El Gobiernu asturianu va aumentar en 231.000 euros el presupuestu pal plan d’actuación y control de l’aviespa asiática (Vespa velutina nigrithorax). La partida p’anguaño xube a 481.000 euros. Esta midida va dexar retirar tolos niales que s’avisaron, rebaxar los tiempos de respuesta y adelantar el trampéu. Esti esfuerciu pa lluchar contra la espansión de la plaga supón triplicar el presupuestu inicial pal 2019, afitáu de mano en 150.000 euros, cola mira d’aumentar los equipos que s’encarguen de la verificación y eliminación de los niales, y dotase de medios y materiales.
Anguaño, el númberu de niales destruyíos aumentó nun 300 % al respective del 2018. Los fondos nuevos van dexar agora facer frente a la destrucción de 2.000 más de los previstos, colo qu’a últimos d’añu cúntase algamar los 5.000 niales.
Otra manera, esta movilización de recursos adicionales va ayudar a siguir amenorgando progresivamente los tiempos medios de respuesta. Nesti sentíu, implantóse un sistema de clasificación que da prioridá a aquellos niales que suponen más riesgu pa la población y l’actividá económica, frente a los asitiaos en sitios apartaos y a munchu altor. Asina, nuna escala de 1 a 4, el nivel 1 ye’l de prioridá máxima. Esti modelu desenvuélvese de forma paralela a les actuaciones que, con calter inmediatu, realicen los servicios d’emerxencia en situaciones especiales.
Los tiempos de respuesta énte los avisos, a tenor d’esa escala, foron amenorgando dende los 10,38 díes de los recibíos n’agostu, a los 7,69 de setiembre y los 4,01 de los recibíos esti mes. La previsión ye que la movilización d’estos recursos adicionales dexe dir rebaxando los plazos progresivamente.
Trampéu de reines
Desenvolvimientu Rural autorizó’l trampéu de reines na fase anterior a la hibernación, hasta últimos d’añu, pa frenar la espansión de la especie. Amás, dende’l mes de setiembre, la conseyería entamó delles reuniones cola Federación Asturiana de Conceyos (FACC) y asociaciones del sector pa coordinar la llucha contra la plaga. Tocante al balance de les actuaciones realizaes, recibiéronse 3.777 notificaciones de niales, de los que se verificaron 3.265 y se desaniciaron 2.696. Del total, nunos 500 casos trátase d’otres especies.
