Les conseyeríes d’Educación y de Cultura, Política Llingüística y Turismu ellaboraron a comuña dos guíes interactives con información y conteníu educativu dirixíes a facilitar el llabor del profesoráu de llingua asturiana y gallego-asturianu o eonaviegu.

El Estoyu d’estímulos y recursos dixitales pa la enseñanza del asturianu ordena y clasifica unos 300 recursos, mentes que l’Estoiro d’estímulos y recursos dixitales prá enseñanza del gallego-asturianu ou eonaviegu incorpora unos 150. Dambos documentos, que se presenten en formatu pdf interactivu, van publicase nel portal d’Educastur y van unviase a tolos docentes de Llingua Asturiana.

Los conteníos educativos de les guíes tienen procedencies diverses:

  • Materiales editaos pol Gobiernu d’Asturies y la Conseyería d’Educación como apoyu a la enseñanza del asturianu.
  • Centros de profesores que, al traviés de les sos asesoríes y nel so ámbitu d’actuación, encamienten y comparten recursos pa estes guíes.
  • Docentes del sistema educativu que comparten los sos materiales.
  • La rede de Servicios de Normalización Llingüística municipales, qu’aporta los sos materiales de promoción.
  • Los grupos de trabayu de renovación educativa y ellaboración de materiales dixitales de la Dirección Xeneral d’Ordenación, Evaluación y Equidá Educativa.
  • Páxina web d’asociaciones, entidaes privaes, periódicos dixitales, etcétera, que xeneren información de forma abierta al públicu.
  • Entidaes públiques, conceyos, mancomunidaes y equipamientos culturales, ente otros, con recursos y materiales multimedia que s’ufierten n’abiertu pa la comunidá educativa.

Los estudios tán pensaos pa los docentes, que van ser los responsables de valorar, escoyer y adaptar aplicaciones didáctiques afayadices pal so alumnáu y la so realidá socioeducativa.

Les guíes clasifiquen los conteníos de forma cenciella, col propósitu de facelos fácilmente localizables. Asina, utilicen categoríes qu’identifiquen cada recursu, asignándolos a una etapa concreta, y describen los sos posibles ámbitos d’aplicación.

Los servicios d’Ordenación Académica y Evaluación Educativa (Conseyería d’Educación) y de Planificación y Conocimientu de la Llingua Asturiana (Conseyería de Cultura, Política Llingüística y Turismu) fueron los encargaos d’ellaborar estes ferramientes docentes a lo llargo d’esti cursu.