El presidente asturianu, Adrián Barbón, y el director xeneral de la Corporación Alimentaria Peñasanta (Capsa), José Armando Tellado, coincidieron esti miércoles en que la marca Asturies va salir reforciada de la crisis sanitaria actual. “Asturies ta asociada a calidá, seguridá y sostenibilidá, valores bien importantes p’asegurar l’enfotu de los consumidores”, afirmó’l xefe del Gobiernu. Barbón y Tellado caltuvieron una xunta por videoconferencia na que tamién participó Alejandro Calvo, conseyeru de Desenvolvimientu Rural. Mientres l’alcuentru, analizaron la situación del sector primariu y el papel que ta desempeñando la industria agroalimentaria mientres l’estáu d’alarma.
Caltener la cadena alimentaria pa evitar el desabastecimientu foi una esmolición constante desque empezó’l confinamientu. Nesti contestu, la contribución de l’agricultura, la ganadería y tol sector agroalimentariu resultó decisiva. Tanto Barbón como Tellado y Calvo consideren que’l comportamientu de tolos profesionales merez un aponderamientu públicu: “hai que reconocer el so valor y el so compromisu”, manifestó’l xefe del Gobiernu.
Los trés compartieron tamién la so valoración sobre la marca Asturies. “Los productos asturianos tán asociaos a cualidaes bien determinaes: a seguridá, a sistemes d’esplotación sostenibles y, por supuesto, a calidá. Toes elles redunden nel enfotu de los consumidores, daqué esencial nestes circunstancies”, resumió Barbón. Al so xuiciu –al igual que pal director de Capsa y el conseyeru de Desenvolvimientu Rural–, la marca Asturies puede salir reforciada d’esta crisis.
