Representantes d’Ecoloxistes n’Aición, que ye la confederación de más de 300 grupos ecoloxistes de tol Estáu español, y de l’Academia de la Llingua Asturiana alcontráronse güei nel llar social de la Institución llingüística pa roblar un conveniu de collaboración ente dambes organizaciones. Tuvieron presentes, d’un llau, el presidente de l’Academia, Xosé Antón González Riaño y, del otru, una delegación de los ecoloxistes, formada por Luis Rico García Amado, Sixto Armán y Paco Ramos.
El documentu recueye’l sofitu d’Ecoloxistes n’Aición al procesu sociopolíticu empobináu a la oficialización de les llingües d’Asturies, comprometiéndose col so llogru efeutivu. Amás, el conveniu de collaboración espresa l’enfotu de los ecoloxistes n’ameyorar y caltener l’usu del asturianu nos sos llabores y actividaes diaries.
A l’Academia de la Llingua Asturiana corresponderá-y la xera d’asesoramientu na traducción y correición de testos. Amás, la institución académica collaborará na formación llingüística de los ecoloxistes y na organización d’actividaes culturales y educatives, d’interés llingüísticu, tales como conferencies, investigaciones y espublizaciones. Ecoloxistes n’Aición comprométese a siguir usando davezu l’asturianu como llingua de comunicación del coleutivu y fadrá de la so promoción ún de los sos oxetos d’aición.
Con esta collaboración, dambes organizaciones quieren, amás, valorar y fortalecer la rellación y la conexón esistentes ente el patrimoniu cultural y llingüísticu y el patrimoniu natural y ambiental.