La Conseyería d’Educación axudicó’l contratu para la redacción del proyectu de construcción del futuru Colexu Públicu de Nuevu Roces, en Xixón, por un importe de 164.874 euros. El concesionariu foi l’estudiu xixonés Jovino Martínez Sierra Arquitectos. El plazu d’entrega púnxose en cinco meses.
El proyectu tendrá d’incluyir, amás de la parte básica, el certificáu enerxéticu triple A y tamién l’adaptación del edificiu a les condiciones establecíes pol organismu GBCE para certificalu col sellu de 4 fueyes verdes, lo qu’implica que tanto los materiales como les instalaciones son afechos pal aforru d’enerxía, amenorgar les emisiones y curiar del mediu ambiente.
Este mesmu requisitu constructivu diferencial esixóse tamién en proyectos inauguraos, como’l IES de La Fresneda, en Siero, y n’otros apocayá axudicaos como’l IES Rei Pelayo, de Cangues d’Onís, y el IES de La Florida, n’Uviéu.
La conseyería considera qu’esti proyectu, que ta incluyíu dientro del programa Feder Asturies 2014-2020, ye necesariu pa dar respuesta a la demanda d’escolarización de Nuevu Roces, al tratase d’un barriu de nueva creación, con una población creciente, nel que nun esiste nengún equipamientu educativu que cubra la etapa obligatoria.
Educación presentó tamién apocayá’l proyectu del futuru Centru d’Innovación en Formación Profesional, que se va abrir nuna nave de La Llaboral, en plena Milla del Conocimientu, y que va suponer una inversión de 797.615 euros.
