La Conseyería d’Educación sacó güei a llicitación les obres de construcción del Colexu Públicu Nuevu Roces, de Xixón, que tienen un plazu d’execución de 24 meses. El presupuestu global xube a 18,1 millones, un gastu que foi autorizáu la selmana pasada pol Conseyu de Gobiernu.
Los trabayos pa edificar el nuevu equipamientu van contratar por aciu procedimientu abiertu y tramitación ordinaria. El plazu pa presentar ufiertes va permanecer abiertu hasta’l vienres 2 de xunu y la primer mesa de contratación pa conocer eses propuestes ta programada pal 5 de xunu.
L’actuación, que ta incluyida nel programa operativu del Fondu Européu de Desenvolvimientu Rexonal (Feder) 2021-2027, cunta con un financiamientu tresañal y la siguiente distribución: 696.724 euros p’anguaño, 10.886.850 pa 2024 y 6.607.126 pa 2025.
El CP Nuevu Roces –que’l so proyectu redactó l’arquiteutu asturianu Jovino Martínez Sierra- respuende a los criterios establecíos pol Principáu pa los nuevos equipamientos educativos: sostenibilidá y eficiencia enerxética, flexibilidá d’espacios, aplicación de metodoloxíes d’enseñanza innovadores y apertura a la comunidá. Eses traces yá s’aplicaron nel IES de La Fresnera y van caracterizar tamién les actuaciones en marcha en La Florida y La Corredoria, n’Uviéu.
El nuevu colexu xixonés va ocupar xuna superficie construyida de más de 10.000 metros cuadraos, distribuyíos en trés llantes sobre rasante y un suétanu, amás d’una pista deportiva semienterrada y cubierta con un planu verde y una grada.
El centru va constar de 9 aules d’Educación Infantil y 18 de Primaria, amás d’árees pa nueves tecnoloxíes, música y desdobles. Tamién va tar equipáu con un ximnasiu, vestuarios, comedor, biblioteca, salón d’actos con aforu pa 229 persones, sales de visita y despachos pa l’asociación de padres y madres y pal alumnáu.
Plena accesibilidá
El colexu va ser dafechu accesible y va incluyir ramples con un enclín inferior al 6%. Pa la redacción del proyectu atendiéronse les indicaciones específiques de colectivos como’l Comité Español de Representantes de Persones con Discapacidá (Cermi).
Esti equipamientu va atender les necesidaes d’unu de los barrios con mayor crecedera de Xixón y con una de les poblaciones más nueves d’Asturies. Yera, amás, una de les demandes de los colectivos vecinales d’esti distritu.
