El presidente d’Asturies, Adrián Barbón, evaluó güei’l grau d’execución de los 25 compromisos asumíos pal añu 2024, que na so mayoría dio por cumplíos, anque reconoció la necesidá d’avanzar con más rapidez nel diseñu del plan especial que va dexar revitalizar l’antigua ciudá de vacaciones de Perlora, en Carreño.
“Cumplimos 17 na so integridá y parcialmente otros 7, pero nel casu de Perlora ye necesariu xubir una marcha más”, almitió.
Amás, mientres la so comparecencia recordó que cada mes de xineru tien por costume repasar los oxetivos del añu anterior, non como exerciciu de “autobombu”, sinón como mediu p’analizar críticamente los resultaos.
Nesti sentíu, el xefe del Executivu ufiertó detalles sobre los siete oxetivos que se cumplieron parcialmente, rellacionaos cola estensión de la rede de Les Escuelines/As Escolías, la renovación de determinaes infraestructures sanitaries, l’accesu a la Universidá pa toles families, la soledá ensin deseyar, la movilidá sostenible, la llegada de turistes estranxeros y les inversiones na estación d’esquí de Valgrande-Payares.
