La nueva xunta de gobiernu del Consorciu para la Xestión de Residuos Sólidos d’Asturies (Coxersa), constituyida esti miércoles, escoyó presidente al conseyeru de Mediu Ambiente, Juan Cofiño. La viceconseyera de Mediu Ambiente y Cambéu Climáticu, Nieves Roqueñí, va ser vicepresidenta.
La xunta de gobiernu ta constituyida por dos representantes del Principáu y otros dos por caún de los 78 conceyos miembros del consorciu. Asina, el 20% de la representatividá correspuénde-y al Gobiernu d’Asturies y el 80% restante a los conceyos, en función de la so población.
Coxersa dio na renovación de los sos órganos de dirección tres les elecciones autonómiques y municipales de mayu y tolos sos miembros fueron escoyíos por unanimidá. Amás, los integrantes de la xunta de gobiernu designaron a los miembros de la comisión delegada, órganu de gobiernu que va tar formáu pol presidente y la vicepresidenta del consorciu, los alcaldes de Gozón ya Illas, Jorge Suárez y Alberto Tirador, respectivamente; l’alcaldesa de Coaña, Rosana González y los conceyales Gerardo Antuña (Uviéu), Carmen Saras (Xixón) y Manuel Ángel Riola (Avilés).
Tamién fueron nomaos los representantes de la xunta de gobiernu en Proygrasa. Esta empresa, perteneciente a Coxersa, xestiona material específico de riesgu (MER), y Bioastur, compañía participada al 50% pol consorciu que produz enerxía eléctrica a partir del biogás del vertideru.
