La Conseyería de Ciencia, Innovación y Universidá, al traviés del Institutu de Desenvolvimientu Económicu del Principáu (Idepa), empecipió la cuarta edición del programa Proof of concept, una iniciativa de prueba de conceptu que quier trazar venceyos ente grupos d’investigación y empreses tractores. Nesti casu, foi Windar Technology and Innovation la compañía que plantegó retos pa resolver per parte d’equipos de la Universidá d’Uviéu y escoyó dos de les cuatro propuestes presentaes.

L’oxetivu d’esti programa ye facilitar el potencial innovador de proyectos desenvueltos por investigadores que centren les sos actividaes nes árees científicu-tecnolóxiques prioritaries na Estratexa d’Especialización Intelixente (RIS3) pa promover procesos d’innovación abierta n’empreses tractores.

Esta mañana espunxéronse cuatro propuestes, ente les qu’un xuráu escoyó dos. Tratáse de proyectos venceyaos cola sensórica y col desenvolvimientu de materiales pa la industria que van recibir 30.000 euros caúna.

Trátase de les siguientes:

  • Desenvolvimientu d’un sensor virtual pa la predicción de la formación d’óxidos per condensación en materiales y productos (Proxi), de Vicente Rodríguez Montequín, del grupu d’investigación n’Inxeniería de Proyectos ya Inxeniería Sostenible de la temática RIS Sensores.
  • Valorización de folles de pintura integrándola nun amiestu asfálticu (Paintroad), del grupu d’investigación n’Inxeniería Sostenible na temática RIS3 Materiales pa la Industria, defendíu pola investigadora Marina Díaz Piloñeta, profesora del área de proyectos d’Inxeniería del departamentu d’Esplotación y Prospección de Mines.

Ell director xeneral d’Innovación, Investigación y Tresformamientu Dixital, Iván Aitor Lucas, encargáu de clausurar l’actu, estimó tanto a la empresa Windar como a la Universidá d’Uviéu la so participación, y punxo de relieve la importancia de fomentar la tresferencia de conocimiento ente grupos d’investigación y empreses.

Pela so parte, la directora xeneral del Idepa, Eva Pando, destacó la vixencia de les primes Proof of concept como ún de los preseos más novedosos de collaboración públicu-privada acomuñáu a la Estratexa Rexonal d’Especialización Intelixente.

Tamién participaron nesta edición del programa los investigadores Santiago Folgueras Gómez, del grupu de Física Esperimental d’Altes Enerxíes, y David Reigosa y María Martínez, del grupu de Accionamientos Eléctricos y Convertidores de Potencia.

Les primes tán cofinanciaes al 50% pol Idepa y la empresa. Los descubrimientos van permitir a la industria ameyorar los procesos de fabricación y la calidá de los sos productos.

El xuráu tuvo formáu por personal de Windar Technology and Innovation: Covadonga Carballo y Manuel Ignacio Pérez. Per parte de la Universidá integraron el xuráu Juan Carlos Mayo, director d’área de Servicios Científicu Técnicos, y Jorge García, director d’área d’Empresa. La directora del Idepa, Eva Pando, y el responsable de la área d’I+D+i empresarial del institutu, Jaime Fernández, tamién participaron.

Ente 2015 y 2018 lleváronse a cabu trés ediciones cofinanciaes, respectivamente, con Arcelor Mittal, Industries Lácteas Asturianes y ThyssenKrupp Elevator Innovation Center, que xeneraron un total de 40 candidatures presentaes y 12 primes concedíes: 3 en nanomateriales, 2 en fabricación aditiva, 5 en sensores, una n’analises de datos y otra en biotecnoloxía láctea.