Diez colexos asturianos empecipien güei la so participación nun programa de sensibilización medioambiental denomináu La mar d’aguamales, con científicos del Institutu de Ciencies del Mar del Conseyu Cimeru d’Investigaciones Científiques (ICM-CSIC). Esti proyectu educativu y divulgativu, que cunta col respaldu de la Conseyería d’Educación, tien como oxetivu promover la conocencia sobro l’impactu que les actividaes humanes xeneren nel mediu marín, la perda de biodiversidá y la proliferación de les aguamales.
Otru de los propósitos de La mar d’aguamales consiste en destacar una llinia d’estudiu puntera na que predomina la presencia d’investigadores, pa promover vocaciones especialmente ente neñes y moces, al traviés de la figura de científiques n’activu que pueden sirvir como modelu. Utilízase un exemplu llamativu, como ye la llegada d’aguamales a la sablera, pa trabayar dende un enfoque más cercanu.
El programa empieza güei n’Asturies, una de les dos comunidaes escoyíes xunto con Cataluña, con una fase de formación pal profesoráu. Mientres cinco selmanes, va recibir una introducción teórica sobre les aguamales y va conocer les causes antropoxéniques de la proliferación d’esta especie, amás del so efectu sobre l’ecosistema marín.
La siguiente fase va centrase nel trabayu directu na aula, lideráu pol profesoráu primeramente formao, xunto colos investigadores del equipu del proyectu, que va dar sofitu a les escueles y que va realizar un siguimientu constante de los trabayos.
La tercer etapa, si la situación sanitaria lo permite, va consistir na organización d’esposiciones y talleres presenciales con personal científico del ICM-CSIC. Al traviés de los microscopios, l’alumnáu va poder reparar nes distintes etapes del ciclu de la vida de les aguamales. Tamién se van programar talleres lúdicos y educativos.
La interacción directa ente’l personal investigador, el profesoráu y l’alumnáu va tratar de desfacer mitos y dar respuesta dende l’aguada científica a retos actuales como la crisis climática, la problemática del plásticu nos mares, la perda de biodiversidá o la sobresplotación de los recursos. Participen nel programa alredor de 326 alumnos y alumnes de quintu y sestu de primaria.
