories d’ayudes a la formación y a la creación d’empreses nel ámbitu de la seguridá dixital.

    D’una parte, el proyectu de llaboratoriu abiertu ye una actuación singular, que forma parte del programa Retech y cuenta con financiamientu européu. Ta dirixida a empreses ya investigadores pa que puedan probar tecnoloxíes aplicaes a la seguridá dixital.

    La Conseyería de Ciencia tien previsto pa esti añu un financiamientu de 1,5 millones. Anguaño trábayase na ellaboración de los pliegos, de cara a la so publicación a finales d’añu. L’oxetivu ye qu’en 2025 pueda ponese en marcha esti equipamientu y activar, amás, les convocatories d’ayudes que tán previstes nel programa Retech.

    La iniciativa incluye tamién beques y ayudes a la formación, amás de financiamientu pa la creación y aceleración d’Empreses de Base Tecnolóxica (EBT), nun apueste importante por reactivar el texíu granible con compañíes emerxentes nel ámbitu de la seguridá dixital.

    El conseyeru aludió tamién na so intervención al proyectu rellacionáu cola economía del datu y cola seguridá dixital que se preve instalar n’instalaciones de l’antigua esplotación minera del pozu San Jorge, n’Ayer. Borja Sánchez esplicó que les vieyes mines son equipamientos con característiques aparentes pa esti tipu d’equipamientos, que riquen agua pa refrixeración en grandes cantidaes y muncha enerxía.

    L’oxetivu ye disponer d’una instalación singular qu’ufierte a les alministraciones d’Asturies soluciones tecnolóxiques, garantice la ciberseguridá y faiga posible trabayar con intelixencia artificial, big data o l’internet de les coses (IoT). Esti proyectu, precisó, va ser el xerme de la nube asturiana”.

    Sánchez punxo de relieve la posición d’Asturies como polu activu nes nueves tecnoloxíes venceyaes al datu y a la ciberseguridá. Respectu al Kit Dixital, un programa del que se faló nel congresu de Xixón, ta impulsáu pol Gobiernu d’España al traviés de Rede.es con fondos Next Generation. La iniciativa dexó ameyorar la digitalización de 10.000 empreses y movilizó 25 millones d’euros n’Asturies.

  • Johnny Garso: «Quiero siguir faciendo música contra vientu y marea»

    Johnny Garso: «Quiero siguir faciendo música contra vientu y marea»

    Cada vez suena más fuerza’l nome de Johnny Garso perdayuri y ye qu’esti cantante lleva enforma percorríu dientro de la escena de punk-rock. Empezó la so carrera col grupu Alíen Roots y va unos años empezó la so carrera en solitariu. El mesmu defínese como una persona valiente, lluchador bien emocional, curiosu y vividor.

    Pasar de tocar nuna banda a llanzase como solista nun ye fácil, pero Johnny supo caltener daqué bien importante: «Sigo calteniendo l’espíritu de banda colos mios amigos y ye daqué bien importante pa mi, sentime en banda». Anque agora tea al frente en solitariu, la so conexón colos sos compañeros sigue siendo fuerte, reflexando’l so amor pola camaradería y el trabayu n’equipu.

    La principal razón que llevó a Johnny a entamar la so carrera en solitariu foi’l so infrayable deséu de siguir creando. «Siguir faciendo música contra vientu y marea. A la fin, el mio primer proyectu morrió pel so propiu camín y yo precisaba siguir faciendo música; ye la mio obra y lo que-y da sentíu a la mio vida», cúntanos. Johnny Garso inspírase d’esperiencies fondamente personales pa crear la so música. «Ye absolutamente biográficu y personal», diz sobre’l so procesu creativu. Anque nun tien un estándar concretu, suel predominar la música primero que la lletra. Ente los artistes y bandes qu’influyeron nel so estilu musical, Johnny menta una llista variada: «Polo xeneral toi influyíu por tola evolución qu’esperimentó’l hardcore y el primera punk-rock escontra soníos más melódicos, y tola evolución nel emo y el post hard-core, bandes infinites pero «Basement», «Title Fight», «Tiger’s Jaw», «Blink-182», «The Used» o «Linkin Park». Estes influencies refléxense nel so distintivu soníu punk-rock que combina intensidá y melodía.

    El primer discu en solitariu de Johnny Garso, «REDTIMELINE», producióse en California, una aventura motivada pola so relación con Joe Marlett y la oportunidá de siguir aprendiendo d’él fueron les principales razones detrás d’esta decisión. Trabayar con Marlett, quien tamién produció’l primer álbum de la so primer banda, foi un privilexu y una esperiencia d’aprendizaxe. «Madurecí musicalmente a marches muncho más rápides que de cualesquier otra manera», afirma Johnny. El cambéu a cantares n’español nel so segundu discu en solitariu foi una resultancia natural de les circunstancies de la vida. «La vida por sí mesma, la pandemia, el dolor naquel momentu, fueron munches coses que se xuntaron y acabaron eclosionando», revela Garso.

