¿Cómo donar lleche materno n’Asturies?

L'Hospital de Cabueñes va incorporase como centru satélite del bancu de lleche materno, allugáu nel Serviciu de Neonatoloxía del HUCA

0
705
¿Cómo donar lleche materno n'Asturies?
Donar lleche materno nel Hospital de Cabueñes yá ye posible. / Pixabay

L’Hospital de Cabueñes va incorporase como centru satélite del bancu de lleche materno, allugáu nel Serviciu de Neonatoloxía del Hospital Universitariu Central d’Asturies (HUCA). Cualquier muyer que tea dando de mamar al so fíu de forma satisfactoria, tea sana, tenga vezos saludables y quiera donar parte de la so lleche de forma voluntaria y altruista va poder facelo tamién nel centru xixonés.

Les interesaes tendrán d’allegase a la consulta del bancu de lleche materno d’Asturies pa realizar una entrevista na que la futura donante va rellenar y va roblar una encuesta de salú y estilu de vida, mesmo que un consentimientu informáu. Amás, va realizáse-y un analís de sangre pa refugar infecciones como VIH, hepatitis o sífilis. Pa inscribise como donante ye mester allegar col DNI y la tarxeta sanitaria. Tolos datos personales van ser trataos confidencialmente.

Tres la entrevista inicial, toles donantes van recibir información sobro la estracción, caltenimientu y tresporte de la lleche. La estracción puede realizase en casa o nel hospital si’l fíu ta ingresáu. La lleche estrayida va conxelase darréu y puede almacenase na casa hasta un máximu de 15 díes.

El bancu de lleche nun tien serviciu de recoyida. Les donantes tienen de llevar l’alimentu al HUCA o a los centros satélites allugaos nos hospitales de Cabueñes y San Agustín (Avilés). Puede apurrise n’Uviéu, nel bancu, los díes llaborables, de 8:30 a 14:30 hores y n’horariu de tardes y festivos na Unidá de Lactodietética. En Xixón, na Unidá de Neonatoloxía del Hospital Universitariu de Cabueñes de 13:30 a 15:00 hores en díes llaborables (pa otros horarios ye mester contactar primeramente per corréu electrónicu o teléfonu). N’Avilés va recoyer la Unidá de Neonatoloxía del Hospital San Agustín, de 10:00 a 14:30 hores los díes llaborables.