L’Hospital de Cabueñes incorpórase al bancu de lleche materno d’Asturies, allugáu nel Serviciu de Neonatoloxía del Hospital Universitariu Central d’Asturies (HUCA). Failo como centru satélite pa la recepción. Cualquier muyer que tea dando de mamar al so fíu y quiera donar parte de la so lleche va poder facelo nos hospitales universitarios de Cabueñes y San Agustín, amás de nel HUCA.
El bancu de lleche materno empezó a funcionar en xineru de 2017. Nesti tiempu permitió alimentar a más de 180 ñácaros hospitalizaos. El director xeneral de Salú Pública, Antonio Molejón, presentó esti miércoles l’ampliación d’esta iniciativa, qu’apurre lleche humano a los lactantes ingresaos qu’escarecen del alimentu de la so madre, especialmente neonatos prematuros y enfermos. Coles mesmes, dexa sofitar a les madres que quieran dar de mamar a los sos fíos, promocionar la lactancia y menguar los riesgos inherentes a l’alimentación artificial en ñácaros hospitalizaos.
Nestos bancos, la lleche humano donada por madres escoyíes procésase, almacénase y distribúyese. Una vegada pasteurizao pa menguar al máximu’l riesgu de tresmisión d’infecciones y so prescripción médica, l’alimentu alministráse a los neños hospitalizaos que lo necesiten. La lleche materno promueve’l desenvolvimientu sensorial y cognitivo, protexe de patoloxíes infeccioses y cróniques y amenorga la mortalidá infantil por enfermedaes. Por ello, la Organización Mundial de la Salú (OMS) encamienta la lactancia materna esclusiva nos primeros seis meses de vida y complementada con otros alimentos, siquier, hasta los dos años. La lactancia favorez la salú y el bienestar de la madre, ayuda a espaciar los embaranzos, amenorga’l riesgu de cáncer ováricu y mamariu, aumenta los recursos de la familia y resulta inocua para’l mediu ambiente.
¿Cómo puede donase?
Les interesaes tendrán d’allegar a la consulta del bancu de lleche materno d’Asturies pa realizar una entrevista na que la futura donante va rellenar y va roblar una encuesta de salú y estilu de vida, mesmo que un consentimientu informáu. Amás, va realizáse-y un analís de sangre pa refugar infecciones como VIH, hepatitis o sífilis. Pa inscribise como donante ye mester allegar col DNI y la tarxeta sanitaria. Tolos datos personales van ser trataos confidencialmente.
Tres la entrevista inicial, toles donantes van recibir información sobro la estracción, caltenimientu y tresporte de la lleche. La estracción puede realizase en casa o nel hospital si’l fíu ta ingresáu. La lleche estrayida va conxelase darréu y puede almacenase na casa hasta un máximu de 15 díes.
El bancu de lleche nun tien serviciu de recoyida, polo que les donantes tienen de llevar l’alimentu al HUCA o a los centros satélites n’Avilés y Xixón. Puede apurrise n’Uviéu, nel bancu, los díes llaborables, de 8:30 a 14:30 hores y n’horariu de tardes y festivos na Unidá de Lactodietética. En Xixón, na Unidá de Neonatoloxía del Hospital Universitariu de Cabueñes de 13:30 a 15:00 hores en díes llaborables (pa otros horarios ye mester contactar primeramente per corréu electrónicu o teléfonu). N’Avilés va recoyer la Unidá de Neonatoloxía del Hospital San Agustín, de 10:00 a 14:30 hores los díes llaborables.
