Magar de la rápida actuación de los bomberos de Xixón tres la cayida de parte del teyáu del Colexu San Vicente de Paúl, onde se taben faciendo obres, nun pudo evitase la traxedia. Dos homes, de 39 y 40 años, primos y de Mieres dambos, morrieron esta tarde embaxo los escombros del edificiu nel que trabayaben nuna reforma.

Otros dos homes mancáronse nel accidente, unu d’ellos con cierta gravedá, y fueron rescataos polos bomberos, qu’acordonaron la zona pa evitar posibles accidentes pola cayida d’escombros y el posible esbarrumbu de más partes del teyáu del edificiu nel que ta’l colexu concertáu.

Hasta’l llugar del accidente acercáronse tamién l’acaldesa de Xixón, Ana González, el Presidente d’Asturies, Adrián Barbón, y la conseyera d’Educación, Lydia Espina.

Barbón declaró nel propiu llugar del accidente la so solidaridá coles families y esplicó que taba en shock: «ye terrible, nun hai pallabres, agora quien correspuenda tendrá qu’esplicar qu’asocedió». Pela so parte la conseyera Espina tresmitió tamién la so solidaridá y sofitu «al centru y a tola comunidá educativa del colexu».