Dos mancaos nun accidente de tráficu en Cuadonga

Los dos ocupantes salieron despidíos y cayeron por un desnivel unos 20 metros

0
812
Dos persones, un varón y una muyer, resultaron mancaos en sufriendo un accidente cola moto na que circulaben na redolada de Cuadonga. / SEPA
Dos persones, un varón y una muyer, resultaron mancaos en sufriendo un accidente cola moto na que circulaben na redolada de Cuadonga. / SEPA

Dos persones, un varón y una muyer, resultaron mancaos en sufriendo un accidente de tráficu cola moto na que circulaben, topetaron con una barandiella y cayeron por un desnivel, na redolada de Cuadonga, en Cangues d’Onís. El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuó al varón al Hospital Universitariu Central d’Asturies (HUCA). La muyer foi evacuada, pola ambulancia de soporte vital básicu de Ribeseya, al Hospital Comarcal de Les Arriondes. Según los datos facilitaos pol Serviciu d’Atención Médica Urxente (SAMU) por cuenta de más pruebes y hasta nueva valoración médica’l pronósticu de dambos ye reserváu.

El Centru de Coordinación d’Emerxencies recibió l’avisu a les 12:14 hores. Na llamada indicóse qu’había una moto cayida, xubiendo a la Basílica de Cuadonga, y cayeren por un desnivel y nun los víen. Darréu movilizóse al Xefe de Bomberos del SEPA de la Zona Oriental y a seis efectivos de Bomberos del SEPA, con base nel parque de Cangues d’Onís, que se treslladaron col furgón multisocorro y el vehículu primera salida, y al Grupu de Rescate de Bomberos del SEPA, a bordu de l’aeronave medicalizada.

Hasta nueva valoración médica’l pronósticu de dambos ye reserváu

Una vegada na zona, los bomberos aportaron hasta los mancaos. Al paecer, por cuenta del choque de la moto contra una barandiella, los dos ocupantes salieron despidíos y cayeron por un desnivel unos 20 metros. Los bomberos utilizaron la camiya nial para portear y sacar del llugar, hasta l’ambulancia al varón. Para ello los efectivos tuvieron qu’utilizar la radial para cortar ún de los barrotes y asina poder sacar hasta la calzada al mancáu. De siguío, n’inmovilizando a la muyer y el collarín, tamién la portearon y sacaron de la zona, cola tabla de rescate.

La sala del 112 del SEPA informó del sucesu a la Guardia Civil, a la Policía Local y al Serviciu d’Atención Médica Urxente (SAMU) qu’activó l’ambulancia de soporte vital básicu de Ribesella y l’ambulancia y el médicu d’Atención Primaria de Cangues d’Onís.