P’aprovechar los equipamientos disponibles y ufiertar espacios seguros y saludables pa la mocedá, la coalición d’IX – Más País – IAS plantega abrir los patios de los colexos públicos de la ciudá nel marcu del programa electoral.
La propuesta tien como oxetivu garantizar qu’adolescentes y mozos cunten con llugares onde socializar y faer deporte; ensin la obligatoriedá d’incluyir programes específicos o actividaes empobinaes pa poder esfrutar d’estos espacios.
“Trátase d’ufiertar espacios seguros pal ociu saludable y les actividaes que la mocedá quieran desenvolver. Los patios de los colexos son espacios seguros por definición”, indicó’l candidatu d’IX – Más País – IAS, Javier Suárez Llana. El candidatu de Convocatoria por Xixón indicó que nun se trata de crear nueves infraestructures, sinón d’aprovechar aquelles coles que yá cunta la ciudá. “El Conceyu, en coordinación colos mesmos centros educativos y les asociaciones vecinales, tendría d’habilitar estos espacios, nun puede ser qu’haya mocedá en Xixón que tengan que saltar la valla d’un colexu pa xugar nuna cancha porque l’espaciu ta zarráu y nun hai otru llugar onde xugar”, espresó Suárez Llana.
Para llevar a cabu esta propuesta, el candidatu a l’alcaldía indicó que pueden aprovechase tamién los equipamientos zarraos dende va años, como la ludoteca d’El Llano. Otra posibilidá ye establecer convenios con entidaes o asociaciones xuveniles que cunten con instalaciones propies como Mar de Niebla, en La Calzada; Cuantayá, en Contrueces; o Alambique, en Nuevu Xixón, La Braña y Perchera.
So la perspectiva de que la meyor manera de prevenir ye cola creación d’espacios seguros y para poner a prueba l’aprovechamientu de los patios, IX – Más País – IAS plantega la puesta en marcha d’un plan piloto a desenvolver en trés o cuatro colexos con facilitadores. “La idea ye qu’estos llugares funcionen como clubes sociales, llugares de referencia pa la mocedá”, esplicó Suárez Llana.
