El Festival Internacional de Cine de Xixón algamó un nuevu récord hestóricu de taquilla y de públicu na so 63ª edición, celebrada en payares. Magar de caltener la so política de precios al respective de la edición anterior, ya inclusive a introducir, per vegada primera, un descuentu pa les proyecciones mañaneres, el FICX volvió bater el so récord hestóricu de taquilla, superando los 158.000 €, lo que supón un aumentu del 8% respectu al pasáu añu y de un 53,8% con al respective de la edición de 2022, que marcó’l 60 aniversariu del certame. La cifra de bonos de 10 sesiones vendíos aumentó un 9% respectu al pasáu añu, mientres que la venta de bonos nuevos de 5 sesiones aumentóse nun 30% en 2025, certificando que sigue la necesaria renovación xeneracional del públicu del FICX.
Coles mesmes, el públicu de les películes que formaron parte de la 63ª edición del FICX volvió algamar per segundu añu consecutivu la cifra combinada presencial + online más alta de tola hestoria del Festival, con un total de 125.753 espectadores, lo que supón un crecimientu del 10,2%. Coles mesmes, un total de 76.391 persones participaron nes actividaes presenciales del FICX mientres les feches de celebración del Festival.
La Sección Oficial Albar desbanca a Enfants Terribles como estaya con más públicu del FICX y xube un 25% n’asistencia. Pela so parte, Enfants Terribles caltiénse en cifres similares a les de 2024, raspiando los 13.000 estudiantes qu’allegaron a les proyecciones, inclusive alumnáu procedente de seis centros educativos de Llión, Lugo y Santander. Tamién ye destacable l’impulsu que’l públicu otorgó a FICX Premiere, convertida en sección competitiva per primer vegada en 2025, y qu’aumentó’l so públicu nun 49% con respectu al pasáu añu. Amás, l’asistencia a los alcuentros presenciales de los y les cineastes que visitaron el FICX col públicu y la prensa creció nun 12% hasta algamar el so máximu históricu. Tocantes a les sales, el Teatru Xovellanos sigue siendo’l gran bastión del certame, recibiendo anguaño nes sos proyecciones un 13% más d’espectadores qu’en 2024. Xixón Sur algama tamién un nuevu máximu históricu al aumentar de nuevu la so asistencia nun 9%, mientres que, magar el so llindáu aforu, l’Antigua Escuela de Comerciu algamó coles mesmes el so récord d’espectadores, superando per primer vegada los 4.000 asistentes.
No tocante al financiamientu consiguíu al traviés de convocatories públiques, la Comisión Europea aumentó 4 puntos la valoración del proyectu presentáu pol FICX pa 2025 y 2026, otorgando un total de 126.000 euros, lo que supón un aumentu del 14% y constitúi la cifra récord d’aportación europea recibida en tola hestoria del festival. Nel informe de Creative Europe coméntase que “gracies a una sólida estratexa presencial y dixital, el festival llogró ameyorar la so asistencia y llograr meyores resultaos que nel periodu anterior a la pandemia. Les cifres de públicu total de los postreros trés años son alzaes, al igual que les previsiones para futures ediciones.”
Tamién se destaca que “les acciones empobinaes al públicu nuevu y les iniciatives d’educación cinematográfica tán actives y son de calidá” y que “el festival cunta con un equipu esperimentáu y competente”. El Festival Internacional de Cine de Xixón llamenta fondamente’l recién fallecimientu del que fuera’l so director mientres dieciséis años, José Luis Cienfuegos, a quien va homenaxar na so próxima 64ª edición.
