“Col esfuerciu conxuntu vamos superar la crisis»

El Principáu agradez la respuesta de les empreses asturianes na cesión de material de protección y control a les autoridaes sanitaries

0
75

El conseyeru d’Industria, Enrique Fernández, agradeció la collaboración de les empreses asturianes na crisis sanitaria pol nuevu coronavirus. Les compañíes tan obligaes a poner a disposición de les autoridaes sanitaries el material de protección disponible nes sos instalaciones. Ye una de les midíes del Gobiernu pa reforzar les midíes adoptaes pol Sistema Nacional de Salú pa facer frente a la crisis del coronavirus COVID-19 y garantizar la disponibilidá d’equipos de protección nel país. Al traviés d’una carta unviada a firmes asturianes dende la Conseyería d’Industria solicítase la información de contactu de los provisores d’esta clas de material y si existen circunstancies que torguen suministrar estos productos.

Fernández punxo en valor el compromisu de les empreses pa collaborar na resolución de la emerxencia sanitaria. El conseyeru ufiertó-yos el sofitu y respaldu del so departamentu. «Col esfuerciu conxuntu vamos superar esta crisis, vamos recuperar la normalidá y vamos menguar efectos indeseaos sobre l’actividá económica y l’empléu. Quedamos a la vuestra disposición», manifiesta na carta. Otramiente, destaca que munches empreses caltengan, «con non poques dificultaes”, la so actividá productiva na situación actual d’emerxencia sanitaria, polo qu’agradez el so esfuerciu.