    El vienres 21 de xunu, Johnny Garso va actuar nel festival del VESU n’Uviéu, un festival onde ta presente Vibra Mahou, la plataforma de música de Mahou Cinco Estrellas que xenera alcuentros al rodiu del directu, prometiendo una actuación llena d’enerxía y emoción. «Bien de enerxíes, sensaciones, ganes de saltar, de rir, de llorar; van sentise munches coses sobre manera», afirma Garso. Esti eventu ye una oportunidá pa los fans d’esperimentar de cerca la intensidá y autenticidá que caractericen les sos actuaciones.

    Johnny va dar fin a la so xira “Espada y rosa hasta que muera” el próximu 30 de payares en Madrid, pero los sos planes nun se detienen ende. «Doble álbum, bien de música, una gran hestoria que cuntar y siguir tocando en tolos sitios que pueda», adelantra sobre los sos futuros proyectos. Con una visión clara y una pasión perenal, Johnny Garso sigue’l so viaxe musical, llevando’l so arte a nuevos altores y tocando los corazones de los sos siguidores.

  • El Ministeriu de Cultura empecipia los trámites del procedimientu pa la estinción de la Fundación Nacional Francisco Franco

    El Ministeriu de Cultura empecipia los trámites del procedimientu pa la estinción de la Fundación Nacional Francisco Franco

    El Ministeriu de Cultura alcordó empecipiar un periodu d’actuaciones previes cola cuenta de llograr la información y elementos de xuiciu que puedan motivar l’entamu del procedimientu pa encamentar xudicialmente la estinción de la Fundación Nacional Francisco Franco. L’alcuerdu foi robláu pol ministru de Cultura, Ernest Urtasun.

    El procedimientu va desenvolvese en trés fases. La primera, l’entamu d’actuaciones previes qu’agora empieza, consiste nel pidimientu d’informes a la Secretaría d’Estáu de Memoria Democrática y al Rexistru de Fundaciones de competencia estatal. La segunda va ser l’apertura del procedimientu, qu’empezaría cola comunicación del espediente a la mentada fundación y l’apertura del correspondiente periodu d’allegamientos. A lo último, solicitaríase un informe a l’Abogacía Xeneral del Estáu, a partir del cual el Ministeriu de Cultura ellaboraría un resolvimientu pa encamentar xudicialmente la estinción. Finalmente, el resolvimientu del procedimientu va ser decisión de los xueces.

  • LLABoral celebra’l Día Européu de la Música con cuatro proyectos de residentes

    LLABoral celebra’l Día Européu de la Música con cuatro proyectos de residentes

    El Día Européu de la Música llega’l vienres 21 de xunu a Llaboral Centru d’Arte con una programación qu’apuesta pol talentu nuevu n’Asturies. Pa la ocasión, artistes qu’anguaño tán desenvolviendo les sos residencies nel Llaboratoriu de Soníu —nel contestu de la I Convocatoria de Residencies Artístiques 2024—, van presentar tolos detalles sobre los sos proyectos, procesos creativos y, amás, van amosar les sos pieces musicales en directu mientres esta xornada de Open Studios. L’eventu va tener llugar ente les 18:30 y les 21:30 nel Llaboratoriu de Soníu.

    Miguel Palou (Dolce Fueos) toma como base pa la so triloxía sonora la mitoloxía y bestiariu
    asturianu, amás de la so relación cola redolada natural, emprestando especial atención a les lleendes y costumes del territoriu. El proyectu bautizáu como Quien escucha su nombre oye ye un tributu a los relatos que muyeres y homes cuntaben nos sos llares, de pueblu en pueblu, al calor de les fogueres o col telón sonoru del agua. Asina mesmo ye una manera de devolver, dende un prisma personal, les lleendes al públicu y que’l públicu pueda volver crear al traviés de la música y les imaxes.

    FIG. 8, el grupu de música esperimental formáu por Pablo Mata, Omar Caunedo y Jaime
    García, va amosar el so trabayu El silencio de Euterpe: sonido y huella en la época de la
    postmúsica. El proyectu tien como oxetivu la creación d’instalaciones sonores úniques
    in situ, atendiendo a la interacción ente espaciu, soníu ya imaxes.

    Jonás de Murias va presentar SMVel (Sistemas de Mantenimiento de Verdad e Impostura), un proyectu que tien como oxetivu la ellaboración de pieces sonores a partir de grabaciones de campu, testos atopaos y retayos de partes ‘residuales’ de material d’archivos de música tradicional. Busca alcontrar y poner el focu nos resquiebros causaos a la d’archivar/institucionalizar/folclorizar los oxetos culturales.

    David Alonso (Llevólu’l Sumiciu) con Pixeirada propón una esperiencia audiovisual inmersiva na que patrimoniu ya innovación conviven. El proyectu funde’l vídeu con ritmos electrónicos y la tradición musical asturiana, xuniendo d’esta forma’l pasáu col presente y animando al espectador a esperimentar de forma sinestésica les formes nes que podemos ver la música o escuchar les imaxes.