El Conseyu Rector de la Mocedá retoma les sos sesiones tres más de dos años ensin convocase, concretamente dende avientu de 2021. El Gobiernu d’Asturies recupera esti órganu col enfotu de que les persones nueves participen nes polítiques que los afecten. Tamién busca ameyorar les condiciones pa qu’esti colectivu desenvuelva’l so proyectu de vida na comunidá.
Según esplicó Zapico, ente los motivos polos que la so conseyería quixo volver celebrar esti conseyu figura la intención de constituyir los grupos de trabayu que van diseñar el futuru Plan Estratéxicu de Mocedá d’Asturies. “Güei ponemos una piedra importante nesi camín de cooperación ente la mocedá asturiana y el Gobiernu d’Asturies”, afirmó.
Nesta primer xunta participó tamién el director xeneral de Mocedá, Francisco de Garráis Fernández, quien esplicó l’oxetivu de la sesión: “Trátase d’empezar a crear les bases d’un modelu integral que tenga visión al llargu plazu sobre cómo poner a la mocedá asturiana nel centru”. “Queremos facer d’Asturies un llugar nel que la mocedá pueda construyir un proyectu de vida”, añedió.
Tocantes a les principales exes d’actuación, citó l’actualización de la formación pa esti colectivu, afecha a les necesidaes de la industria por aciu la revalorización de la Formación Profesional (FP); l’apueste por un empléu calidable, la emancipación y l’accesu a una vivienda digna, la participación y el desenvolvimientu del talentu cultural asturianu.
