«La situación ye mala y esmolecedora» con esta atayante afirmación, la portavoz del Gobiernu Melania Álvarez anuncia que’l Principáu d’Asturies va poner en marcha nueves midíes pa frenar la dramática evolución del andanciu n’Asturies con unu enclín a l’alza de 300 contaxos diarios y dellos brotes activos como’l de Grau y el Sporting de Xixón. Espérense midíes «exemplarizantes» pa dambos casos tal y como lo anunció ayeri la Delegada del Gobiernu n’Asturies, Delia Rosa.
La conseyería de Salú ta preparando un paquete de midíes que s’esperen entren a valir la selmana que vien. Magar que la portavoz del Gobiernu nun quixo desvelales atendiendo a principios de «precuru y precuru», espérase que nunes hores o mañana día sábadu dense a conocer. Dende’l gobiernu aclaren que van ser midíes d’alcuerdu a criterios técnicos y que van tratar de crear «el menor perxuiciu económicu».
Nesti contestu sanitariu, Adrián Barbón pidió al Gobiernu central el confinamientu domiciliariu pero foi refugáu dende Moncloa, pel momento. Asturies tien yá midíes restrictives, como adelantrar el torque de queda a les 22.00 hores y el zarru de la hostelería y comercios a les 20:00 amás del caltenimientu del zarru perimetral de la rexón.
