El dragáu del puertu pesqueru de Llanes costará 461.000 euros

Les obres, que ya tienen redactáu 'l so proyectu, van empecipiase depués del branu con un plazu envaloráu de cuatro meses

0
542

La Conseyería d’Infraestructures va destinar 461.264 euros al dragáu del puertu pesqueru de Llanes. Juan Cofiño informó de que les obres van empecipiase depués del branu pa nun interferir na actividá turística. Estos trabayos nun taben previstos hasta 2021. Sicasí, la meyora de la perda de caláu a una velocidá superior a la prevista de resultes de los postreros temporales «aconseyó encarar les obres esti mesmu añu énte la dificultá pal tránsitu d’embarcaciones y pa les maniobres d’entrada y salida del muelle», sorrayó. El proyectu del dragáu de tola dársena pesquera yá ta redactáu. Inclúi tamién la estracción d’una parte magriza más dura asitiada al pie de la confrería de pescadores. El plazu de les obres ye de 4 meses.

Pal dragáu va emplegase una máquina retroexcavadora, a la que se va acoplar un estensor que va permitir algamar los puntos más alloñaos del cantil. El material estrayíu, unos 5.033,60 metros cúbicos, va atropase nel puertu pa esaniciar agua del sedimentu que, darréu va cargase en camiones y va tresportase a Coxersa.

Obres de saneamientu y suministru

El presupuestu d’esti añu tamién inclúi una partida pa una obra clave pal conceyu: la incorporación del saneamientu de Balmori y Posada a la estación depuradora de San Xurde. Trátase de derivar el saneamientu d’estos núcleos a la depuradora del valle de San Xurde, menguando na mesma midida los caudales a tratar na depuradora de Llanes, sobrecargada na actualidá. La obra va repercutir nun meyor funcionamientu de los dos sistemes y va riquir una inversión total de 1.750.000 euros. Va cuntar con una partida de 50.000 euros nel presupuestu de 2020 y el proyectu ta a puntu de rematase.

Tamién s’incluyeron 200.000 euros pa l’adecuación y renovación de bombéu de la depuradora de Llanes. Les obres van suponer una inversión total de 1.200.000 euros. Estes infraestructures, tres más de 20 años de funcionamientu, precisen una rehabilitación n’equipos y n’estructura. Na depuradora de Buelna y Pendueles realizáronse obres d’emerxencia por 491.413 euros tres la inundación de xineru de 2019, qu’anubrió la depuradora actual. La depuradora ta pendiente de suministru eléctricu y ta previsto que se complete esti mes. Esta obra constitúi la primer fase de la depuradora de Buelna y Pendueles, formada por un bombéu inferior, una planta de pretratamientu allugada nuna zona que nun resulta inundable y la torna de les agües al biolóxicu actual.

Amás, la conseyería ta executando les obres de renovación y meyora de la rede de suministru de Llanes. Con una inversión 748.410,31 euros, l’oxetivu ye anovar la conducción de suministru al depósitu principal de Llanes dende les captaciones de Les Pises y L’Arenal. El llargor de les tuberíes que se reponen ye de siete kilómetros. La conclusión d’esti proyectu, executáu yá nun 80%, prevése pal próximu mes de xunu.

Polo que respecta a carreteres, Infraestructures prevé contratar anguaño les obres d’arreglu de la carretera AS-343, que xune Puertes y Panes, por Villanueva. Anguaño, Infraestructures ta redactando’l proyectu d’obres, con un costu de mediu millón, nel que se van incluyir l’arreglu d’últimos fundimientos producíos poles intenses precipitaciones del iviernu.