El presidente d’Asturies comprometióse güei a dedicar tola llexislatura a reforzar l’estáu de bientar. “Va haber más presupuestu, meyor xestión y atención a les nueves necesidaes en sanidá, educación, vivienda y derechos sociales”, garantizó. Adrián Barbón encabezó esta mañana l’actu de firma de los documentos d’adhesión de conceyos y mancomunidaes al marcu de cooperación pal desenvolvimientu de les prestaciones sociales.
El Gobiernu d’Asturies aprobó’l 17 de mayu un gastu históricu de 272 millones p’asegurar un marcu estable de financiamientu a les entidaes locales hasta 2027. Ese nuevu marcu de cooperación articula’l financiamientu del plan alcordáu de prestaciones básiques de servicios sociales y de la encomienda de xestión del serviciu d’ayuda a casa y teleasistencia pa persones dependientes, que constitúin les principales ferramientes p’atender les necesidaes sociales en tol territoriu.
Los convenios suscritos busquen fortalecer la collaboración ente alministraciones y reflexen “el plenu enfotu d’Asturies na capacidá de los conceyos p’atender les necesidaes de la ciudadanía”, según precisó Barbón. “Son un finxu, un pasu más nel entendimientu institucional que practicamos n’Asturies pa facer política útil, la que resuelve les dificultaes”, amestó mientres la so intervención.
El xefe del Executivu tamién animó a “camudar el marcu mental” y entender l’avieyamientu de la población “como un desafíu que concierne a toles instituciones”. Coles mesmes, repitió que la llucha contra la soledá ensin deseyar de les persones mayores va ser unu de los oxetivos prioritarios d’esti mandatu.
“Estos convenios tienen de sirvir pa facer una sociedá meyor. Una Asturies na que toles persones mayores sepan que siempres hai daquién al otru llau, dispuestu a ayudar. L’Asturies qu’acueye, sofita y nun abandona a naide”, indicó.
